Moussieu l'Editeu,
Dans les neuf heuthes l'autre sé, la Merrienne me d'mandit si j'avais liut la gâzette.
“Nânin,” j'l'y raiponnit. “J'éthais bein voulu, car quand oulle arrivit y'a un couplye d'heuthes ou pûs, tu la gaffit, et tu la tcheins ocquo dans tes pattes. Veur-tu m'dithe comment qu'j'éthais peut la lièthe? Mais tchèsqu'y y'a d'sûs tchi t'intérêsse?”
“J'm'en vais t'dithe,” ou raiponnit. “Ch'est l'rapport d'une réunion d'aubergistes en Ville tch'a décidé que l'Sieur Rumfitt est pour être la prechain Sénateur. As-tu jamais ouï une telle impértinence?”
J'allumit ma pipe, épis j'l'y dit: “Eh bein, Merrienne, quant à mé, j'n'ai autchune objéction au Député Rumfitt, car ch'n'est pas un mauvais corps, et y travaille bein du comme Président du Comité du Tourisme. J'aim'thais mûs l'vais Sénateur que plusieurs autres dans l's'Etats que j'pouôrrais nommé.”
“P't'être bein,” ou dit, “J' m'accorde les Députés d'la Ville, mais chein que j'voudrais savé ch'est si notre p'tit Jêrri s'en va s'laissi m'né par le néz quand y s'sa tchetchon d'nommé des candidats pour les Etats. Y m'semblye tch'ils ont assez d'toupé chutte dgaingue-là. N'y'a pas longtemps les Députés d'la Ville avaient voulu nommé lûs candidat pour une vacance, et tu sais bein tchèsqu'y y'arrivit, mais ach'teu ch'est l's'aubérgistes tch'y voudraient nos instruithe comment voté. Ouèsque j'allons, man pouôre Ph'lip?”
“Et,” ou continuit, “y'a pûs qu'chonna car quand veindra l s'sêléctions au S'tembre, ils ont idée d'en mettre tchitchuns d'yeux dans la Chambre. Si j'ne r'gardons pas à nous, y'étha bétôt de droles de gens parmi nos Sénateurs et Députés, et dans p'tit d'temps l's'auberges ne fémethont pas du tout, comme en France aut'fais. A ma veue ch'est une abominâtion.”
“Ne t'excite pas, Merrienne,” j'l'y dit “car tan tchoeur n'est pas trop raide, et l'docteu t'a dit de prendre les affaithes trantchillement.”
“Fiche du docteu,” ou dit. “J'm'en ithai quand m'n'heuthe veindra, et pas d'vant. Et si j'pouvais vais toutes les hotels et aubérges tchi y'a dans l'île brûlées j'm'en ïthais contente.”
“Tu n'est pas raisonablye, Merrienne,” j'l'y dit. “J'sais bein qu't'as tréjous tait contre la béthie, mais y'a ocquo d'bouonnes gens parmi l's'aubérgistes, et nou n'voudrait pas les vais ruinés. Ch'est lûs mêtchi, après tout, et y faut tch'y vivent.”
“J'pense bein,” ou dit, “mais avec ch'là ch'est un sale mêtchi, et tu n'me dithas pas qu'un homme réspectablye ne peut pas trouvé tchiquechose de miyeu à faithe. Mais, quand tu me r'proche d'avé tréjous tait contre la béthie ch'n'est pas tout-à-fait vrai. En modéthâtion, ch'n'est p't'être pas une si mauvaise chose, et j'ai bein des fais ouvert l'armouaithe quand tu t'pliaignais que tu n'te trouvais pas bein. Mé-même, j'avoue qu'par bordée un p'tit vêrre caud d'vant m'couochi en hivé, n'me fait d'ma. Mais j'ai tréjous dêtesté l'ivrogn'thie, et dans toute ma vie j'n'ai jamais entré dans une auberge, et mémée tait d'même étout.”
“Quant à té, Ph'lip,” ou continuit, “tu'ès r'venu pûs d'une fais quand tu'en avais yeu assez, mais ch'tait tréjous quand tu'avais trouvé d'la mauvaise compagnie, comme à une Assemblyiée d'Pâraisse ou un show d'bêtes. Et tu n'faisais pas d'brit, mais tu ramontais et t'couochais après que j't'avais aidgi à hallé tes bottes et tes brais.”
J'eut à souorithe. “Vèthe, Merrienne,” j'l'y dit, et quand je m's'y trouvé d'même tu m'as tréjous apporté une bouonne tâsse de tais au matin, quand ma pouôre tête câssait.”
“Bein seux,” ou dit, “mais avec chonna, y'avait étout un p'tit sérmon en dêjeunant.”
“Et je n'dîsais mot,” je m'fit, “car j'savais que je l'méthitais. Ach'teu, Merrienne, pour chais aubérgistes et lûs reunions, n'te gène pas un lérmin. Quand veindra le S'tembre les êlécteurs éthont assez d'bouon-sens pour voté accordant à lûs opinion, et non à l'opinion des aubérgistes ou autchune autre section d'la populâtion.”
Ph'lip.
1954
Viyiz étout: