Si l'envie vos prenait d'accaté d'la pétuthe,
Du bran ou du gros sé, du pollard ou d'la flieu,
D'la Muothue, du caplin, des pès ou ben d'l'oignon.
Ou trouorais tout cheunna siez Maitré Parpaillon
Sur l'air du tra...
Né'v chin l'hivé sus nous, s'ou z'avez des r'frédeuses,
Du frét, la gorge enfliée, ou des frouéts au co.
BAKER endrét l'marchi a tout ch'qui fôt pour vous,
N'vos laissis pon muothi, criéz-mé, vite, soign'ous.
Sur l'air du tra...
PODGER dan “Minden Place" ést l'houmme tch'étha man “cash”
Les hèrness tchi fabrique sont fichtré pas du “trash”
Ses buorieaux, ses séllots, ses brides et ses bridos,
Sont tout ch'qui y'a dé mus en tchui de vaque on d'vieau
Sur l'air du tra...
Vos fôt y des neuv'bottes a lachi sus lé d'vant;
Des slipeurs en lis-d'drap, ou des souliers d'èsfant;
Des “pumps” en marotchin, des “leggins” en niér tchui
Allez siez M. PICOT, endrét lé neu' marchi.
Sur l'air du tra...
Tuos les garçons qui sont sus l'point dé lus mâthié,
D'van qu'd'accaté la bague pour dounné à Bétté,
Consultez Moussieu GENGE, et dites ly ch'qui vos fôt;
Dé bagues en or et d'broach, il en a des muochios.
Sur l'air du tra...
Et si vos fôt des qu'minses de buon fort blianc cotton
Pour filles ou femmes ou veuves, ou offuche pour garçon,
Ouln puorès pas mu s faithe qué d'allé siez d'GRUCHY
Ches là qu'ou trouverez a pus millieu marchi.
Sur l'air du tra...
Si'l buon Djieu vos a mins a travaillyi la terre,
Et qu'cru voudrètes avé dès heuthiv' poumme-dé-terre;
Ser' vous du GUANO GIBBS, chès Moussieu L'Sueux qui l'vend.
Quand Mess Bilo n'accate, chès tréjous là qui l'prend
Sur l'air du tra...
. . . .
Et ach'teu, s'ous êtes contents et satisfaits et s'ous avez yieu du ji pour vos quat' sous, chantez mé chtin'chin:
Le Chant'nyi Bram Bilo fôt ben tout d'même lé dithe',
Avec tout sen niollin, nos a fait pouffé d'rithe.
Quan' dé tchitté là terre, pour li vindra l'moment,
J'ithons avec plyiaisi, ennsembye a s'n enter'man.
Sur l'air du tra...
Oquo eunne fais, garçons, lévons tous d'bu et qu' l'affaithe en craque.
Sur l'air du tra...
Bram Bilo
1890
Viyiz étout: