Le Ménage ès Feuvres
St Ouën
Lé 4 dé septembre 1976
Moussieu l'Rédacteu,
Y'a trais choses tchi dominnent les nouvelles dans la gâzette ches jours, les grèves par les sŷndicats des travailleurs, lé manqué dg'ieau et la grande s'crèche. Tout est boulevèrsé. Et ch'n'est pon seulement en Jèrri. L'ordre, la tranchilité et l'respé pour la louai et la r'ligion n'sont pus. Ch'est à peine si les grosses têtes des gouvèrnéments piêssent empêchi les nâtions dé s'mett' en dgèrre, et pourtant les deux dreines grand' dgèrres 'taient supposes d'apporter fîn à l'idée dé s'entre quétilyi pour rêsoudre les disputes entre les nâtions. L'organisâtion appelée Les Nâtions Unies fut êtablyie pour les rêsoudre par la distchussion paîsibl'ye lé tou d'la tabl'ye et aboli la dgèrre. Mais tch'est tch'i's'arrive? Les nouvelles pétites nâtions, ayant eune vouaix êgale ès grandes, mett' des bâtons dans les reues et votent contre ieux ouaithe tch'il' aient fait d'lus mus pour les mett' sus pid et maint'nîn lus îndépendances. Dans l'entrétemps les dgèrres continnnuent ichîn et là, et L's Êtats-Unis d'Améthique continnuent à payi pus qu' lus châre des frais d'entrétchein d'l'organisâtion en espéthance qu'ou s'en va, à la fîn du compte, contribuer à l'êtablyissement d'la paix dans l'monde.
La plyie pathaît aver pus d'peine à v'nîn en Jèrri qu'les touristes. Il en a pourtant tchée en quantité en Angliétèrre, mais ou n'a pon voulu v'nîn jusqu'ichîn. J'espéthe qué les gens s'en vont obéi l's autorités et couoyer l'ûsage dg'ieau tch'est si nécessaithe pour lé maintchein d'l'homme et du bestchias. Nou vait acouo les mêmes sîngnes dé plyie qu'nou viyait l's aut années, et nou peut dithe Ch'est sîngne dé plyie! ou L'temps est sus la plyie! mais la plyie r'fuse d'obéi les sîngnes!
J'ai ouï pâler d'La Grand' S'crèche avau l's années mais ch'tait eune s'crèche du temps tchi s'est pâssé quandi qué j'tais en Améthique. Y'en a-t-i' ieune tch'a duthé aussi longtemps comme chette-chîn? Un vièr diton nouos dit qu' à plyie et douleur y'a un tèrme, mais il est grand temps tch'i' ait un tèrme à la s'crèche étout. Quant à mé jé n'peux pon m'pliandre, car j'ai d'l'ieau dans l'pits. Mais j'sis à couoyer l'ieau autant qu' possibl'ye quand-mème. Des maîsons dans l'vaîsinné viédes dépis longtemps et à ch't heu en train d'èrpathâtion, et aut' bâtisses aménagis pour otchupâtion éthont p't-êt lus ieaux d'la mème source comme la cheinne tchi fournit l'pits. En tout cas j'espéthe tchi y'en a assez pour tous, car ch'est eune c'modité nécessaithe.
En pâlant d'c'modités vouos r'souv'nous du temps tch'i' fallait aller déhors dans touos temps pour qu'si l'ieau au pits ou à la pompe? Et fallait s'soumettre à l'înjuthe du temps et aller déhors pour aut' chose étout! À ch't heu ch'est eune grand' c'modité d'aver l'ieau en d'dans d'la maîson. Dé nouos jours nou-s-a toutes ses c'modités, et ieune par-dessus!
Quand j'tais mousse ès Landes à St. Ouën, les gens s'griyaient sans aver fort dé sou dans lus pouchettes. V'la tchi n'veurt pon dithe quand-mème, qué nou n'ouiyait pon tchiquefais tchitch'un dithe: Nou s'graiethait bein tout d'mème atout acouo deux s'trais sou d'pus! Mais en général i' pathaîssaient contents d'lus sorts, et ayant eune parfaite connaîssance dé la valeu des sou i' les laîssaient aller liain en couoyant sus tout.
À ch't heu? Ch'est les sou tchi dominnent tout. Nou soulait dithe qué le dollar 'tait l'Bouan Dgieu d's Améthitchains, mais i' n'sont pus touos seurs dé lus sorte. Et i' faut r'connaître tch'il ont tréjous 'te génétheux et prêts à aîdgi à toutes les nâtions et v'nîn au s'cours des peupl'yes afflyigis par avâries d'toutes sortes.
Mais ichîn, et en Angliétèrre, à la pliaiche d'aîdgi à garder la vie d'touos les jours en allant et d'suffithe ès bésoins du conmèrce et du publyi, les sŷndicats des travailleurs lus mett' en grève souos des babouîns d'prétextes. Tchiquefais, ch'est la grève causée par du brit entre deux d'ieux entouorre tchique dispute tchi n'a rein à faithe auve la maison d'conmèrce tch'est lus gângne-pain. Et pourtchi? Quâsi tréjous pus d'sou! Eh bein comme il ont l'pouvé d'arrêter tout l'conmèrce, il en gângnent. Lé rêsultat est l'hauchissement du couôtement d'la vie et v'la tchi lus donnent eune aut' estchuse pour sé r'mett en grève pour y suffithe. Dans l'entrétemps ch'est l'publyi tchi souffre dé tout chu chathivathi- là. Et comme nouos l'dit l'vièr diton Les sou sont ronds pour rouôler happe-les tchi peut!
I' faut quand-mème dithe tch'i' y'en a d'aut qué les sŷndicats tchi n'pensent qu'à faithe des sou. Nou-s-acate tchiquefais un objet ou eune lédgeunme dans eune boutique à un cèrtain prix et deux pas pus liain nou vait la mème chose à la maîntchi du prix qu'nou-s-en a payi en l'acatant.
Quant à mé, j'èrgrette lé vièr temps quand les gens n'avaient pon fort dé sou dans lus pouchettes mais tchi lus comportaient comme i' faut et tch'i' n'oubliyaient pon qu'l'Bouan Dgieu compte nouos r'vaie tous tchique jour!
George d'La Forge
Viyiz étout: