à Portinfé, St. Ou.
Vendredi au sé.
Moussieu l'Editeu,
La s'maine pâssée je r'mértchis que tout était trantchille en Jèrri et que rain n's'arrivait, mais je n'peux pas en dithe autant agniet. J'm'en vais faithe de m'en mûs pour vos explitchi.
A qu'menchi, y'a la suggestion que l's Etats prennent partie du bâtisse dans Conway Street, iou que l'Sieur Mayo avait san 'store' aut'fais. Nou-s-en admet tch'il a hardi changi dépis chu temps-là, mais le loyer qu'est r'commandé, ch'est à dithe chînq mille louis par an, est, comme se fait la Merrienne, absolument fantastique, même încriyable. Le fait est que nos Etats ont tant d'sous tch'ils ont perdu la tête, mais nou-s-éspèthe tchi n'est pas ocquo trop tard pour dithe nennîn à chutte idée-là.
Epis y'a lé projet pour envier les prisoniers, ou au mains une quantité d'yeux, à Crabbé. La ferme-là appartcheint ès Etats, et la pûs grande partie est louée à un Sieur Bisson, mais les mêssieux tchi constituent le Prison Board considèthent que nou n'pouôrrait pas faithe un miyeu chouaix, car Crabbé est bein des milles d'la Ville, et si, pûs tard, les titheurs au blianc se trouvaient embarrassés nou pouôrrait les renvier ès Landes comme dans l'pâssé.
La Merrienne avait tchique chose à dithe là-d'sûs. Quant oulle eut mînt bâs la gâzette ou me d'mandit si j'criyais que les femmes tchi sont à ch'teu' en prison s'saient enviées à Crabbé étout.
Quant à chonna j'n'y connais rain, j'li dis, mais ch'est pôssiblye, car d'nos jours les Etats pathaissent être capables d'autchune folie, et sans doute parmi les prisoniers y'a d's hommes tchi voudraient vaie tchiques femmes par bordée, et des femmes tchi n'dithaient pas nennîn à d's hommes tchi voudraient lûs faithe la cârre. La natuthe humaine est la même à Crabbé comme alleurs.
Et tchèsqu'i' s'en va être là pour vaie, ou tâchi d'vaie, que tout l'monde s'comportent?
J'n'ai autchune idée, j'li dis, mais tu peux t'faithe seuze que j'n'en s'sais pas yun. Quand j'voudrai aller m'prom'ner je n'prendrais pas la direction de Crabbé, et pourtant, j'y'ai yeu d'bouans temps. J'n'ai pas r'oublié la bordée que j'vîns dans les prix quand l'club de Saint Ou eurent lûs tir annuel là. Il est vrai qu'après aver fait assez bein à deux chents, je n'pouvais pas y vaie trop cliait à chînq et à six, mais dans l'entretemps j'avais d'vallé à la Grève de Lé avec deus-trais amins et j'avions avalé tchiques p'tits vêrres. Man prix ch'tait une pathe dé brais tchi 'taient bein trop courtes, mais, comme j'dis à ma femme, ch'tait mûs qu'rain, car i' pouvaient servi comme épeûthas pour effriter les ouaisieaux tchi v'naient pour mangi vos p'tites graines. A ch'teu' ch'est des coupes, tchi n'servent à rain.
Mais, après tout, Moussieu, la grande nouvelle dépis que j'vos avais êcrit la s'maine pâssée ch'est que la Reine s'en va pûs tard présenter la nation avec un p'tit garçon ou une p'tite fille, ou même avec des jumieaux. La nouvelle a 'té r'chue avec acclamation partout, et l'seul r'gret ichîn siez-nous est qu'ma Merrienne n'peut pas en faithe autant.
La gâzette nos a dit à ces sé que chu charmant Moussieu Lord Jersey, est candidat pour président d'la Sociétè Rouoyale quand lé Juge l'Boutillyi finnit san terme. J'avais ouï tch'i' n'prendrait pas si y'avait d'l'opposition, mais la Post n'fait autchun mention de chonna, et nou n'sait pas tchi craithe. Quant à mé, j'avais comprînt qu' Eugène Perrédes s'en allait succéder lé Jugé l'Boutillyi.
Et tchèsqu'en est des tomates, Moussieu? Y'a d'bieaux bétchets ichîn et là, sans doute, mais y'en a d'autres tchi n'pathaient pon lûs frais, car tout l'bieau temps du monde n'peut pas à ch'teu' les dgéthi d'lus maladies. Comme nou-s-a tréjous veu, Moussieu, y'a des tchultivateurs tchi sont chanseurs et y'en a d'autres tchi n'sont pas.
Assez pour agniet, Moussieu, et je n'vos oubliéthait pon. À la s'maine tchi veint.
Ph'lip
1963
Viyiz étout: