Trenton,
Michigan, USA.
Lé preunmyi d'dézembre, 1979.
Moussieu l'Rédacteu,
J'veins d'erchéver la gâzette dé Jèrri du 18 d'octobre et j'vai un bieau portrait dé m'n anmîn Moussieu l'Député Jean Amy L'Maistre et sa danme dédans. I' sont montrés auve d'aut' pèrsonnes en conféthence au sujet dé dessinner un tîmbre pour Noué. V'là tchi m'fait penser qué j'dév'thais lus d'mander, à ches distîndgis mêssieux et danmes, pourtchi qué l'porteux d'lettres veint d'm'apporter la gâzette du 18 d'octobre quand j'n'ai pon 'couo r'chu les cheinnes du quatre et du onze dé chu mais-là. I' m'dithaient, sans doute, qué ch'n'est pon d'lus faute viyant tch'i' l's avaient postées aussitôt publyiyées. Et j'comprends bein ch'la. I' faut craithe qué l'troubl'ye est entre les grand' postes dé Londres et d'Améthique.
Et nou n'peut pon s'vanter du sèrvice des Postes ichîn et au Cannada. Y'a tchique temps, un livre tchi fut mîns à la Poste dé Gaspé, à La Côte, dans l'mais d'novembre, mé fut d'livré à San Antonio, Texas, dans l'mais d'févri en r'vénant. À ch't heu, des lettres tchi soulaient v'nîn d'un êtat dans l'autre dans trais ou quat' jours prannent eune sémaine.
En ouvrant chutte gâzette du 18 d'octobre, mes leunettes ont failli sauter dé d'ssus man nez quand j'ai veu vouot' mangnifique articl'ye d'fond întitulé “Abus d'Privilège” et qu' j'ai c'menchi à la liéthe. Jé n'pouvais pon en r'vénîn! J'n'éthais janmais pensé qu' autchun membre d'nouos Êtats éthait dêpensé des sou du publyi mal à propos. Nou comprend bein qué noblièche oblyige, et qué si un membre d's Êtats est appelé à convier tchique pèrsonne dé qualité il est nécessaithe dé lî'ouffri un bouan r'pas - mais pas iun d'honmards à onze louis la pièche! Et un “lunch” dans un restaurant à Londres pour deux pèrsonnes couotant souoxante louis, dé tchi trente-deux louis 'taient pour du baithe! Comme “lunch” est mangi à méjeu, ches deux pèrsonnes étaient-i' en êtat d'pouver travailli couothamment l'arlévée?
Ch'n'est pon ravissant tch'il en couôte tant à gouvèrner l'Île. Mais y'a eune chose tchi n'faut pon oublier, ch'est qu' Jèrri dait êt' èrconnaissant d'aver un moussieu du calibre du Sénator Cyril Le Mèrquand à souangni d'ses finnances et garder s'n yi sus les dêpens des membres, et d'aver l'couothage dé les dênoncer en plieine séance dé la Chambre. I' n'faut pon penser qué ch'est aîsi pour un membre d'en dênoncer un autre dans des circonstances dé même, et i' faut apprécier l'couothage du Sénateu Cyril. Espéthons qué tout chu tripot s'en va aver un êffet salutaithe dans la condite des transactions d'nouot' gouvèrnément.
Ch'n'est pon seulement en Jèrri tch'i' y'a ieu nécessité dé r'toli sus les dêpens d'gouvèrnément. Ch'a 'té un vrai scandale dans nouot' Congrès à Washington. Cèrtains membres tch'aiment à viagi sont tréjous à galvaûder dans des pays êtrangers ès frais du publyi. J'avons grand bésoin d'un Cyril Le Mèrquand à Washington, mais jé n'voudrais pon l'vaie abandonner san poste en Jèrri pour y v'nîn!
Eh bein, nouos v'là dêjà au mais d'dézembre, et Noué s'en va beintôt nouos tchaie sus l'co. La né est v'nue à la fîn du temps. D'habitude, oulle arrive au c'menchement d'novembre, mais j'avons ieu un supèrbe mais d'novembre ch't année. Auve la né, quand nou r'garde par la f'nêtre nou s'dithait vaie iun d'ches bieaux portraits qu'nou vait sus les cartes d'Noué.
Un vièr diton nouos dit qué quand la né reste sus la tèrre ou crie à d'autre. J'pense bein qu' ch'est d'même dans les pays où'est qu' ou tchait eune fais en quat' ou chînq ans, mais ou n'a pon bésoin d'crier à d'autre ichîn - l'autre veint quâsi touos les jours sans învitâtion!
Iun d'ches jours, nou s'en va c'menchi à vaie d's annonces dé décès d'anciens tch'ont 'té frappés par la maladie d'tchoeu en pelletant la né dé d'ssus lus allées d'gardîn et dé d'ssus l'trottouaithe en d'vant d'lus maîsons. Ch'est à châtchun d'garder san trottouaithe net, mais la munnicipalité garde les rues cliaithes atout des tchéthues à né, m'nées par des “tractors”.
J'ai fait ma pell'téthie d'né à matîn et souangni l's ouaîthieaux, et il a fallu êcraser la glace dans lus p'tit abréveux à coups d'marté pour lus mett' dé l'ieau fraiche à baithe.
George d'La Forge
Viyiz étout: