|
Cliément! n'en v'là d'la chance! Y-en éza-t-i' d'la danse, De tiné sûs l'encllumme! Allumm' tân feu, allumme! Il est temps, mân fistaoûd, D'ramâssé tes martiaoûx! J'avon' un parchonnyi, Tchi s'en va nos aîdyi A forgi! J'en f'son'-t-i d'la mûsique Dans la vielle boutique! Car je s'sa frappe et frappe - Couozèz, ou j'vos attrape! - Yun', daeûx, treis! yun', daeûx, treis! Mais, dia! yun à la feis, - J'avon' un parchonnyi Tchi s'en vein nos aîdyit A forgi! Mân Cliément, ch'est mèrvèlle: Ta mînne si vèrmèlle, Et ta belle appazence! N'ou z'aimme ta présence; N'ou z-aimme à ouï ta vouais Partout, là où-é n'ou z-est! Mais i' faoût travaillyi - J'avon' un parchonnyi, Pour aîdyi! J'en f'son', heîn! de la b'souogne! Mais i faoûdra qu'n'ou souogne De forgi bein la rimme, Et pîs qué n'ou s'exprimme Cârrèment, mân Cliément! Et êcriz' polîment! Tu'en fais tréjous autant Malgrè tes nonante ans, Chu Printemps! Moussieu Rimaeûx, j'em gage, En f'sa, li, du tapage, Atou marté - et limme, Pour afigni ses rimmes! Il éza l'gros marté!! Le milouain s'sa pour té! Mé, tchi n'sîs qu'apprenti, Et des treîs l'pûs faîllyi, J'prends le p'tit! Un mot à Moussieu Jacque: - J'peux mèttre à ma câsaque La rôse! - Ch'est vous tchi l'dites. Criy-ous que je l'mézite? Ch'est vous, Moussieu Rimaeûx, Tch'ête un raidde motchaeûx! “N'y-a pon d'soin, Maît' Matcheu!” V'là ma main, v'là mân tcheu, D'pîs à ch't'heu!
Amicus |
Viyiz étout: