Les vacances au Périgord sont plieinnes dé bieauté et fascinnâtion. La campangne est hardi belle et les veues sont mangnifiques auvec les pourpres vallées et blianches falaises. Ichîn, i' y'a des încriyabl'yes peintuthes dé Lascaux II qui sont les exactes copies des originnaux d'l'homme préhistorique, et d'autres caves auvec des înscriptions et les nivieaux d'habitâtion (comme La Cotte dé St Brélade).
Au bord d'la route i' y'a des cârriéthes auvec les fossiles des cruques et des corails du temps pâssé à côté des cliôsées d'blianc bestchias Charolais.
Étout, souos la tèrre, nou peut trouver, par baté, les caves plieinnes dé mangnifiques stalactites et stalagmites dé toutes sortes dé formes, dés cristaux et des p'tites mathes comme des mitheux.
En ville, i' y'a des musées d'la vie préhistorique et des boutiques dé fossiles et pièrres précieuses. Pouortant, la miyeu dêcouvèrte fut les villes fortifiées – les Bastides – et les vièrs châtchieaux (comme Lé Vièr Châté à Gouôrray) tchi restent en hardi bouonne condition, siex chents ans d'pis La Dgèrre dé Chent Ans.
Finnalement, la nouôrrituthe et les vîns - les m'nus variés du Terroir, dé paîssons d'riviéthe, dé poulets et étout d'cailles, et sans doute, d'cannards accompangnis par les vîns dé Pécharmant (Bergerac) et dé Cahors, tréjous un grand pliaîsi au solé couochant.
Ralph Nichols, auve l'aîgue dé Laurie Huëlin
Viyiz étout: