Lé monde souos-mathîn est vraîment un autre monde. Pouor mé, la Rouoge Mé est la pus întérêssante pa'ce qué dans les Tropiques l'ieau est caude et i' y'a des chentaines dé paîssons, dé corailles et d'vrai. J' pâssis deux longues vacances sus eune p'tite pliate-forme construite sus eune barre dé corail et châque matîn, lé ciel 'tait bliu et l'air 'tait caud auve des p'tites aubes dé vent.
La mé est bliue étout et hardi cliaithe, et les chentaines dé paîssons dé toutes sortes dé couleurs, formes et grandeurs d'meuthent dans et alentou des barres dé corail. Les couleurs sont încriyabl'yes; par exempl'ye, lé pèrrot-paîsson est comme un arc-en-ciel, et l's autres sîmpliément d'un êcliatant bliu, pourpre, jaune ou rouoge auve les difféthentes mèrques.
Tchitch'uns d'meuthent souos les pliats corails, tandi qué d'autres, comme lé bouffon, d'meuthent dans les cons d'rotchi. Lé seurgien-paîsson mange lé corail tandi qué lé vra et lé biche-paîsson chèrchent la nouôrrituthe dans l'sablion, ouaithe qu'la raie à bliues taques reste là auvec seulement ses ièrs visibl'yes.
I'faut s'mêfier des pièrre-paîssons et des picot-paîssons pa'ce qu' i' sont hardi pouaîsonneux.
Châque arlévée, j'allions au d'ssus d'la droque parmi les bancs d'argents barracudas, les cheurques d'êtché et les bizarres marté-têtes, et les mangnifiques grandes aîgl'ye-raies.
La pus extraordinnaithe expéthience 'tait quand d'là-bas, deux tortues vîntent d'vant nous, et pis nagîtent douochement à côté d'nous en èrtouônnant lus têtes pouor nos r'garder. Don, j'nagînmes trantchil'yement envèrs ieux, attrapînmes lus grands vannieaux et j'feûnmes toués par-dessus d'la droque et l'înmense muthâle dé corail douochement pâssant en mé, comme deux ouaîsieaux au d'ssus des falaises. Lé monde souos-mathîn est vraîment încriyabl'ye et, j'crai, a bésoin dé notre protection.
Ralph Nichols, auve l'aîgue dé Laurie Huëlin
Viyiz étout: