Quand i' geloque et nou-s'a à aller hors, i' n'y'a rein d'miyeu qué d's'enfliuber dans des cauds habits. Nou n'veurt pon attraper fraid et don i' vaut mett' des drâses thèrmales ou bein des longues drâses. Un corset d'oeuvre ou un blianchet vos gardétha caud et eune bouonne pathe dé braies – ch'est d'tchi nécessaithe.
Eune câsaque en tchui est tréjous c'mode et faichonnabl'ye – mais p't-êt' bein un brîn trop r'bêle pouor l'office. Eune cache-mînséthe couvritha tout d'charme.
N'oubliez pon des mitaines et eune êcharpe, mais pouor dé mé l'pus împortant ch'est un chapé – sustout s'ous avez eune pliainître ou la tête nue. Nou dit qu'nou pèrd la puspart d'la caleu du corps l'travèrs d'la tête – et si l'pot'-à-thée d'mande un chapé, il en s'sa d'même pouor eune pèrsonne à grénotter.
Les castchettes tchi gardent lé solé d's ièrs en Êté n'font rein pouor protégi la caboche en Hivé. L'mus quand i' gèle à pièrre fendre ch'est d'aver un chapé à ouothelles qu'nou peut d'cendre pouor caûffer l's ouïes.
Les chapieaux Russes en pé sont supèrbes pouor chenna, mais les Russes ont d'la hardgièche, valet, et siez ieux nou né d'cend pon l's ouothelles si la tempéthatuthe est acouo en d'ssus d'vîngt d'grés, ch'est en tchi mains vîngt d'grés souos zéro.
Nou peut acater des chapieaux pus ligièrs dans les boutiques tch'ont 'té teflonnés ou tchiquechose dé même à seule fîn d'vos garder au sé. Un bonnet d'laine en f'tha d'même – d'mandez ès brébis!
Nou n'peut pon c'mander l'temps, mais s'ou vos habilyiz coumme i' faut, ou s'sez quand même cauds coumme des mouossons!
Geraint Jennings
Viyiz étout: