Les Pages Jèrriaises

Ch'est la mauvaîtchi tchi sort!

Le Ménage ès Feuvres,
St. Ouën.

Lé 7 dé septembre, 1968.

Moussieu l'Rédacteu,

Tch'est qu'les jannes d'à ch't heu ont dans la couënne? Nou n'vait qu'des accomptes dé lus dros dans la gâzette! L'aut' sé, eune bande dé ches malfaiteurs-là - car i' n'sont qu'des malfaiteurs - poussîdrent les hauts-mus d'eune bouanne londgieu d'muthâle à L'Êta dans l'canné et l'clios à côté. Y'a d'ches pièrres-là tchi pèsent entre deux et trais chents livres; ch'est en tchi v'la tchi fut fait auve la malice dans l'esprit, et pon par accident, car i' fallait un coup d'alfaure pour dêgagi et tchulbuter les pièrres. Pouv'ous m'dithe, bouannes gens, tchi sorte d'pliaîsi qu'des gens peuvent trouver à faithe d'ité mêche? Auve le couôtage dé la main d'oeuvre d'aujourd'anièt, ch'est eune affaithe dé p't êt' eune chînquantaine dé louis pour les r'mett' en pliaiche et les r'machonner!

L'aut' sémaine, ch'tait des d'gâts ès Tchenn'vais à St. Brélade. Quand nou liet ch'la dans la gâzette i' nouos est tréjous dit qu'la police s'en va s'en entchêter, mais tch'est qu'ou' peut en faithe, la police? Les mauvais sujets tchi lus abûsent à faithe lé ma n's'en vont pon lus présenter siez l'Chent'nyi et avouer lus fautes! Nou liet mème qué les bouëtes pour les pauvres et aut' offrandes dans l's églyises ont les portes forchies et l'cont'nu volé. S'i' y'a d'tchi honteux, ch'est la vol'lie des sou dêdiés au sèrvice du Bouan Dgieu!

Ch'n'est pon seulement en Jèrri qu'les jannes gens font l'ma. Nou liet qu'en Angliétèrre des bandes dé tchèrnaches en moto-cyclettes s'organnîsent à Londres et vont dans les villes lé long d'la mé où'est qu'des gens d'campangne veinnent dé touos côtés pour jouï des grèves et d'la mé et y font des d'gâts abominnabl'yes.

Ch'est d'mème en Améthique étout. Là, ch'est pûtôt dans l's êcoles. Des bandes dé jannes malfaiteurs entrent d'dans et saccagent tout ch'tch'i' peuvent mett' la main d'ssus, êcritouaithes, livres, armouaithes, f'n'êtres et meubl'yes généralement, et tout est fliantchi en mios à dgi l'adèrt dans l'aithe dé chaque salle dé clâsse.

Tch'est qu'nou peut faithe pour empêchi tout chu saccage-là? Y'en a tchi dîsent qué la police dév'thait l's arrêter, et qué l'juge dév'thait les punni pus sévéthement, mais nou n'peut pon bliaûmer la police. Ou' fait d'san mus, mais ou' n'est pon assez nombreuse pour pouver dgetter toutes les rues et touos les bâtisses la niet. Et souvent des gens tch'en ont veu tchiquechose n'aiment pon dithe rein viyant tch'i' n'veulent pon aver à aller têmouangni à la cour. À m'n idée, la bouaisson a hardi à y faithe. I' faut d'meuther dans l'ouest d'St. Ouën pour vaie les motos et chars-à-bancs r'vénîn d's aubèrges au sé! Sans doute, les gens tchi sont dans les chars-à-bancs n'peuvent pon êt' atchûsés du mêché, mais les motos sont plieins d'jannes gens tch'en sont assez à bord pour aver l'mêché dans la cahueûle, et i' cachant comme des fos. Il est dév'nu quâsi dangereux d'êt' dans La Route des Mielles à l'heuthe qué l's aubèrges freunment lus portes. À m'n idée, y'a bein trop d'aubèrges et d'baithie par les c'mîns!

Ch'est seux qué si les gens allaient à l'églyise à la pliaiche d'aller à l'aubèrge, i' n'y éthait pon tant d'mauvaîtchi! Mème les cheins tchi n'y vont pon, à l'églyise, né peuvent pon dênier ch'la! I' n'y a pon d'doute qué comme nouos l'dîsait l'Sieur Henry L'Gresley dans san sèrmon à l'églyise dé St. George, y'a eune difféthence entre les cheins tchi fréquentent les lieux d'tchulte et les cheins tchi n'y vont janmais. Et j'm'èrsouveins d'aver ouï en Améthique qu'eune pèrsonne né fait janmais d'ma quand oulle est à faithe ieune dé trais choses - à mangi, à dormi ou à travailli!

J'pensais à tout chennechîn en r'gardant l'feu dans la grand âtre l'aut' sé et j'mé d'mandais où'est qu'toute la mauvaîtchi et l'tîntamârre dé nouos jours s'en vont nouos m'ner en fîn d'compte. I' m'vînt à l'idée tch'i' n'y éthait pon d'embarras dans l'monde entchi si toutes les nations et touos les peupl'yes suivaient les r'quémendations dé Notre Seigneur dans San sèrmon sus la montangne. Mais comment qu'les jannes peuvent apprandre les bouannes moeurs s'i' n'vont janmais à l'églyise ni n'liêsent les Saintes Êcrituthes? Quand nou va à St. George au Dînmanche nou vait eune racachie d'mousses à jouer dans les bels des maîsons d'l'aut' côté d'églyise à la pliaîche d'êt' dans l'Êcole du Dînmanche à apprandre la Collecte et l'Êvangile du jour. Et quand nou-s-est dans l'églyise nou ouait des motocyclettes faithe un brit abomînabl'ye dans l's envithons.

Quant à mé j'sis acouo assez à la vielle faichon pour ôser d'penser tch'i' faut qu'les nations adoptent les prîncipes du sèrmon sus la montangne pour arriver à aboli les dgèrres et la mauvaîtchi et en fîn d'compte gangni et joui d'la paix du Bouan Dgieu - tchi dêpasse tout entendement - comme nouos l'dit la bénédiction à la fîn d'La Sainte Cène dans La Litourgie!

George d'La Forge
 

Viyiz étout:

 

Les Pages Jèrriaises