Le Ménage ès Feuvres,
St. Ouën.
Lé 29 juillet, 1972.
Moussieu l'Rédacteu,
Lé pouorre dgiàtre d'fèrmyi a tréjous ieu fort à faithe. Au jour d'aniet, l'heûsiveté d'ses patates est sujette à la compétition d'aut' pays par lé temps tch'il' arrivent dans les marchièrs dé l'Angliétèrre, lé couôtement d'la main d'oeuvre m'niche san profit, l'înjuthe du temps l'gêne et ses longues heuthes dé travas l'accâbl'ye.
L'temps pâssé, ses malheurs n'étaient pon les mèmes, mais il' 'taient-là quand mème. John Patriarche Ahier nouos dit, dans ses “Tableaux Historiques” publiés en 1852, qu' en 1331 lé Rouai Edouard III avait dans les 500 fèrmes ou mènages en Jèrri tch'étaient v'nus en sa possession, entr'aut' raisons, par confistchâtion à cause dé manque dé titres ou contrats, comme j'vouos l'disais dans ma lettre du 8 juillet. S'lon les pâraisses, ches fèrmes-là prannaient l'nom dé “Bouvées”, “Charuées” et “Bourgages”.
Dans chu temps-là, d'après l'historien Ahier, eune bouvée 'tait à bein près deux vrégies, ch'est en tchi nou peut penser qué les charuées et bourgages 'taient d'la mème êtendue. D'après les dotchuments d'l'êpoque, les fèrmes en général étaient p'tites. Ch'est probabl'ye qué lé r'vénu des cheinnes êglièrvies par lé Rouai trouvait san c'mîn dans la trésôr'rie rouoyale en temps et lieu. Les fèrmièrs tch'avaient ieu la chance d'êcapper l'avarice du Rouai et tch'avaient mènagi à garder lus fèrmes, avaient à lî payi rançon quand mème. Pour eune bouvée, i' fallait payi huit, dgix, douze ou quatorze sou, s'lon la qualité d'la tèrre. Ches montants-là n'pathaîssent pon exorbitants, mais la valeu des sou d'chu temps-là n'est pon la cheinne d'à ch't heu. I' faudrait iun d's expèrts à tchi L's Êtats paient un tas d'sou pour aîdgi à nouos gouvèrner, pour cartchuler la valeu d'ches sou-là au jour d'aniet. L'auteur des “Tableaux Historiques” nouos dit qué “Trois sous faisaient un esteling, et douze sous faisaient une livre de monnaie du pays, douze estelings faisaient la livre sterling.” J'n'ai pon trouvé l'mot “Esteling” dans mes dictionnaithes, mais Larousse nouos dit qué l' “Esterlin” (tch'était p't êt' la mème chose?) 'tait eune ancienne monnaie d'originne Angliaiche “Qui eut cours en France aux douzième et treizième siècles”. P't êt' qué tchitch'un d'vouos lecteurs pouorrait nouos en donner la valeu.
Dans touos les cas, ch'est seux qué l'fèrmyi avait à travailli dû et couoyer pour vivre sus l'produit d'sa bouvée, sans pâler d's împots, et ch'tait dû d'aver a payi pour lé privilège dé tchultiver lé mio d'tèrre tch'était san gangne-pain. Et pis i' fallait payi l'campart, étout - la douzième dgèrbe 'tait deue au Rouai, cèrtaines grèveries au Seigneu d'san fyi, la dgiême aux tchuthés et prieurs, les tchithiages et aut' corvées pour les moulîns du Rouai, et acouo d'aut' corvées seigneuriales. Comme nouos l'dit John Patriarche Ahier : “S'il fallait énumérer tout ce qu'un pauvre paysan avait à supporter comme vexations, écrasement d'impôts de toutes sortes, chasse à travers ses moissans et jardins, et autres, je n'en finirais pas!”
À ch't heu qu' nou vait si p'tit d'noms Jèrriais par les c'mîns, ch'est întérèssant d'vaie les noms des grosses têtes dé Jèrri en 1331. Les douze Jurés d'la Couronne 'taient : Renault de Carteret, Seigneu d'St. Ouën; Guille Bras de Fer, Seigneu d's Augrès; Guille de Barentin, Seigneu d'Rôzé; Guille de Saint Hilaire, Seigneu d'Saumaresq et du Ponterrin; Pierre de Garries, Seigneu d'Handois et Ferce-Branchiè; Guille Le Cheyné, Seigneu d'Vînchelez; Rogier Hamon, Seigneu d'La Hougue; Thomas Lemprière, Seigneu d'Lemprière; Jeffrey de Carteret, Seigneu d'Mélèches; Jourdain Payn, Seigneu d'La Godelerie et d'Oulande; Raulin de Queteville, Seigneu des Quetevaux, et Richard de Bagot, Seigneu d'La Moye. Tous des Seigneurs, man bouanhomme! Ch'n'est pon ravissant qué ch'est d'vièr temps qué v'la tch'a 'té considéthé un grand honneu pour un Jèrrais d'êt' Juré Justicier, et, à m'n idée, ch'est danmage qué touos l's êlecteurs dé l'Île ont pèrdu l'drouait et l'privilège dé l's êlithe. Lé Greffyi d'chu temps-là, 'tait Thomas de Cerfe, et l'Prévôt Rouoyal 'tait Colin Laffoley. Et Ranulphe Maret 'tait l'Abbé d'la Chapelle dé St. Hélyi.
Les “Tableaux Historiques” donnent étout les noms des pèrsonnages împortants des douze pâraisses assèrmentés pour faithe l'Extente dé 1331 des r'vénus du Rouai. Y'avait des de Quetteville, Dumaresq, Le Cerf, de la Mare, Robin, Bêchèrvaise et Diervaux, sans pâler des Tourgis, Balleine, Arthur, Vautier, Le Febvre, Dolbel, Le Maignan, Le Breton, Viel, Botterel, Trachise et bein d'autres.
Ch'est grand danmage qué nouos r'gistres dé bâptêmes, mathiages et décès fûdrent dêtruits au c'menchement du seizième siécl'ye, autrément j'éthions peu faithe nouos tabl'yes généalogiques èrtchuler jusqu'au treizième siécl'ye. Il' ont duthé longtemps, pourtant, ches bieaux vièrs noms! Mais y'en étha-t-i' d'restant en Jèrri quand l'vîngt-tch'eunième vèrra l'jour?
George d'La Forge.
Viyiz étout: