San Antonio, Texas,
U.S.A
Le 14 févri, 1970.
Moussieu l'Rédacteu,
Dans ma lettre du trais d'janvyi, j'disais qu'la fin d'l'année 1969 avait 'té la fin pour un tas, d'mes anmîns étout. La preunmié chose qué j'avais fait en arrivant en Jèrri (lé 22 d'mai) 'tait d'aller à l'entèrrement d'un vier anmîn, lé Juge Francis Le Boutilyi, et j'avais finni par aller à huit ou neuf entèrrements d'vant m'en r'vénîn en Améthique lé preunmyi d'novembre! Et né v'la la veuve du Juge Francis Lé Boutilyi - née Eunice Collas de Caën - au r'pos êtèrnel sept mais auprès l'décès dé s'n homme. Jé n'pouvais pon en r'vénîn quand j'ai veu san décès dans la gâzette du 24 dézembre, tchi veint d'arriver !
Ou n'tait pon des pus robustes l'êté passé mais ch'la n'tait pon drôle quand nou pense qu'oulle avait subi eune opéthâtion et qu'oulle 'tait acouo à l'hôpita au moment qué s'n homme tait au suaithe, mais je n'attendais dgéthe qué ch'tait la dreine fais qu'j'allais la vaie quand j'allînmes lî dithe “À la préchaine”, man fréthe Fraînque et mé, d'vant nouos en r'vénîn en Améthique.
Madanme Eunice Lé Boutilyi 'tait eune charmante danme. Eune vielle Jèrriaise dans l'âme. oulle avait eune supèrbe mémouaithe et ch'tait un pliaîsi d'lî pâler du temps passé. Oulle avait 'té un pilyi d'appias pour sén homme tout l'travèrs dé sa distîndgie carriéthe politique, mais ou n'avait pon un brîn d'ordgi - et ou n'éthait seu faithe dé san tchian ouaithe qu'oulle avait ieu l'honneu d'pâler à Sa Majesté la Reine pus d'eune fais quand l'Juge 'tait président du Conmité des Havres et Chaussées et d'La Sociêté Rouoyale. J'tais à li'en pâler un jour l'êté passé, d'ses convèrsâtions auve La Reine, et ou m'dit: “Eh bein, un tas d'monde éthaient probabliément aimé être à ma pliaiche quand j'tais à lî pâler, a La Reine, mais pour mé ch'tait eune tâche. J'tais nèrveuse comme tout et j'avais peux d'faithe un faux pas car nou n'est pon supposés d'entanmer ni tchestchion ni convèrsâtion sé-même en présence dé la rouoyauté. Mais j'peux dithe qué La Reine est charmante, et l'souori sus sa fache est si doux qu'nou s'trouve un mio à s'n aise quand ou vouos pâle qué j'n'éthais ôsé penser. J'tais quand-mème contente quand ch'tait tout finni et qu'nou pouver s'en r'aller trantchilement siez sé!”
Acouo un aut' mio du vraie Jèrri d'aut' fais a dispathu auve lé décès d'Madanme Eunice Lé Boutilyi, et i' donne la fîn au chapitre d'beinv'nue, d'hospitalité et d'révilyon tchi vous attendait tréjous à Highfield à Vînchelez quand l'Juge 'tait Connêtabl'ye d'St Ouën et tch'il taient dans lus prînme, li et sa danme, duthant la tchînzaine et tchiques années tchi suivîdrent la fîn d'l'otchupâtion.
Ou-s-allez p't êt' penser qué j'saute du coq à l'âne, mais i' n'faut pon qué j'pâle tréjous des morts, et y'a d'aut'choses qué les décès dans la gâzette. J'tais content d'vaie qué L's Êtats ont nommé les présidents des conmités et qu'iun d'ieux est l'Député P. M. de Veulle - un moussieu qu'j'admithe hardi pour sén întelligence, ses viages partout l'monde quand i' travaillait en Angliétèrre et sa capacité pour lé travas, mais par-dessus tout viyant tch'il est vièr Jèrriais dans l'âme et tch 'i' n'a pon oublyiyé la langue dé ses anchêtres!
En liêsant les montants des sou votés dans L's Êtats pour choses et autres, jé n'peux pon sénon êt' êtonné d'vaie la difféthence entre les vièrs temps et à ch't heu, et v'la tchi m'cèrtifie qué l'temps passé est mort étout! Par exempl'ye, aver à payi un louage dé siex chent chînquante louis par an pour eune office pour lé deuxième Juge dé La P'tite Cour! V'la tchi m'ramémouaithe lé temps du Juge Vaudin tchi présidait chutte cour-là quand j'tais Commis-Vicomte. J'sis seux tch'i' n'èrchevait pon chu montant-là comme Juge salarié, sans pâler d'aver eune office à li-mème et d's offices pour un “staff”. Les r'cords dé la cour 'taient gardés par lé Commis-Greffyi et i' faîsait l'travas tout seu. Lé Juge Vaudin n'avait pon d'office à part du p'tit apparteinement driéthe la cour, où'est tch'i' gardait sa rouoge robe. Dans chu temps-là, les Commis-Vicomte et Commis-Dénonciateur n'èrchévaient pon d'salaithes fixe. Il' avaient drouait à eune commission dé chînq ou dgix du chent (jé n'm'ersouveins pon létché des deux) sus l's amendes împosées par lé Juge dé La Cour dé Police Correctionnelle.
Si ch'tait à cht heu, dgix du chent sus l's amendes qué les Juges donnent dans chutte cour-là vaudrait la peine d'èrchéver, mais dans l'temps du Juge Vaudin ché n'tait pon grand' chose. I' n'y avait pon l'quart du vol et du crînme dans chu temps-là qu'nou vait d'nouos jours, et les crînminnels n'étaient pon poulotés comme i' l'sont à ch't heu. I' n'y avait pon telle chose comme dé payi eune amende au taux dé tant par sémaine. Ch'tait paiement d'l'amende sus l'coup ou aller en prison!
J'allons-t-i' janmais r'vaie la trantchillité d'la vie et la discipline dé chu temps-là?
George d'La Forge
Viyiz étout: