Tout p'tit qué j'sis, sait dit chut' fès,
J'ai en d'dans d'man p'tit dé
Asèz d'esprit pour pouvé vès
Ouêqu' lé mérit' sé vé!...

Si l'célèbr' Maît' Wac' 'tait, crai-mai,
Dans chu mond', bain en vie,
I-l-érait un 'tè-l-ordghis d'tai
Qu'i t'apél'rait "Man Fils !"

Osin, si grand qu'i fuss', tu n'ès
Pon eun' seul' mie pue p'tit:
I sembl' qu'tu-as 'tait nè exprès
Pour qu'i sait rempièchi.

Dans chain qué tu nos as donnè,
Ya d'tchai pour touots les goûts, -
Tout si bon, qu'ch'est dû d'dir' lé tchè
Morcé qu'est l'miyeu d'tous.

Quand j'liès tan 'Rtou du Terr'neuvi,
Jé n'sai pon tche qu' jé 'rsens....
Pour ch't'arimè', pèrmèt-mai, dis,
Qu'j'té baille eun' plieum' dé pans!

Si chlà n'té fait d'rain, noble èsfant,
Jé d'sir' qu'tu continue
D'être inspirè, coum' par enchant,
D'êcrir' dé pue en pue.

En t'saluant, j'mèts bain au d'fi
Touots les "pépins d'verjux,"
S'i pens'nt tchiqu' jour dé t'empêchi
Dé vivre octante ans d'pue!....

J(É). D(ÉCORE). R(OBERT).