Trenton,
Michigan, USA.
Lé 29 d'avri, 1978.
Moussieu l'Rédacteu,
Faut-i' tch'i' ait des sou en Jèrri, man bouanhomme! J'veins d'èrchéver la gâzette dé Jèrri di 23 d'févri, et la preunmié chose tchi m'frappe en la liêsant est la dêpense dé neu millions dé louis pour l'agrandissement d'L'Hôpita. Et i' faut deux chents mille louis pour eune montée au Fort Régent. Dans L's Etats, lé Sénateu Ralph Vibert, tch'a eune raide bouanne tête sus ses êpaules, nouos avèrtit acouo eune fais d'aller douochement.
L'èrvénu apèrchu est mentionné comme étant trente-neu millions et n'en v'la quâsi un quart voulu par un seul conmité. Mais chein tchi m'fait peux est qué l'Sénateu Shenton, en pâlant dans la Chambre au sujet des neu millions pour l'Hôpita, nouos dit qué l'couôtement finnitha p't-êt' par être tchînze millions à la pliaiche dé neuf. L'âffreuse supposition est tch'il a probabliément raîson. I' m'sembl'ye aver liu qu'les travaux du nouvieau havre à La Collette ont couôté quâsi l'doubl'ye dé chein tch'avait 'té cartchulé en c'menchant, et comme i' disent en Angliais: “History repeats itself.” Et ch'est seux qué l'Conmité d'Educâtion s'en va en gober eune grosse somme étout.
Mais ch'n'est pon seulement les gros montants. I' n'y'en a pon dé p'tits, ou-s-allez m'dithe? Eh bein, nou les vait dans toutes les gâzettes. Pour en mentionner deux-s'trais: Un million pour la propagande du tourisme: Quatorze mille louis pour netti les bâtisses dé la Cour et d's Etats dans L'Vièr Marchi, et probabliément autant pour netti L'Marchi dans La Rue Halkett. Huiptante mille louis pour un bâtiment additionnel à Beaulieu. Vingt mille louis pour paver La Rue ès Porcqs (appelée “Queen Street” à ch't heu). Né v'la eune dêpense qué nou peut dithe être à “env'yer des sou à la route!”
Bah! Y'en a tant, d'dêpenses, qué v'a tchi m'fait penser qué L's Etats l's autorisent comme s'i' pouvaient puchi les sou à la pelle et tch'i' sont ronds pour rouôler. Ch'est bein seux qu' les membres sont trop jannes pour aver apprîns à couoyer comme les vièrs Jèrriais tch'avaient à couoyer viyant tch'i' connaîssaient la valeu des sou et tch'il en avaient à bein près autant à dêpenser, affaithe dé récréâtion, comme un crapaud a d'puches. Et acouo i' n'faut pon oublier tch'i' mênageaient à mett' deux sou d'côté aussi souvent qu' possibl'ye pour en cas d'maladie et pour lus vièrs jours, viyant qué ch'tait considéthé honteux d'êt' sus la pâraisse.
Quandtchi qu' les rapporteurs dé la gâzette s'en vont apprendre à appeler les noms dé lieu comme i' faut? Lé portrait d'La Mathe au Seigneu, dans la gâzette du 23 d'févri, a san nom “La Mare au Seigneur” en d'ssous, et pis “St. Ouen's Pond”, en grand' lettres d'întitulement à la tête d'eune articl'ye tchi dit: “St. Ouen's Pond, tch'est connue, étout, comme La Mare au Seigneur” (ch'est en Angliais, sans doute, dans la gâzette). Ch'est l'contraithe. V'la tchi dév'thait liéthe: “La Mare au Seigneur, tch'est souvent mênommée 'St. Ouen's Pond' par les cheins tchi n'savent pon mus”!
L'articl'ye au sujet du Mangni d'Vînchelez dé Haut est întérèssante, et la gâzette en montre un bieau portrait. Mais ou n'nouos dit pon si l'mangni est acouo hanté par des r'vénants. Pourtant, dès mes p'tits jours, j'ai tréjous ouï tch'il 'tait hanté. Quand j'tais mousse les gens disaient qu' nou viyait un côffre dans l'mitan d'la route à côté du mangni la niet, mais j'sai bein qué ché n'tait pon des r'vénants tch'étaient responsabl'yes pour chutte crianche-là. M'n oncl'ye Ouinn'teur mé racontit dans san vivant qué dans l'temps tch'il 'tait apprenti-tchèrpentchi siez l'Sieur Fraînque La Mèrquand à La Fontaine, où'est tch'i' faîsaient des côffres pour les entrépreneurs d'entèrrements, ch'tait deux des apprentis tch'allaient porter les côffres sus lus êpaules au domicile du défunt. Et ch'tait duthant la niet tchi fallait l'faithe car ché n'tait pon un bieau spectacl'ye à vaie dans l'jour.
Dé vièr dgiex heuthes eune séthée tch'i' faisait si sombre qué nou n'viyait pon la main d'vant sé, m'n oncl'ye et un aut' apprenti 'taient en trains d'en porter iun à Liouville, et comme il' arrivaient dans la rue entre lé mangni et l'Mangni d'Bas, i' ouiyaient les pas d'tchitch'un v'nîn dans la Route dé Vinchelez, et l'aut' apprenti dît à m'n oncl'ye dé mett' san but du côffre bas dans la route. Mén oncl'ye m'dît tch'i' n'voulait pon faithe d'ité, mais i' n'pouvait pon souot'nîn l'paids du côffre tout seu. Eune fais l'côffre bas i' lus muchîdrent dans la hèche du Mangni d'Bas.
Arrivé au côffre, la piêton tchulbutit par dessus et satchit eune alleunmette pour vaie la cause dé sa tchulbutte. Quand i' vit qué ch'tait un côffre i' fît un brai et prînt la pathe à feu d'galop ava la route! Et né v'la la crianche êtablyie!
George d'La Forge
Viyiz étout: