Les Pages Jèrriaises

Actes des Apôtres: 2

Chapitre 2, vèrsets 22-36

Hoummes d'Israël, êcoutez chennechîn: Jésû l'Nazarétchien, un houmme chouaîsi par l'Bouôn Dgieu - ch'est en tchi ses faits et sîngnes et mithacl'yes qu'lé Bouôn Dgieu fit par li parmi vous, et ou l'savez bein, en sont la preuve - ous en fûtes enchèrgis dé ch'tî-là, s'lon l'vouler et l'saver du Bouôn Dgieu, et ou l'cliouîtes à la crouaix, et ch'fut atout les mains d'malfaiteurs qu'i' fut tué. Mais l'Bouôn Dgieu l'souôl'vit et l'libéthit d'la mort viyant qu'i' n'tait pon pôssibl'ye qu'il en fûsse contchéthi. Viy'-ous, Dâvi en prêchit: "J'viyais l'Seigneu tréjous l'avant à mé, car il est à ma dêtre pouor qué jé n'sai janmais chôlé. Et né v'là pouortchi qué j'm'en rêjouissais et j'faîthais des brais d'jouaie et ma chai viv'tha en espé viyant qu'tu n'dêdgèrpithas m'n âme en enfé ni allouêthas qu'tan saint chouaîsi sait péthînmé. Tu m'as fait assaver les c'mîns d'la vie, et j's'sai rêjoui quand j'vèrrai ta fache."

Mes fréthes, j'vos dithai fiabliément qu'Dâvi not' anchêtre mouothit et fut entèrré et sa tombe est siez nous aniet. Viyant qu'i' 'tait un prophète, i' savait qué l'Bouôn Dgieu li'avait juthé qu'un d'ses d'cendants lé siétha coumme rouai. Il avait préveu chennechîn quand i' prêchit d'la résurrection du Christ: qu'i' n'fut ni dêdgèrpi en enfé ni péthînmé. L'Bouôn Dgieu souôl'vit chu Jésû et j'en soummes touos des têmouains. Et souôl'vé d'même à la dêtre du Bouôn Dgieu et ayant r'chu la promêsse du Péthe qu'lé Saint Esprit veindra, il a vèrsé tout chennechîn qu'ou viyiz et connaîssez achteu. Car Dâvi n'a pon monté ès cieux mais i' dit lî-même: "Lé Seigneu dit à man Seigneu: assied-té à ma dêtre entréchîn qué j'faiche tes enn'mîns tan sictîn". Et né v'là pouortchi tout Israël dait saver pouor lé seux qué l'Bouôn Dgieu a fait chu Jésû, qu'ou cliouîtes à la crouaix, lé Seigneu et l'Christ.

 

Vèrsets 37-38

Et quand i' ouïtent chennechîn, lus tchoeurs fûtent troubliés, et i' dîtent à Pièrre et ès aut's apôtres, "Messieurs, nos fréthes, tch'est qu'j'allons faithe?"

Et Pièrre lus dit,"Répent'ous, châtchun d'vous, et séyiz baptîsis au nom d'Jésû-Christ, pouor l'pardon d'vos péchés, et ous èrchév'thez l'don du Saint Esprit."

 

Viyiz étout:

 

Les Pages Jèrriaises