Les Pages Jèrriaises

Les siêx souothis vouailées



Eune séthée dans eune aubèrge à St. Pièrre Port en b'vant eune pînte dé cidre, jé rencontris chutte vielle histouaithe Dgèrnésiaise - l'histouaithe des siêx souothis vouailées.

Y'avait eune fais eune fanmil'ye malheutheuse. Tout ch'qu'i' faîthaient touônnait au ma, et i' n'avaient janmais d'succès ni d'bonheu. Criyant à la fîn qu'i' 'taient enchorchélés, il' allîtent vaie la d'senchorchéleuse du vaîthinné. Chutte blianche chorchiéthe apportit eune poutchie d'chorchéthons siez la fanmil'ye, et les fliantchit dans la chaudgiéthe dans la tchuîsinne en frédonnant tchiques patholes dé pouvé.

La d'senchorchell'lie forchit les cheins tch'avait enchorchélé la fanmil'ye d'lus mouontrer, et quand la chaudgiéthe quémenchit à mitonner, né v'la eune tchuthieuse procêssion tch'entrit dans la tchuîsinne: siêx souothis entrîtent deux à deux, mais i' 'taient toutes vouailées.

D'un ambron, lé péthe dé fanmil'ye happit les souothis et l's apportit siez l'Protchuleux en Ville. Et ch'fut là qu'les souothis r'prîntent lus vraies formes: trais danmes du vaîthinné et lus sèrveuses.

Les siêx chorchiéthes fûtent condamnées; la fanmil'ye n'avait pus d'malheu - et né v'là la fîn d'l'histouaithe.


Geraint Jennings
2003
 

Viyiz étout:

 

Les Pages Jèrriaises