Y'a ti tchiq'un d'entre vous qu'éthait besoin d'jougues? De bouonne fortes jougues en térrie, avec chatchun eunne hanne, et très bouchons – tout complete? J'les vendrais bouan marchi pour 'cash', ou en èschange dé tchiqchose d'utile: eunne demié douzaine de lapins, ou un violon de s'conde main, ou eunne grand casaque doubliée pour l'hivé, ou un côté d'lard funtchi. Enfin, j'les bazardéthais d'bouan tcheu pourvu qu'tchiq'un l's emportisse au pus vite.
J'les avais apportés de Hull, pliennes de biéthe, et j'comptais avé d'tchi m'dèsaltéthé pour au mains tchinze jours. Mais j'avais compté sans Laizé! Coumme v'la tchi s'arrive souvent siez nous: “L'houmme propose et la femme dispose” – mes neuf gallons d'bouonne litcheu n'ont servi qu'a enivré les rats dans les drains de la ville! V'la ch'que j'ai gagnyi d'mathié eunne good templeuse! Car, non seulment oul a prins serment de n'pon béthe de litcheu lyi même, mais sen serment l'oblyije ê – a ch'que j'en comprends – de n'pon en gardé dans ses armouethe.
Quand j'rentri d'Hull, eunne jougue a chaque main et l'autre pendue atouore du co ov un filain, ou voulut savé ch'que j'avais la. “De l'encre, que j'lis dit: ch'est eunne nouvelle sorte d'encre pour imprimé la gazette. Mets l'encre souos le d'gré.”
Ch'est a savé s'ou m'avisi quand j'allais la en d'sous en suppé un lirmin; trejous en est y que l'aut' jour, quand j'me faufilli douoch'ment pour en r'avé deux d'gouts – tout 'tait viedde! Quand j'lis d'mandi tchès que ch'la voulait dithe, ou m'rèspounni d'un p'tit air pinchi que coumme j'avais dit que ch'tait d'l'encre pour la machine, oul avait creu bin faithe de dithe ès imprimeurs de v'nin oté cheunna hort de sa vaie!
Tchès que j'pouais dithe? Quand j'en r'pâsli dans l'imprimthie, i' s'mintes tous a rithe et a m'èslourdé. Et pis i' m'dites que ch'tait d'bin bouonne biéthe, qu'nous avait bu a ma santé et chanté For 'ees a jolli good feller! et quand tchi j'tais en r'allant à Hull?
Tchès que j'pouais dithe? J'lus dit bin qu'y'avait yeu eunne p'tite mêprinze, et que j'comptais être au mains remboursé du prix d'la biéthe; mais i' s'èsgouffîtes tous a rithe, et j'en sis a supporté touos les frais tout seu.
Mais Laizé me r'vaudra chette la! J'n'ai pas oquo décidé tchi punition j'lis f'thait: mais j'm'en vais ruminé la d'sus, et tchiq'un d'chès jours y'etha du fonne siez nous.
Et pour en r'venin au c'menchment, j'ai très belles jougues d'èspeigne.
PITEUR PAIN.
27 July 1914
Viyiz étout: