D'pis l'temps que j'n'ai bailli d'ma becque dans chutte gazette
D'pis l'temps que j'n'ai bailli d'ma becque dans chutte gazette j'pense bein qu'il y en avait qui m'criyaient hors de chu monde de minsèthe et qui pensaient qu'la fin de chutte babillarde Marie Hibou était la paix pouor bein des gens.
Eh bein, à ces amins, salut, car j'n'sis pon encouore dans la bouaite à dominos, comme s'faisait l'autre jour l'boss qui ly a faille s'n'aller l'autre bord, à chein qui criyait pendant un temps. Quant à mé j'pensais bein qui s'en r'frait viyant que nous dit que les méchants restent. Ch'est d'antchi qui l'boss a des chances d'rester d's'années sus chutte grosse football qu'nous appelle la terre.
Achteu y faut que j'vos raconte tchiques p'tites scènes qui n'sont pon d's'histouèthes ni d'menteries car ch'est la pure, pliene et entièthe vérithèt, fouai de Marie Hibou.
* * *
Il y a tchique s'maines de chunna, Jane Revilletonnée, que je l'appellerons, s'en vint en ville couomme de coutume pouor acater des provisions et un tas de tchi couomme il en faut tréjous pouor la maison.
Y faut que j'vos dise que Jane a été jeune chein qui veut dithe qu'oulle n'est pus d'prumièthe jeunesse mais oulle est moins endormie que son buanhomme.
Donc Jane était chargie de touotes sortes de patchèts quand touot à coup oulle failli laissi touot tchais. Support de ma vie! qu'oulle s'fit, j'sis seur que ch'est Frainque!
Frainque s'touorni et à son touor s'fit: Du diantre si ch'est pas té, Jane! Tchès que tu deviens acheteu?
Touos deux étaient dans la jouaie de se revoir car il y avait d's'années que Frainque n'tait pon v'nu en Jerri et pus d'une fais Jane s'tait d'mandée tchès qu'était devenu de Frainque, l'sien qu'oulle avait l'mus aimé de ses galants.
Donc, Jane raconti qu'oulle tait marthiée avec Phlip Gorgesec, un vièrr qui tait resti à s'cauffer oprès du feu et n'sortait en ville que les trente six du mais pouor ainsi dithe, mais couomme il la laissait faithe couomme oulle voulait n'v'la qui marchait assez bein. Puis, Jane, touot d'un coup ieut une idée. Oulle d'mandi à Frainque s'il lui en était d'rein de v'nir jusqu'à la maison pouor faithe connaissance avec l'buanhomme. L'autre réponnit qu'il irait avec plaisi et d'pis qu'il y avait des buses qui passaient près la maison n'v'la qui l'arrangerai magnifique pouor s'en r'venir en ville.
D'vant d'monter dans la bus, Jane alli acater une bouteille de litcheur, de tchi fort mais pon trop couoteux. Oulle dit à Frainque: Tu t'en vas prendre chutte bouteille de litcheur et tu diras au buanhomme que tu l'as acatée à s'en'intention. N'v'la qui ly f'ra plaisi.
N'v'la nos gens arrivés et à s'n'entrée dans la maison Jane raconti au buanhomme qu'oulle avait ramené un vièrr amin, un couosin à la mode de Bretagne, bein seur - qui avait été hors Jerri d'pis quassiment dièz ans.
Et Frainque chaqui d'main avec l'buanhomme et tandis que Jane était otchupée nos deux hommes d'visèrent. Au but d'un p'tit temps, Frainque déshalli la bouteille de litcheur de sa pouchette pouor en offrir un lermin au buanhomme.
Et pis le lermin d'vint un buan tumbler. Enfin, l'buanhomme s'endormi dans sa grande tchaise.
Faut craithe que ch'tait la fraid de la nièt qui r'véveillit, toujours est y que quand Jane était à fricachi une steak, l'buanhomme d'mandi tchès que chunna voulait dithe d'être à fricachi à dithèt heuthe.
Jane ly réponni qu'il avait la berlue pouor craithe qu'il tait pus de manièth car ch'tait son soupé qu'oulle tait à tchuire. Et oulle happi la bouteille de litcheur, ly disant: N'v'chein deux d'gouts pouor vos r'cauffer.
L'buanhomme s'laissi faithe et chinq minutes oprès y ronfliait couomme l'engin à Mess Le Capelain.
Quand Jane s'en r'vint trouver s'n'amin Frainque, oulle s'fit: Achteu que l'buanhomme en a suppé pus qui n'peux porter, j'allons pouver fricotter à notre touot seu.
Et ch'est sus un lorry qui portait du lait en ville que Frainque rentri, viyant qu'il y avait trop à attendre pouor la prumièthe bus du matin. Couomme la bouteille de litcheur était viède, p't'être que l'buanhomme aurait voulu en saver un p'tit pus long et n'aurait pon été si aisi à endouormir, pensi notre Frainque et ch'est d'antchi qu'y sorti quand les coqs du vaisiné couommençaient à chanter!
Chein que j'viens d'vos raconter n'est pon des menteries. Bé seur que notre Jane n's'appelle pon en touot. Révilletonnée ni son buanhomme Gorgesec mais nos gens sont en Jerri et d'pis chutte affaithe ils ont ieu quique hertchin ensemble, l'buanhomme voulant discréditer sa Missis vu qu'il a apprins que chutte bouteille de litcheur avait été payie avec ses sous!
Et dans tchi paraisse que chunna s'passi? Chunna n'v'la qui vos ergarde pon en touot et j'aimerais mus aver la langue arrachie que d'vos l'dithe.
* * *
ST. OUENNAIS.- Ch'est alright, j'en ai oui d'pus d'une sorte, mais n'v'là qui s'ra pouor la préchaine fait qu'nous mettra mes d'vis dans la gazette.
Caouain
1929
Viyiz étout: