J'taimes toute eunne djingue de nous a buzardé en attendant l'heuthe de s'met en travas sus la gazette. L's'uns p'teunaient - ch'est sévéthment d'fendu - d'autre brinottaient d'la galette, tchq'uns des apprentis 'taient a s'ent jouôté des balles de papi par la tête, et deus-très d'nous, touos péthes de famille et payant rât, 'taient a dvisé sus difféthentes choses. Nou pâsli d's'Assises; et les siens qu'avaient 'té du Juri, dans l'temps pâslites des difféthents cas sus tchi i's avaient siejo.
J'mé souvains d'la bordé, qu'dit Mess Hueulin, que j'fut applé pour l'affaithe du fermi qu'etait atchuzé d'avé mins d'la creme dans san lait - ch'tait un cas pendablye dans chu temps là. L'affaithe fit du brit. L'Avocat Général pâsli pus d'eunne heuthe, et fit tout ch'qui put pour nos convaincre qu'un fermi qui pouait s'abaissi a faithe ditet devthait être forbanni pour le mains. L'Avocat d'la d'fense: ch'tait un long maigre qui soulait s'faithe râzé touos les Mêcrédis par un p'tit court barbi qui t'nait boutique a la carre d'eunne rue - tout l'monde l'a connu. eh bin! L'Avocat d'la d'fense n'ês prouvi pon a prouvé qu'ché n'tait pas vrai - y'avait trop d'preuves. Mais i' fit passé san fermi pour faiblye d'ésprit! Et i' en gâgnyi: J'clierjimes san client.
Quand vint man tou d'pâslé, j'lus conti la bordée que j'fu du Juri quand i' fallait décidé tchès qu'en 'tait d'un houmme atchusé d'avé èsmaglyi sa belle-méthe ov eunne scabelle. I' fut prouvé qu'chu pouore médjan n'avait mot a dithe siez li; que ch'tait la belle-méthe qui portait les braies, qui c'mandait partout, qu'avait la bourse en main, et, que pardessus ch'la, ou picanniait tout la bénite journée.
Ch'n'est pas eunne raison pour achouêmi les gens a coups des scabelle, s'fit l'Avocat d'la d'fense. Mé même, qui dit, j'ai souvent a m'pliendre d'la méthe de ma femme, mais jommais i n'm'est v'nu a l'idée d'èsgliémmi la bouonne-femme; je m'contente de lis fliantchi un couossin d'sofa par la tête quand ou fait minne de voulé quétillyi.
Quand ch'fut fini d'pliédji, et qu'j'eumes délibéthé chinq minutes je r'sortimes unanimes avec le verdict: “Coupabye, mais tout l'monde en éthait fait autant a sa pliéche.” L'Ballyi d'chu temps là dit qui n'pouait pon accepté un 'tait Verdict, et nos renvyi r'considéthé. Je r'considéthimes pour chinq minutes, et pis j'rentrimes en Cour avec “Non coupabye” - touos unanimes. Si jommais ous avez veu un Baillyi d'eunne humeur de tchan, ch'fut ch'tis-la. I' nos traiti d'buzards, d'achocres, d'enfuntchis; et pâsli d'mêpris d'Cour, et je n'sai tchi. Mais je stitchimes a not' verdict, et l'bouonhoumme en sorti les braies nettes.
Mais no v'la l'suffliét qui sufflye, la machine qui s'met a ronflié, et ch'fut fini de tchétté pour la séthée.
Viyiz étout: