|
Bon! te v'la ma belle petite Rachel; v'la qui m'fait pliaisi de t'vais; T'en vas tu au grand Bézaar de Saint Ouen? qui n'est pas yien d'Trodez. Estche bein vrai que l'Gouverneux et sa dame sont touos les deux invitais? - Pour faithe la cérémonie: en ouvrant le Bézaar l'arlevaie. Mais oui ma garse; chest bein vrai, j'nos zian allons eunne vingtaine; J'avons ordonnet eunne "van" à couosçeins siez Maître Louis Ribainsdaine. Tu dév'thais y vnein avec nous; notre couozinne Annie s'yian vein; Ou'l est tréjous d'bouanne humeur, tu la connais; yia longtemps d'vieille main. Yia étout bieaucoup d'nos anmeins qu'ont fait lus ideaie d'yiallé; Les uns en carrosse; d'autres dans lus vétuthe ou par l'Omnibus le matin, Y s'yian vont tout exprès pour vaie l'Gouverneux et sa dame. Yia eunne chose: chest pour eunne bouanne caouse; et y verront eune belle campagne. Yià étout notre vaiezeine Naomi, eunne chièthe vieille femme, Oulle est la belle mèthe de Ruth, chette la qui des épis gianne. Ruth l'y dit ouèque t'uithas, j'ithais et je d'meutha ouèque tu d'meuthas; Ruth voulet allai vais un peupyïe que où n'connaissait pas. Et pis t'chesque ne v'la, sinon la bouanne femme Dorcas qui s'yian vein étout, Chest chette là qui fait des robes et des vêtements; où fait de tout;- Pour tout l'monde, principalement pour les pauvres, en toute saison, Ou'l est résusciteaie, chest la résurrection qui r'vein dans la maison. Ne v'la Priscilla qui r'cappelle avec un gros moussieu, en chantant: "Dare to be a Daniel." Tchesque que t'chet sinon l'gros Daniel, en dansant; Il tet pus à s'naise, et pus content là que d'être dans la fosse es lions, Car il avet à san côtet, eunne petite Ange, n'ou n'dit jamais les noms. Yiavet étout chute chièthe vieille Déborah, eunne vraie mère en Israël, J'mappréchit d'yi. J'aime des gens comme chonna qui sont justes et réel, Qui sont bons à tout l'monde; sçait qui sçais riches où qui sçais pauvres, J'pouvons en trouvé partout; châtcheun ont lus peines, les uns comme les autres. Nos v'la tous yiallé dans la "van" avec deux chevaux au galop, J'arrivimes au grand Bézaar en temps, j'navaimes pas eunne minute de trop. Je craigniêmes de n'vais pas le Gouverneux, sa dame, et touos les aristos, Mais Oh! Malheur; t'chi désappointement, il tet restet es Ecréhos. Quand j'taîmes presque auprès d'la Chapelle, j'rencontrîmes eunne bein belle jeune fille, Ch'tait Rebecca, avec sa cruche sus s'n épaoule, qui r'vénait du puits d'Léoville, Ses yeux pétillyiées; oùl avet veu eun jeune homme, quand où tet à cherchit d'yieaou. Oh! mais qu'où tet bouanne; où nos offrit pour nous, et étout pour nos chevaux. Tout l'monde yiarrivet en foule; yiavet des chents personnes - Qu'entrirent comme nous, pour vaie l'Bézaar et l'Moussieu d'sçouos la Couronne, Mais comme y n'était pas là; v'la qui fit du mêscontentement Et y r'touonirent le douze sou t'chet un grand désappointement. Si Matthieu avet tet là à changit l'argent, y n'éthaient pas yieu l'embarras - - De trouvé autant de douze sou n'ou n'les trouve pas à la londgueur des bras. Chonna du faithe un grand troubyïe et eunne grande confusion De trouvé et de r'changit l'argent à eunne telle population. Comme le Gouverneux et sa dame s'yien allaient, ils avaient chergit extra. J'ein tet qu'un douze sou, il est vrai, mais y ian a qui r'garde à chonna, Mais vraiment j'ein tet pas trop, je crait que tchet bein bouan marchi, D'avé un homme qui r'présente le Roie; Il tet bein bon d'lus donné tant d'pliaisi. Enfin , j'admithe les Saint-Ouennais, pour lus grande honnêtetet. Y n'taient pas gênaies d'lus peine comme y l'ont bein montrer, Mais comme tchet pour eunne charitet il est à espéthé Que les gens ne voulurent pas le douze sou accepté. Hélas! J'tais t'y content de yiallé, j'aime hardi les Saint-Ouennais. J'eim rappelle quand j'tais toute jeune, d es mes "teens," que bein souvent j'yiallais. Oh! mais t'chi bouanne venue qui m'faisaient, y n'yiavait rein d'trop chi, Yiavet des jeunes filles là qu'étaient tréjous à m'embrachit. Yiavet ètout plusieurs jeunes hommes qu'entrirent après l'service; J'avaîmes touos tet à la Chapelle; y vinrent nos faithe eunne visite; Y r 'gardaient les filles m'embrachit, v'la qui lus faisait envie Et y n'osaient pas appréchit; ils tais justement de m'navis. Courage, mes anmeins d'Saint Ouen; chest la fein qui couronne l'oeuvre. Je fûmes bein contents du résultat, tchet pour eunne bouanne oeuvre. Faut s'attendre es désappointements et es revers dans la vie, Touos les nuages se dissipirent puis - qu'où zeûtes pas d'deux chents louis. Bravo! nos anmeins d'Saint Ouen! Georgie |
Viyiz étout: