Fort Lauderdale,
Florida,
U.S.A.
Lé 28 dé févri, 1981.
Moussieu l'Rédacteu,
“Bon! Ou-s-êtes déjà r'vénue d'St. Brélade!”, s'fît la bouannefemme Jeanneton Le Veslet quand j'la recontrînmes, Manman et mé, dans La Rue à La Pendue en r'vénant d'boutitchi à La Fontaine.
“Véthe dgia!”, Manman lî dît. “Ch'n'est pon souvent qué j'peux faithe man bouanhomme freunmer la forge pour un jour ou deux et nouos pronm'ner un mio, mais chutte fais j'allînmes pâsser l'sanm'di et l'Dînmanche à La Mouaie siez nouot' fille Annie tch'a mathié Fraînque d'Aubert. J'marchînmes à y'aller par La Route des Mielles. J'sortînmes à chîntch' heuthes vendrédi l'arlévée, et i' nouos prînt eune volée à faithe lé trajet car lé p'tit George né marche pon aussi vite comme les grand' pèrsonnes et y'a bein chîn milles dé la forge à La Harmonn'nie à La Mouaie. Ch'est eune bouanne marche pour un mousse dé s'n âge. Nouot' bieau-fis nouos portit dans san quèrre à r'vénîn.”
“Vouot' bieau-fis d'Aubert n'est-i' pon navigaunt?”, Missis Le Veslet dît à Manman.
“Eh bein,” ou lî dît, “quand i' vînt r'condithe Annie la preunmié fais, il 'tait navigaunt. I' v'nait d'faithe un viage à Napl'yes dans l'Bolina auve nouot' couôsîn Cap'taine Le Feuvre dé Gros Nez, et ch'tait d'même tch'i' vînt à nouos connaître. Mais quand i' fûdrent mathiés i' s'décidit d'rester à tèrre. Pour lé moment i' sont à fèrmer, li et nouot' fis Ouinn'teur, à La Harmonn'nie, mais i' s'en vont tchitter à Noué. Ouinn'teur veurt travailli à sa vocâtion d'tchèrpentchi, et Fraînque d'Aubert s'en va êt' înginnieux à la carriéthe dé La Mouaie pour cachi les crannes et souangni d'la machinn'nie.”
“J'veins d'aller vaie l'bouanhomme Jean Roussé,” Jeanneton nouos dît. “Il est en embarras, lé pouôrre corps. Il a pèrdu san gangne-pain, nou peut dithe. San vièr chéva tchit mort hièr au sé. Il avait finni d'dêchèrgi eune chèrge d'raves dé d'dans san hèrnais et il 'tait à lé m'ner à l'auge dans l'bel pour l'abréver quant i' tchit mort à côté d'l'auge. Lé bouanhomme Jean l'aimait comme un êfant, san vièr bidet, et i' plieuthait en m'racontant l'affaithe.”
“J'n'en sis pon ravie”, Manman lî dît. “Il avait nom Prînce san j'va. George l'a féthé bein des fais. Un bouan vièr bidet, tréjous trantchil et aîsi à féther, j'ai ouï George dithe. J'pense tch'il avait 'té malade un coupl'ye d'fais l'année pâssée. La dreine fais ch'tait Mess Hubert Dgeinn'tîle tchi l'souangnit. Lé bouanhomme Jean l'avait m'né siez l'docteu à bêtes en ville, mai i' n'y'avait pon fait d'bein. Ch'est assez r'mèrquabl'ye, mais George m'a tréjous affirmé qu' Mess Hubert sé r'connaît mus à souangni j'vaux et vaques qué les docteurs à bêtes tchi veinnent d'Angliétèrre. Ch'est seux qué l'pouôrre vièr Prînce est mort d'eune maladie d'tchoeu, ou p't-êt' de vieillèche.”
"Jé n'sai pon tch'est qué l'vièr Jean Roussé s'en va faithe pour continnuer sans san j'va. Ch'est seux tch'i' n'peut pon affaûrder à en acater un autre. Il a ieu fort à faithe toute sa vie, l'pouôrre vyi. Il allit à san jour pour tchiques années siez Moussieu d'Auvèrgne tchi lî donnit san j'va Prînce quand i' tchittit à fèrmer et louit sa fèrme. J'ai tréjous ouï tch'i' c'menchit par louer un clios pour fèrmer sus san compte - un clios tch'était hardi gelif - et tch'i' m'fît rein sus ses patates deux ou trais ans d'siette. Il acatit un vièr hèrnais et eune vainné à eune vendue, à crédit viyant qu' l'encanteux, tch'était Philippe John Le Feuvre dé La Fontaine, lé connaîssait bein comme étant honnête, dé bouanne condite et un bouan travailleux. Et l'Sieur Le Boutilyi tch'est à la fèrme des Mêssieux L'Cornu à Vînchelez lî donnit eune vielle vaque tch'était êhantchie mais tchi donnait bein, et v'là tchi l'mînt sus ses pids.
"Lé pouôrre bouanhomme est iun d'ches'là tch'à travailli dû toute sa vie sans rêussi à faithe grand' chose, mais il a tréjous 'té honnête et d'bouanne condite et a mênagi à payi san c'mîn dans la vie. Sa bouanefemme n'a janmais jouit d'eune bouanne santé. Oulle est couôsue d'rhonmatisses et marche toute ahonnie. I' n'ont pon ieu d'êfants, et l'bouanhomme traitait san j'va comme s'il en 'tait iun. I' n'pouvait même pon r'garder George lî coper la corne souos l'chabot quand i' l'apprêtait pour lé féther.
"I' faut lî v'nîn en aîgue. J'm'en vais en pâler à George auprès l'thée à ses sé. I' pouôrra mett' eune bouaîte dans la forge pour collecter des sou pour lî-aîdgie à acater un aut' chéva. J'avons fait ch'la d'vant et auve bouân rêsultat. Et pis j'allons d'mander à Mess Hubert Dgeinn'tile dé garder s'n'yi ouvèrt pour quand y'en étha iun à vendre à prix raîsonnabl'ye. I' connaît touos les j'vaux d'la pâraisse étout."
George d'la Forge
Viyiz étout: