"Chein tch'il a dans la tête, i' n'l'a pon ailleurs, ch't'îlà!" s'fit Mêrayeu l'aut'sé.
"Lé tché, m'mèe? "Françouais li d'mandit:
"Tan p'pèe!" sa m'mèe lî rêponnit.
"Bon! Tch'êqu'il a fait, chutte fais?" Douard lî d'mandit:
"Ch'est chein tch'i' n'a pon fait, tchi m'embête!" sa m'mèe lî rêponnit: "J'lî-avais d'mandé d'aller en ville vaie s'i' l'y-a mouoyain d'acater ieune dé ches machinnes-là qu'nou-s appelle "Télévîsion!"
"Pourtchi qu'tu n'e d'mandes pon à m'n'onclye George dé t'en envyer ieune dé l'Améthique, m'mèe?" lé p'tit lî dît!
"Mêrayeu!" j'lî dis: "Tu sai bein qué j'n'avons pon bésouain d'ité dans la maiethon! J'avons l'radio, et tu n'pouorrais pas aver les deux en allant en même temps!"
"Eh bein!" m'dît Mêrayeu: "Nou peut tréjous vendre lé radio! La télévîsion nouos don'na la mème chose, sénon qu'nou vèrra l's'artistes jouer et chanter!"
"Quant à mé," j'lî dis: "J'aime mus les ouï qué d'les vaie! Crai-tu qué j'veur pèrdre mes séthées à r'garder tchique hardelle faithe des morgaches et la ouï chanter en mème temps? Quant i' chantent un opéra, par exempl'ye, il' ouvrent la bec si grande pour aveindre les hautes notes qué nou n'vait qu'eune bouoche et des dents dans la télévîsion! A m'n' idée, ch'est bein pus pliaisant d'les ouï sans aver à les r'garder!"
"Eh bein!" Mêrayeu m'dit: "J'ai m'n'opinion étout, mé! J'avons un tas d'anmîns hors pays, et i' n'l'léthait qu'à lus êcrithe d'aller d'vant ieune dé ches machinnes-là, iou tch'i' d'meuthent, et nou les vèrrait ichîn! Ou bein, i' pouorraient p't'êt' en acater ieune ieux-mèmes. Dans chu cas-là, nou pouorrai s'entr'pâler l'travèrs dé la machinne et nou s'vèrrait en mème temps!"
"Ma pouorre femme!" j'lî dis: "Ch'n'est pon d'mème qué ch'la s'fait!"
"Tch'êque't'y connais, té?" ou' m'dît: "En as-tu veu, d'ches machinnes-là?"
"Mais oui, j'en ai veu!" j'lî dis: "J'en ai veu eune racachie en Améthique!"
"Quand j'tais là-bas, l'y-en avait tant qué j'tais au point qué j'prenais bouan souain d'aller pas siez les gens tch'en avaient! A la pliaiche dé bailli d'sa bec entouor' le saiethons d'tonmates et d'patates come j'faiethons en Jèrri, les gens s'assiévent à r'garder chutte fichue télévîsion-là toute la séthée, et n'l'y'a pas mouoyain d'lus èrachi eune patholle du corps! Et pis, étout, la télévîsion vouos montre un tas d'bêtin qu'nou n'a p't'êt' pon envie d'vaie. Dans des temps nou n'y connaît ni bliu ni blianc!"
"Eune fais, j'eus à passer la séthée à r'garder eune femme montrer et explyitchi au monde comment faithe d'la gâche. V'la tchi m'fit l'sang bouolli dans l'corps, vivyant qué l's'Améthitchaines né peuvent pon seulemen faithe des mèrvelles, sans pâler d'gâche! Eune séthée d'temps, j'eus à r'garder deux grecs lus entr'tchulbuter, - et eune aut' séthée, j'eus à vaie et êcouter tchique drînette chantonner un tas d'niolîn dans un café-chantant. Oulle avait eune vouaix racl'ye, man bouan'homme, et quant ou' n'chantait pon ou' sé m'tait à cac'ter tchique bêtin entouor' l'amour tchi l'empêchait d'dormi la niet! Sans doute, les jannes gens en Améthique, tchi n'ont janmais ouï l'Jèrriais, craient qu'ch'est bé, ieux! S'i' ch'avait 'té eune bouanne chanson comme "Auprés dé ma blonde!" qué man papa soulait canter acouo! Mais, la tèrribl'ye chose 'tait d'aver à vaie chutte hardelle-là! Sus l'radio, nou-s éthait au mains êvité ch'la! Oulle 'tait peinte et poudrée et drôlement attîntée, et ou' cac'tait comme eune pie dènichie!"
"Pour dé mé, jé n'veur pon d'télévîsion dans la maiethon! Pas acouo tréjous. J'crai, mé, qué dans disions dgiêx ans d'ichîn, v'la tch'étha rempliaichi l'cinnéma. Quand chu temps-là veindra, la télévîsion vaudra la peine d'aver!"
George d'La Forge
1/1951
Viyiz étout: