J'm'en vais vos raconter eune scène entouor ch'qui s'arrivit y a bein d's années siez des couôthins er'moués à ma grand'méthe, ch'tait des Mallets par lus nom d'famille.
I' gardaient eune moyenne fèrme à St. Jean, et lus criyait tout-à-fait des grands gens, et quand lus fille et seule êfant, Sophie, eut 21 ans, i' décidîtent d'aver un divèrs grand festîn, souos l'espethance dé lî trouver un galant.
A c'menchi Sam n'en approuvait pas fort, mais Liza, qui 'tait acouo bein pus ordgilleuse qué li 'tait dêterminée d'aver s'n idée, et d'être au mains eune chînquantaine.
“Hen!” s'fit Sam rupêment, “Eune chînquantaine!! Iou janmais qu'tu t'en vas les trouver, j'mé d'mands? J'n'avons pon grand pathents pour cémenchi. Et pis nos vaîthîns n'nos învite janmais siez ieux à lus festîns, ieux!”
“Oh! Né sait pas si bachouard!” s'fit Liza, “Ch'n'est pon nos pathents! C'est des grand' gens qué j'voulons --- Lé Connêtablye et sa dame, lé député et la sienne, et pis lus deux garçons, Liesse et Ph-lip, deux charmants garçons valet! Lé Recteu, i' n'a ni femme ni êfants li, mais enfîn; nout' homme d'affaithes et sa fanmille, Lé Juge Amice Le Grand, nout' propriêtaithe, il est veuvi et d'meuthe avec sa soeu, et bein par politesse, lyi étout et s'n homme et un janne garçon, Frainque jé crait! Et d'même la liste alouangnait tout l'temps jusqu'à v'nin ès 50.
Auprès deux-trais jours l's învitations fûtent env'yées, et l'pouor Sam dans l'entrétemps honnait en allant et v'nant, - “Iou qu' j'allons mettre tout chu monde là?” “Et pis té Liza”, s'fit t'i' eune séthée, “Tu n'pouorras pon être à l's entrét'nin et à coutchi en même temps.”
“Oh, mon sécours! Tu-est acouo pus bête qué j'en criyais, Sam. Ch'est l'arlévée à la cook du mangnyi, et ou s'en vein graie lé r'pas ichîn, et pis la femme qui veint mâtter tes patates veindra l'aidgi et r'lav'tha les vaissieaux auprès tout fini,” s'fit Liza prompt'ment.
Dans l'couothant d'la préchaine sémaine les réponses èrvénaient douoch'ment, mais la pus grande partie erfuthaient pour tchique raîthon ou autre, et même i'y en eut eune dgiézaine qui n'rêponnîtent pas du tout.
Lé jour dévant la bordée, et i'y avait ieu acouo tchiques démînses, les couôthins 'taient a arrangi les pliaiches pour lus assiéthe à la tablye, quand à lus grand' hôrreu Liza réalisit qu'i' n'taient rein qu'treize!
“Ch'est qu' j'allons faithe,” s'fit alle. “Ch'est d'main l'festin, et il est trop tard pour d'mander à tchiqu'un d'aut'!!” Et nou n'peut pon dithe à autchun d'rester siez li. Oh! Mon doux, mon doux!”
Lé Sam par à-ch't-heu' 'tait tout en trains d'la bordée, car il avait veu touos les prépathâtis, et i' 'tait aussi d's appouaînté comme Liza, et en rentrant pour dîner i' lî vînt eune idée.
“Ch'est qu'en s'sait Liza d'înviter l'couôsin Douard Laffollé dé Gouoré? Sa femme n'y veindra pas, 'ou' n'va janmais nulle-part lyi.” i' dit tout-d'suite.
“Ah, nânnîn dga! Chu vièr avare là, qui n'sort jamais n'tout, il est amaintchi sauvage!” rêponnit Liza.
Mais auprès bein d'la considéthâtion ch'tait la l'seul à tchi qui pouvaient penser, et l'Sam prînt vite sa “bike” et s'mînt en route pour Gouoré.
Sam, un miot rûsé, arrivit siez Douard d'vant trop longtemps, car lé temps 'tait précieux, et en l'viyant lî dit, “Oh, mais Douard, qué tu as bouanne minne! J'avais oui qu'tu t'ais bein malade, ch'est pour chenna qué j'sis v'nu t'vaie à ch't arlévée, tu vait!”
“Malade!” rêponnit Douard, “J'en sis d'bein lien, valet, j'sis acouo solide comme un rotchi, man vyi!”
Auprès aver conter bein d's extchuses et mansonges Sam finit par înviter san couosin au parti. “Ah danme oui, j'y veindrait,” rêponnit Douard auve un malîn r'gard dans l's ièrs.
Lé land'main arrivit et l'matin s'passit sans trop d'embarras, et pus tard lé r'pas 'tait près à sèrvi, et l'Sam 'tait à donner deux d'gouts d'vin à ses invites, quand Mélie l'Bro', la sèrvante au Recteu arrivit à dithe qué san maître né pouvait pas v'nin qu'il avait un mauvais fraid.
“Dgiâtre!” s'êptrînt Sam, “J'allons acouo être reinque treize!”
“Ch'est d'ta faute, pouor achocre! Pourtchi qu'il a fallut d'mander à chu vièr avare dé Douard Laffollé entout? Mais arrête, donc, i'n'est pas acouo v'nu. Quand i' s'en va v'nin r'envyie lé siez li bein vite et dit li qué l'festin est c'menchi, et qu'si n'pouvait pas v'nin en temps n'fallait pas v'nin du tout!!!” rêponnit Liza rupêment.
“Hen, ch'est tout bein pour té,” r'potchi Sam, “Ch'est pus aithi d'dithe qué d'faithe, valet!”
Enfin, tous 'taient à arrêter quand la clioche dé la grand' porte sonnit, Sam sé buttit; “J'm'en vais l'mettre à la porte – du coup!” s'êprînt t'i'. Mais surprînse qu'i' n's'attendait pas, lé Douard avait am'ner sa femme Rachel avec li. Lé Sam 'tait si content d'les vaie arriver qu'il en plieuthait d'jouaie et il's embraichi touos les deux. Eune telle bein-v'nue surprîns les Laffollés qui c'menchîtent à supsonner tchique-chose. Auprès aver rencontrer l'restant d'la compagnie, i'lus mîntent tous à lus rigaller, et mangitent dé bouan tchoeu.
Mais auprès l'fricot fini. Douard sé d'sahontit par sé mettre à mâchi, et pour êprouver à passer l'affaithe, Sam d'mandit à lus homme d'affaithes, Moussieu Touzé, un raide bouan chanteux, pour tchiques chansons, et i' sé l'vit tout-d'-suite et en chantit trais, et quand i' sé rlévit pour en chanter eune quatrième, lé vièr Douard sé l'vit et dit, “Messieux et dames, vos pliaît'i' m'extchuser? J'en mé trouve pas trop bein, et j' m'en vais m'en aller tandis qu'i' fait acouo un miot jour; et vous moussieu L'Grand, éthioûtes la bonté dé rapporter ma bouanfemme en passant? I'y a du run dans l'querre est-che pon?”
Hélas! L'pouorre Sam et la Liza, i 'taient si dêmîns qu'i' n'pouvaient pon en dithe un seul mot!
Les autres sans doute applaudîtent les chansons à Moussieu Touzé, et ch'enn'chin donnit l'temps à Sam dé r'prendre ses sens ….
“Trieze! …. Nos v'la acouo treize, j'en pouvons pas en êcapper! Il a fait à l'esprès, chu viér pendloque là! I' n'est pas malade du tout j'sis seux!”
E.L.S.
Viyiz étout: