Les Pages Jèrriaises

Rêsolutions

Fort Lauderdale
Florida
USA
Lé 31 dé dézembre, 1977
Moussieu l'Rédacteu,

Né v'là don mil neu chent septante-sept tchi n'a pus qu' lé p'tit respi, et un tas d'gens sont à êprouver à faithe des bouannes rêsolutions pour mil neu chent septante-huit. Mais eune chose tchi m'frappe quand j'envîsage d'ité est tch'i' y'a un vièr diton tchi nouos dit qué les rêsolutions du sé n'sont pon les cheinnes du matîn, et v'là tchi peut s'dithe des rêsolutions d'la vielle année étout, car i' n'sont pon souvent les cheinnes dé la nouvelle.

I' sont mangnifique, ches vièrs ditons. Y'en a un aut' tchi nouos dit qué chein tch'est dans l's os n'peut sorti par la pieau. Ch'est bein vrai, quand nous-s-y pense, car si eune grand' pèrsonne a ieu cèrtains d'fauts duthant sa vie, y'a des chances qu'eune rêsolution dé l's abandonner à l'av'nîn n's'en va pon aver grand êffet sans un grand êffort, et la rêsolution n'est pon souvent au sujet d'l'êffort – oulle est pûtôt au sujet d'l'abandon!

Quand à mé, m'n idée est qu'nou dév'thait faithe des bouannes rêsolutions touos les jours. Ou-s-allez m'dithe qué j'fais sèrvi l'mot ''diton'' trop souvent, mais j'en sis êmèrvilyi, d'ches vièrs ditons tchi sont preuve dé la sagesse des nouos anchêtres, et y'en a un aut' tchi nouos dit  : ''Né laîssiz pon à d'main chein qu' ou pouvez faithe aniet!'' Ch'est en tchi nou dév'thait êprouver à faithe lé bein du matîn jusqu'au sé sans arrêter pour lé lendemain. Mais en pâlant d'rêsolutions i' m'sembl'ye qué j'oublions qué nouos parrains et marraines en fîdrent trais pour nous qué j'acceptînmes nouos-mêmes quand j'feûnmes d'âge d'êt' confirmés dans la Maîson du Bouan Dgieu par Sén êvêque et r'présentant sus tèrre.

Les v'chîn  :

1, ''Que je renonçerais au diable et à toutes ses œuvres, au pompes et aux vanités de ce monde corrompu, et à toutes les convoitises criminelles de la chair'',
2, ''Que je croirais tous les Articles de la Foi Chrétienne''  :
3, ''Que je ferais la volonté de Dieu, que je garderais Ses Saints Commandements, et que j'y marcherais tous les jours de ma vie.''

Ou pouvez les liéthe à la page 173 dé La Litourgie. Né v'là des rêsolutions tchi nouos sont donnée grâtis. Malheutheusement , jé l's oublions souvent eune fais tchittés l'Ecole du Dînmanche, et ch'est cèrtainement à nouot' honte dé l'dithe. V'là tchi nouos f'thait du bein dé r'liéthe lé Caticème dé temps en temps pour nouos ramémouaither nouos promêsses et réglier nouot' condite dans la vie Chrêtchienne.

Heutheusement, j'pense tch'i' y'a main d'dgèrres à la fîn dé ch't année dans l'monde, et y'a des chances qué la paix est en veue dans l'Mouoyen Orient. Ch'est âffreux d'penser tch'i' faut tant d'pourparlés d'politiciens et d'rencontres d'hommes d'êtat pour arriver à dêcliather la paix entre les nâtions du monde quand nou pouôrrait vivre en paix auve toutes ches nâtions en obsèrvant lé c'mandement d'Nouotre Seigneu dé s'aimer les uns les autres, et d'rêalîser qué j'sommes touos fréthes et soeurs sus la tèrre.

Si y'a eune chose qué j'espéthe dé vaie en 1978 est qué la Poste s'en va s'rêvilyi et marchi, couôrre ou voler pus rapidement d'Jèrri en Améthique. Criyez-mé ou n'mé criyiz-pon, la dreine gâzette qué j'ai r'chue est la cheinne du 31 d'octobre annonçant l'mathiage dé m'n anmîn l'Député Jean Amy L'Maistre, et ou n'm'apprannait pon grand' chose dé nouvé dépis qué j'tais en Jèrri jusqu'au 18 dé chu mais-là. Dans chutte gâzette y'avait pâlement d'l'êlection probabl'ye d'eune femme comme Juré-Justicière (ou j'dév'thais-t-i' dithe Jurée-Justicière  ?) dé la Cour Rouoyale dévant la fîn d'l'année. J'mé d'mande tch'est qu' en est. J'avons-t-i' eune femme sus l'Banc d'Justice à ch't heu  ? Ches années d'boulevèrsément sont étout d's années d'précédents, et l'nouvieau titre dé Madanme dé Justice en s'sait iun d'importance dans la vie officielle dé l'Ile.

I' n'y'a pon d'doute qué les femmes jouissent d'un rôle împortant dans la vie et l'conmèrce dé l'Améthique dé nouos jours, et en Jèrri étout quand j'veins à rêalîser qu' à la fîn d'la grand' dgèrre 1914-1918 i' n'y'en avait qu' ieune (Mdlle Maria Amy) dans eune office d'Ecrivain dans la Rue ès Trais Pigeons. J'tais même êpouvanté d'vaie chu précédent-là quand j'èrvîns d'la dgèrre! Mais y'a eune chose frappante. Ch'est tch'i' y'a un excès d'pèrsonnes sans travas et à r'chéver d'la pâraisse par toute l'Améthique, et à m'n idée la raîson prîncipale est tch'i' y'a tant d'femmes à faithe lé travas d'hommes dans l'conmèrce et la vie îndustrielle du pays. Et quand homme et femme d'eune fanmil'ye travaillent en même temps, lus êfants n'sont pon à c'mandement, manque dé seurvillance, et n'pense qu' à mêché!

George d'La Forge

 

Viyiz étout:

 

Les Pages Jèrriaises