Chunchin est la pure, plieine et entièthe vérithèt, fouai de Marie Hibou, et l'gros Jack, qu'est hardi connu, pouorrait vos dithe que ch'est à li que l'affaithe s'arrivi, il y a de chunna tchiques jours.

Y faut craithe qui fut prins de faiblesse dans les gambes ou d'la maladie du sommé car y fut surprins de s'réveilli sus un fossi tchicque bord oprès du moulin d'la Reine.

Il tait d'vèr dièz heuthes du sé et l'gros Jack s'trouvait dans ieunnes des ruettes quand n'v'la bélanger qui l'y barre le quemin et qui s'présenti d'vant li avec trais veues!! Les ch'veux li en draichites sur la tête car ieunne des veues voulait l'conduithe touot drait dans l'canet!

Tout trembliant couomme une fieille, l'gros Jack s'mint à couorre couomme si chès braies étaient à feu! Viyant une cache, vite il ouvre la hèche et bang! bang! à la porte du ménage d'un fermi de Grouville.

Nou l'fit entrer, viyant qu'il tait palle couomme une chiquette et trembliai d'peur. Y raconti à nos gens chein qu'il v'nait de vèr et couomme l'fermi restit incrédule et s'fit qu'il n'en criyait pas un mot de c't'affaithe, l'gros Jack li dit: "Tu n'veur pas m'craithe, mais j'lai veue. Oulle avait trais veues et ieunne voulait m'entraîner dans l'canet pouor me nièr!"

Quand y fut un miot ermin, notre fermi alli l'conduithe un bout du quemin et le laissi s'n'aller siez li. Y faut craithe qu'il n'alli pon fort loin viyant que j'ai ouï dithe que Charlie l'Canadien l'vit de vèr minièth ès environs.

L'pus bé de l'histouaithe chest que l'Samedi d'oprès, l'gros Jack s'en v'int en ville iou qui rencontri ieun de ses amins à tchi y raconti sa triste histouèthe et l'autre l'y réponnit: Mé, éttouot, j'ai été prins d'même et la seule manièthe pour faithe couorre bélanger ch'est d'arrachi un bouton de ta veste et d'le lanchi par sus un fossi.

Notre Jack, oprès avèr entendu chunna, s'en revint sièz li et le lendemain il alli ver l'fermi incrédule li raconter chein qu'nous lis avait dit en ville.

Criyous qu'notre fermi fut convaincu? Nennin, il eut l'affront de répondre: Bougre - sauf votre respect - de bête, si tu continues à arrachi les boutons de ta veste de même y n't'en restera pas en tout et tchès que tu f'thas oprès. Arracheras-tu les siens de tes braies?

Mé, Marie Hibou, j'crais que Bertie en sait un p'tit pus long viyant chein qui d'mandi sièz un barbi du quartier français.