San Antonio, Texas,
U.S.A.
Lé 2 d'mar, 1968.
Moussieu l'Rédacteu,
J'viyais dans vouot' gâzette du dgiex-huit janvyi qu'eune danme et un Minnistre dé Gambia 'taient à pâsser la séthée au Pavillion souos L'Mont Patibulaithe pour dithe ès Jèrriais qu'la pouorreté mondiale est lus responsabilité! Ch'est seux tch'i' n'connaîssent pon l'diton, ches deux-là, qu'nou n'peut pon enrichi un publyi! J'gag'geais ma tête à coper qué si l'bein du monde 'tait partagi en portions êgales parmi touos l's hommes, qu'au but d'eune sémaine y'en éthait tch'en éthaient pus qué l's autres! Et ch'est bein aîsi à comprendre. Châtchun connait san mêtchi, et un tas n'en ont pon, d'mêtchi. Tous n'ont pon la même capacité, et un tas n'en ont pon du tout, d'capacité! Et y'a des travailleurs et des pièrcheurs et des faîgnants, et des savants et des niaumîns, et des capestes et des faillis. Y'en a d'toutes les sortes et pour touos les goûts!
Ch'n'est pon pour dithe qué nou n'dév'thait pon aîdgi à san vaîsîn, et soulagi les cheins tchi sont dans l'bésoin. Ch'est mème louabl'ye dé l'faithe, et ch'est un prîncipe chrêtchein qué nou n'peut pon consciencieusement oublier! Mais, comme nouos l'dit l'vièr diton Jèrriais, y'a pus d'eune manniéthe à tuer un cat, et quant à mé, ch'n'est pon aîdgi au monde dé lus donner des sou. Quand i' trouvent tch'i' peuvent en aver sans travailli pour v'la tchi lus donne un appétit pour rein d'faithe, et comme nouos l'dit acouo un aut' diton : Quand les cats ont prîns goût au lard i' r'gardent tréjous sus l'râclyi!
J'en avons la preuve ichîn en Améthique. Né v'la des années qué j'sommes à env'yer des sou ès nations tchi sont souô-disant dans l'bésoin, criyant qu'ches sou-là s'en vont aîdgi à nouôrri lus foules dé pauvres. Mais criy'-ous tch'i' vaient autcheune chose dé ches sou-là les pauvres? Les grosses-têtes dé ches pays-là font sèrvi nouos dollars pour acater d's avions et d's armes et des munitions d'La Russie pour nouos donner un co-d'pid là où'est qu'nou s'assied quand l'occâsion s'présent'ta! Est-che ravissant tch'i' s'moquent dé nous, les Russes? Et ch'est auve lus armes qué les communistes sont à lus battre contre nous au Viet-Nam!
La grand' partie des sou qu'j'avons env'yé au Mouoyen Orient ont sèrvi à acater d's avions et aut' machinnes dé dgèrre pour êprouver à dêtruithe Israël, un p'tit pays qu'l'Angliétèrre a aîdgi à s'mett' sus pid, et qu'j'avons aîdgi d'ichîn étout! Mais j'pouôrrais continnuer à vouos donner d's exempl'yes d'la folie d'donner des sou à d'aut' pays pour rein!
J'sis tout en faveur d'aîdgi ès pays tch'ont bésoin d'aîgue, mais d'eune aut' manniéthe. Tch'est tch'est dév'nu des dgiex mille louis qué l's Êtats votîdrent pour chenna y'a tchique temps? Un louabl'ye geste, sans doute. Jé n'sai pon si ch'tait à Gambia qué v'là tchi fut env'yé. J'pouôrrais m'tromper, mais jé s'sais ravi d'ouï qu'les gens tch'en avaient l'pus d'bésoin en ont veu la couleu! À m'n idée, il éthait fallu mus payi ches sou-là à eune démié-douzaine dé bouans vièrs fèrmièrs Jérriais pour lus en aller à Gambia montrer à ches gens-là comment craître des patates et des cârottes et des pânnais. En mème temps, les fèrmièrs pouôrraient enm'ner lus femmes auve ieux pour montrer ès femmes d'Afrique comment faithe d'la bouanne soupe dé caboche. Né v'la d'tchi à lus mettre dans l'ventre pour lus souot'nîn l'dos!
J'avons tchiquechose dé mème ichîn tch'a fait grand bein dans des pays en Afrique et d'aut' bord. Ch'est eune organisâtion d'jannes gens appelée un Corps de Paix - Peace Corps en Angliais. Les membres sont env'yés à eune êcole spéciale ichîn dévant lus en aller à l'êtrangi. I' sont des garçons et filles dé touos mêtchièrs et d'toutes les vocâtions, et y'a des maîtres et maitrêsses d'êcole parmi ieux. Arrivés dans l'pays où'est tchi'i' sont env'yés, i' travaillent à montrer lus mêtchi ou vocâtion ès gens du pays, et i' d'meuthent parmi ieux et adoptent - autant qu'pôssibl'ye - lus manniéthe dé vivre et d'mangi. Les membres du Peace Corps sont payis par l'Améthique, et i' nouôrissent ieux-mèmes et lus présence et lus sèrvices né couôtent rein au pays dans tchi tchi'i' travaillent. I' pathaît tch'il' ont 'té les beinv'nus partout et tch'il' ont fait un bein ênorme, car il' ont seu comment gangni la confiance des gens viyant tch'i' vivent parmi ieux et comme ieux!
I' m'sembl'ye aver ouï tch'i' y'a tchique organisâtion d'mème en Angliétèrre étout, et si Jèrri veurt aidgi, pûtôt qu'd'env'yer des sou i' vaudrait mus pays les gages dé deux-s'trais jannes Jèrriais pour joindre ch't organisâtion-là et aller ieux-mèmes aîdgi à l'êtrangi. À ch't heu qu'j'y pense, i' m'veint à l'idée qu'l'Armée du Salut est à faithe tchiquechose dé mème étout, et l'Cap'taine Arthur Maitland Le Feuvre, fis du défunt Juge Francis Vibert Le Feuvre, dé mémouaithe respectée, est hors en Afrique pour apprendre ès gens d'là-bas à fermer. Né v'la des projets tchi valent la peine d'encouothagi!
George d'La Forge
Viyiz étout: