Fallbrook,
Lé 7 d'avri, 1984.
California, USA.
Hélas! I' pathaît y'aver du troubl'ye quasi partout l'monde ches jours, tchi sont supposés êt' êcliaithis par l'êducation modèrne et mondiale. Mais ch'est la dispute et la dgèrre à la pliaiche dé la paix du Bouân Dgieu, tchi, comme nouos l'dit La Litourgie, "surpasse tout entendement". En Améthique, j'avons fait des coups d'alfaure en viageant à la leune et marchi d'ssus, et j'avons bâti un avion tchi viage dans l'espace et r'veint à tèrre sus ses rouelles comme un avion ordinnaithe. Mais j'avons tellement haûchi les gages dé nouos travailleurs qué d'aut' pays produisent l'acier, des motos et aut' affaithes à miyeu marchi qu'nous. Nouos politiciens, affanmés pour les vouaix des syndicats d'travailleurs en temps d'êlections, ont peux d'mentionner ch'là comme étant en grand' partie la raîson qu' ch'est des motos fabritchis à l'êtrangi tch'encombrent nouos belles grandes routes.
Les crînmes, et sustout les meurtres, en gângnent touos l's ans. Nouos prisons sont si plieines qué l's autorités sont forchis d'laîssi des prisonnièrs (probabliément les cheins condamnés à cause dé maîndres délits) sorti d'vant qu' lus temps s'sait finni. Et la peine dé mort a 'té restaûrée dans plusieurs êtats.
La gâzette "Christian Science Monitor" du 14 dé mar nouos dit tch'i' y'avait 455 prisons en Améthique à la fin d'1983, et tch'i' sont en train d'en bâti acouo 200 d'urgence. Sans doute, i' n'faut pon oublier qu'j'avons eune populâtion dé 233 millions, mais ch'est quand-même un tas d'prisons.
Un tas d'monde pathaîssent craindre la possibilité, si pon même la probabilité, d'eune dgèrre nucléaire. Ch'n'est pon ravissant quand nou rêalise qué telle tragédie pouôrrait êt' la fîn d'nouot civilisâtion. Mais un arrêt de construction n'est pon d'sithabl'ye pour nous, viyant qué v'là tchi nouos laîss'sait bein en bas d'l'êtchelle sans espéthance d'y r'miédgi. L'idéal es'sait qué touos les pays nucléaires abolissent les armes tout à fait.
Eune aut' chose èrmèrquabl'ye est qué l'Mahométisme en gângne et qu' nouos Églyises Chrêtchiennes en pèrdent. Lé bonheu et la valeu d'la vie disciplinnée des vièrs temps ont dispathu. Où'est tch'est l'temps qué ch'tait considéthé honteux dé r'chéver d'l'aîgue et d'êt' "sus la pâraisse", comme nouos anciens disaient? A ch't heu, les louaix ichîn sont telles qu' eune pèrsonne tch'est mînse bas èrchait dans les 80 pour chent d'ses gages sans travailli, et y'en a tchi n'lus gênent pon d'trouver du travas quandi qu' v'là tchi duthe.
Tout est boulevèrsé. Nouos couochons (respé) n'veulent pus d'chours, et les poules chantent en co. Quand un Président ou Preunmié Minnistre êprouve à corrigi ou amender l's affaithes il est assailli par lé parti politique tch'est l'opposition dé s'n administrâtion et tchi promet la leune à tout l'monde pour gângni la préchaine êlection.
Tout fonctionne par l'êlectricité à ch'teu, et pour en faithe i' faut d'l'huile. La peux d'pèrdre la souche dé l'huile et l'pâssage dé la mé par ioù qu'les batchieaux tchi la porte naviguent, met les pays sus lus nèrs et quâsi prêts à chèrgi les canons d'lus frégates.
Nou m'dit souvent "Voudrais-tu r'tchuler à la duthe vie du temps jadis?" Y'a l'pour et l'contre. Mais à m'n idée nou n'èrvèrra janmais la sîmplyicité d'la vie qu' j'ai connue au c'menchement d'chu sièclye. Eune vie sans êlectricité, motos ou avions. I' fallait faithe sèrvi ses pids d'driéthe ou un j'va pour aller ichîn et là. Pus tard, la bicylette aîdgit à mouvementer la vie un mio. J'm'èrsouveins d'la machinne appelée "penny farthing" , tch'avait eune grande' rouelle en d'vant et eune toute pétite en driéthe.
Dans chu temps-là les travailleurs 'taient conscientieux et avaient du respé pour lus maîtres. En tchittant l'êcole, les jannes apprennaient eune vocâtion. Lé grand d'la fanmil'ye, futur héthitchi, restait à fèrmer. L's aut' lus en allaient en mé, à La Côte, à Tèrre-Neuve ou en Australie et La Nouvelle Zélande. Ch'tait eune activité tchi rempliaichait l'camas d'la vie mouvementée d'au jour d'aniet.
I' n'y'avait pon l'crînme et la mauvaîtchi par les c'mîns tch'encombrent nouos cours dé justice à ch't heu.
J'voudrais r'vaie l'temps qué l's anciens n'avaient pon d'peux d'dithe la priéthe dévant les r'pas et en lus couochant, et tchi faîsaient lus êfants aller à l'Êcole du Dînmanche. Et qu'les jannes hommes allaient r'condithe les jannes filles à la sortie d'l'églyise, et qu'les femmes allaient à l'églyise lus faithe èrléver auprès la naîssance dé lus êfants.
Enfîn, nou n'peut pon r'vivre l'temps pâssé, et i' faut aver bouanne espéthance pour lé temps à v'nîn.
Viyiz étout: