Trenton, Michigan,
U.S.A.
Lé 11 dé dézembre, 1976.
Moussieu l'Rédacteu,
Quand j'tais à liéthe les gâzettes d'Angliétèrre Dînmanche pâssé j'mé d'mandais si l'pays s'èrmet'tait janmais sus ses pids. Nou n'sait janmais tch'est tchi vouos pend sus la tête, mais y'a eune chose tch'est cèrtaine - i' y'a bésoin d'un r'miède. I' n'faut pon oublier qué l's Angliais ont ieu d's êpreuves, mais pourtchi qu' lus gouvèrnément d'à ch't heu fut êlu? Ch'est bein aîsi dé d'vînner. Lé fanmeux bouanhomme Moussieu Churchill dît au monde tch'i' n'avait rein à lus ouffri qu des lèrmes et du travas pour les r'mett' sus lus pids d'driéthe, et l'parti ouvriyi promînt ès êlecteurs dé lus donner la leune et eune vie aîsie auve un tas d'sou à rein n'faithe. J'pense bein qu' les gens, êbahis par la dgèrre, criyaient chu niolîn-là.
À m'n idée, i' n'est pon nécessaithe d'aver des p'tits boudîns dans la tête pour saver tch'i' n'y'a qu' un r'miède pour dêhaler l'Angliétèrre du pité dans tchi qu' ou s'trouve à ch't heu. Ch'est l'travas! Eune heuthe dé travas pour une heuthe dé gages! Ch'est d'laîssi les grands d'îndustrie faithe sèrvi d'lus profit pour dêvelopper et agrandi lus conmèrce à la pliaiche dé les taxer à mort pour bailli des sou ès cheins tchi n'font rein sénon empêchi les travailleurs dé faithe eune bouanne heuthe dé travas pour eune heuthe dé gages.
Henry Ford, en Améthique, prouvit qué tant pus qu' nou peut fabritchi ou produithe dans p'tit d'temps, tant pus qu' nou peut vendre à miyeu marchi et payi d'hauts gages en même temps, car un ch'lîn d'profit par articl'ye sus chent mille articl'yes vaut mus qu' dgiex ch'lîns par articl'ye sus mille articl'yes.
Lé gouvèrnément tch'il ont à Londres à ch't heu crait qu' la manniéthe dé prospéther est d'êt' propriêtaithe dé l'îndustrie du pays. Il a 'té prouvé des fais sans nombre qu'un gouvèrnément n'peut pon faithe dé sou en conmèrce.
L'êvangile dé ches mêssieux du parti ouvriyi est tch'i' faut haler les sou des cheins tch'en ont pour les bailli ès cheins tchi n'en ont pon. I' faut l'êgalité. I' faut qu'un failli ou pièrcheux travailleux r'chéve les mêmes gages comme lé bouan travailleux ouaithe tch'i' n'les gângne pon. V'la tch'îthait bein si tout l'monde 'taient êgals, mais la seule chose tch'est êgale parmi touos les gens est tch'i' sont mîns au monde sans eune quémînse sus l'dos. Quand i' veinnent à grandi, ch'est eune aut' chanson. I' y'en a des forts et des faibl'yes, des malîns et des niaûmîns, des au-faits et des achocres. Y'en a tchi sauvent lus sou et d'aut' tchi les dêpensent. Et y'a d's ivrouangnes et des sobres. Y'en a tchi sont av'nants et d'aut' tchi sont roupilleurs. Y'en a tchi sont r'mèrciants d'chein tch'il ont à mangi et d'aut tchi sont haînitcheurs et tchi veulent lus pain beurré des deux côtés. Y'a l'chein tch'est réligieux et l'aut' tchi n'crait ni à Dgieu ni à dgiâbl'ye. I' y'en a d'toutes les sortes, et il en faut d'toutes les sortes pour faithe un monde.
Si nou m'ttait touos les sou tch'i' y'a dans l'monde dans eune pile et qu' nou donn'nait eune châre êgale à toutes les pèrsonnes du monde ch't' arlévée, hommes, femmes et êfants, ch'est seux qu' la s'maine tchi veint y'en éthait dêjà tch'en éthaient pus qu' d'autres. Ch'est en tchi les pauvres ess'sont tréjous auve nous. La Bibl'ye, êcrite dépis quâsi deux mille ans, nouos l'dit. Et nou n'peut pon enrichi un publyi.
Pour prospéther i' faut travailli. Nouos anchêtres travaillaient septante heuthes ou pus la s'maine pour dgiex-huit à vîngt ch'lîns. Ou pouvez rithe, bouannes gens, et m'dithe tch'il' 'taient chagornes dé travailli d'même, mais j'm'en vais vouos dithe tchiquechose qu' ou n'savez p't-êt' pon - il' 'taient pus riche qu'un tas d'vous auve vouos hauts gages d'aniet. S'ou n'mé criyiz pon, êprouvez à êl'ver et maint'nîn les fanmil'yes dé neuf, dgix et douze êfants qu' ches vièrs-là avaient et êl'vaient sans êt' sus la pâraisse!
Quand l's Angliais éthont l'avis d'mett' des gens tchi lus y connaîssent à les gouvèrner, et qu' tout l'monde s'y mett' à forche dé bouan tchoeu à la pliaiche d'êprouver à vaie tch'est tch'i' peut êrachi l'pus d'sou en faîsant l'mains d'travas, i' pouôrront r'mett' lus pays à la tête des nâtions!
J'êcrivis chutte lettre, quâsi mot pour mot, ès “Chroniques de Jersey” lé 16 d'août, 1947, et en la r'liêsant i' m'est v'nu à l'idée d'la r'produithe aniet viyant qu' ou m'pathaît acouo si à propos vîngt-neuv ans pus tard!
George d'la Forge
Viyiz étout: