Nos r'v'chîn au mais d'Novembre (ou coumme nou soulait dithe, Névembre) et nou-s'appréche d'la Fête dé Noué. Y'a etout au mais d'Novembre, la Séthée d'Guy Fawkes, les Séthées Jèrriaises dé l'Eisteddfod, et la Saint André. Mais coumme les longues néthes séthées nos gardent par dédans à l'entou d'l'âtre - ou nos attrioquent pus à co dans les bars et l's aubèrges, ou ès clobes dé niet ou au cinnéma - nou c'menche à penser à la boutiqu'sie d'Noué. Tchi niv'lot'ties qu'j'allons acater? Et tch'est qu'i' y'a d'nouvé dans les boutiques?
N'y'a rein d'nouvé souos l'touônnement du solé, mais les compangnies d'technologies et les fabritchants d'jouettes sembl'yent tréjous nos offri dé tchi neu à chutte saîson-chîn. La technologie avanche, et chu mais j'avons un changement dans la télévision. J'avons la souiqu'thie à la télé digitale, v'là tch'êmoûque l'acat d'boêtes dé convèrsion et d'nouvelles télévisions. Et ch'est l'dgiêx-sept d'Novembre qu'lé sîngna d'télé traditionnelle s'en va êt' souitchie hors. Pouor dé mé, ch'n'est pon si l'sîngna est amendé; i' faut vaie si les progranmes s'sont miyeurs en digita.
S'nou-s'est à boutitchi dans l'Neu C'mîn, et à pâsser par où'est qu'la vielle maîson a 'té quâsiment r'nouv'lée par l'National Trust dé Jèrri, ou dans la Rue d'Driéthe ou la Rue du Mitan, ou les nouvelles boutiques dans l'vièr abattouaithe, nou dêfouitha tréjous dé tchi neu. À chutte saîson-chîn, coumme lé temps est à s'èrfraidgi auprès un bouon P'tit Êté, ch'est des neu habits tchi nos faut, et même les diffitchultés êcononmiques n'pouôrront pon entout dêcouothagi la dêpens'sie d'sou dans les boutiques. Et auprès la Dgiêxaine-Fête (chein tch'est au jour d'aniet pus à co eune Tchînzaine-Fête), nou s'apprête à des dînnièrs et partis d'Noué.
Épis ché s'sa bétôt l'Nouvel An - ch'est un bieau boulais qu'en ava!
Geraint Jennings
Viyiz étout: