Fort Lauderdale, Florida,
U.S.A.
Lé 8 dé févri, 1975.
Moussieu l'Rédacteu,
Un vièr diton nouos dit tch'i' faut paître où'est qu' nou-s-est fitchis. Les vièrs Jèrriais 'taient si enchéthinnés dans lus vielles couôteunmes tch'il' en avaient, des ditons, pour toutes occâsions. Ch'est ieune des richesses dé la langue Jèrriaise, et s'ou n'mé criyiz pon ou n'avez qu'à lièthe les dgix ou onze chents publyiés dans les Bulletîns d'L'Assembliée d'Jèrriais.
Quant à mé, j'me fais un d'vé d'paître paîsibliément où'est qué j'mé trouve fitchi pour lé moment, et d'adopter les couôteunmes des gens l'tou d'mé, mais connaîssant un aut' diton tchi nouos dit qu'un changement d'pâtuthe fait les vieaux gras, j'êprouve à n'adopter pon pus qué quatre or chînq domiciles par an. Au jour d'aniet j'sis à vouos êcrithe du pays d'La Floride à la pliaiche du chein d'Texas et j'espéthe qué chu changement d'pâtuthe né s'en va pon m'engraîssi car, à m'n âge, les vièrs dgéthets n'sont pon solides assez pour porter trop d'excès d'graîsse. Heutheusement qué l'diton nouos dit qu' ch'est les vieaux tchi sont supposés d'engraîssi. V'la tchi m'met houors dé dangi car j'ai tréjous 'té fidèle Louothi dans l'âme comme touos m's anchêtres dévant mé, et ch'tait pûtôt parmi les Rôsièrs qué nou trouvait les vieaux!
La gâzette du dgiex-neuf dézembre est arrivée ichîn en mème temps qu' mé, et la preunmié chose tchi m'a frappé en l'ouvrant 'tait l'compte rendu d'l'accident tchi causit la mort du Sénateu Krichefski. En pâlant des décès d'un tas d'vielles gens en Jèrri, j'ai souvent mentionné - comme j'peux l'faithe actuellement dans les cas du Cap'taine et Juge Francis Ahyi et du Cap'taine “Joe” Dorey - qué ne v'la acouo des mios d'Jèrri dispathus à janmais. Dans l'cas du Sénateu Krichefski nou n'peut pon vrainment en dithe autant car il 'tait probabliément d'la preunmié généthâtion née en Jèrri, mais j'rends hommage à ses sèrvices dans L's Êtats d'l'Île. Né v'la un homme qué nou peut dithe tch'il avait du paids dans ses manches! Actuellement, j'ai connu san péthe mus qu' li. J'm'èrsouveins tout à fait bein d'lî quand il allait vendre d'la paraffinne et aut' âtivelles auve san j'va et sa vainne par les pâraisses quand j'tais mousse, et il 'tait bein aimé et respecté par les vièrs St. Ouënnais. Quand j'èrvîns en Jèrri en 1946 et qu' j'allis m'assiéthe dans la gal'lie publyique dans L's Êtats j'vis l'Sénateu (probabliément Député dans l'temps) à sa pliaiche dans la Chambre. Par ses discours i' m'donnit l'împression tch'il 'tait d'la nouvelle êcole tchi s'appelait “Démocratique” dans l'moment, mais sa carriéthe êventuelle a prouvé, i' m'sembl'ye, tch'il 'tait consèrvateur.
J'ai pâssé un tas d'temps à lièthe lé rapport des débats dans L's Êtats, et quand j'sis v'nu à la fîn j'ai pensé tch'i' fallait r'quémenchi au c'menchement et lé r'liéthe acouo eune fais pour en comprendre la maîntchi. Mais j'ai peux quand j'vai qu' ch'est des chents milles louis qu' les difféthents conmités d'mandent pour fonctionner, et qu' ch'est en millions qué l'total sé montre. J'sis trop bête pour comprendre pourtchi tch'i' faut tant d'hèrpîns pour gouvèrner l'Île, et i' m'sembl'ye qué ch'est viyant qu' les Jèrriais d'à ch't heu ont oublié comment couoyer.
Eune chose tchi m'nâvre est d'vaie les fichus drôles dé noms qu' les gens donnent à des pliaiches en Jèrri d'nouos jours. Par exampl'ye, y'a des colonnes dé d'vis dans la gâzette au sujet d'un mathais mênommé “Goose Green” et j'ai liu tout l'travèrs des trais ou quat' colonnes pour dêcouvri où'est tch'i' pouvait y'aver eune telle pliaiche en Jèrri. La seule chose qué j'ai peu comprendre est qu' ch'est à St. Pièrre, et tch'i' y'a pâlement d'faithe eune neuve route du côté d'Bieaumont, s'i' y'a tchestchion d'bâti, mais jé n'peux pon m'inmaginner autchun mathais tch'éthait un bêtasse dé nom d'mème. Est-ch' eune ouaie tch'est vèrte tch'a donné l'nom, ou est-ch' lé mathais tch'est vèrt? Et j'criyais qu' les mathais apparténaient ès T'nants d'lus vaîthinné et tch'i' n'taient pon pour bâti d'ssus. J'en sis tout confus. P't-êt' qué j'sis dév'nu bête comme eune ouaie tchi coue sus des pièrres en liêsant entouorre chutte “Green Goose”!
J'comprends bein, sans doute, qué tchique êtrangi, domicilié dans l'Île et tchi n'sait pon un mot d'Jèrriais, donn'nait un nom Angliais à eune route, maison ou clios, mais chein tch'est împardonnabl'ye, à m'n idée, est d'vaie des Jèrriais, mème dé vielle réchinne et d'êducation, pèrpetuer d's âffreux noms d'mème, offensifs à l'ouïe Jèrriaise, pon seulement en convèrsâtion en partitchulyi mais officiellement dans L's Êtats, et j'ai perdu espéthance dé les vaie èrfûser d'prononcer des mênoms tchi sont à prendre pid et êffachi les vrais noms Jèrriais comme “La Route des Mielles” et “La Mathe au Seigneu” connus d'ancienneté et, nou peut dithe, dév'nus vénéthabl'yes par l'ûsage des siècl'yes!
George d'La Forge
Viyiz étout: