|
C'hest au sé quand je r'vains, fatigui et lâssai, Qué-j'sis fini d'soupé et touos l's'èfans au liet, Qué je prends ma Gazette et qu'j'aime à m'assièthe, Pour une bouonne heuthe d'er'pôs sus ma vielle joncthièthe. En fumant ma pipe je 'lièt toutes les nouvelles, Tandis que Jenny erpathe et sairre la vaisselle, Sans pairdre un moment ou' trouve tréjous d'qué faithe, Tandis que je m'erpose sus ma vielle joncthièthe. Et pis bétôt ou' r'vain quand tout est r'pathé, Mettre san bras l'tou' d'man co et s'assièthe aupi d'mé, Et pis touos les deux j'prenons qhuiq' chose à bèthe, Coumme un Roié et une Reine sus notre vielle joncthièthe. J'er'passons ensemblle les viers temps d'nos amours, Quant j'faisions la carre dans le princeu des Tours ; C'hté là ouai q'ou' rièt et m'disait veux-tu 'taithe - J'en rieîmes touos les deux sus notre vieille joncthièthe. Ah! John, s'faisait-alle, tu n'as pas oublliai Les p'tites aventuthes de not' bouan temps passai, Oquothe avec c'h'la voudrais tu bein m'craithe, J'préfèthe être coumme je sommes sus not vieille joncthièthe Aumains j'en'sommes qu'iun, dans chu temps-là j'têmes deux, Et pis 'y'avait l'fils du grand Ph'lippe Le Sauteux, Quéthai voulu m'avé en 'm'fêsant d's'acraithes, Pour mé hallé d'tes bras, et d'ta vieille joncthièthe. Mais non, j'avais vouai, que j'sais pour té seule, Quoeique dans l'prum'yi tu n'mé fis pon grand aqhueil, Mais bétôt j'vis bein et j'l'dit vite à ma mèthe, Chest mé qu'il étha pour soigni sa joncthièthe. Mais t'ôuoblie man garçon, ergas l'heuthe qu'il est, Ne'v'la mînièt qui sonne, allons vite est tu prêt, Et pis né v'là y'un des p'tits que j'entends braithe, Tu'y restethais toute la nièt sus ta vielle joncthièthe. Allume vite la chandelle et soufflle le crassèt, Barre la porte de d'vant et la f'nêtre du d'graî, Et vé't'en nos couochi, il est grand temps d'en faithe, Dit good-night, jusqu'à d'main, à ta vielle joncthièthe.
J. L. F.
|
Viyiz étout: