Le Ménage ès Feuvres,
St. Ouën.
Lé 2 d'octobre, 1976.
Moussieu l'Rédacteu,
Y'a tréjous l'trop et l'trop p'tit et l'tro à pêtri!
Ch't êté ch'tait trop d'sécrèche et trop d'solé et trop p'tit p'lyie; à ch't heu ch'est trop d'plyie d'avèrse. L's agritchulteurs tchi s'y connaîssent mé disent qué j'en avons acouo grand bésoin, d'plyie, pour tremper la tèrre à fonds, mais d's'avèrses comme j'avons ieu dreinement sont couôteuses viyant tch'il' înnondent les bels et maîsons au bas des monts. L's înnondâtions apportent l'ieau et l'pité en mème temps, et ch'est l'dgiâbl'ye à confêsser à r'netti l's avalanches.
Quant au tro à pêtri, nou n'en vait pon dans les mênages à ch't heu. Pourtant, quand j'tais tout p'tit dans ch'tî-chîn, ch'tait un tro à pêtri tchi faîsait sèrvi d'tabl'ye dans la salle, et à la pliaiche dé tchaises y'avait un banc à châque côté du tro pour s'assiéthe à mangi.
J'avons trop d'êtrangièrs en Jèrri d'nouos jours et trop p'tit d'maîsons pour les Jèrriais viyant qu'un tas d'ches êtrangièrs-là ont mathié des Jèrriaises et ont peut acater ou otchuper un tas des neuves maîsons tch'il' ont ieux-mèmes aîdgi à bâti. Et j'avons trop d'motos dans l'Île étout, et trop p'tit d'run dans nouos êtraites pétites routes dé campangne pour lus vitesses dé quarante milles à l'heuthe. Et i' y'a bein trop d'pèrsonnes tchi les cachent étant souos l'înfluence dé la bouaisson ou d'drogues. Et j'avons trop p'tit d'Juges (ouaithe tch'i' y'en a deux quoaiqu' iun soulait suffithe) dans la P'tite Cour pour les jugi et jugi les malfaiteurs en Jèrri à ch't heu, et j'sommes oblyigis d'empreunter les Jurés-Justiciers d'la Cour Rouoyale pour lus aîdgi.
Et l's aubèrges? J'en avons bein d'trop étout. Et bein trop p'tit d'pèrsonnes tchi prannent la peine d'aller faithe un protêt contre l'accord dé licences pour en ouvri d'nouvelles quand v'là tchi veint sus l'tapis d'vant L'Assembliée des Gouvèrneur, Bailli et Jurés.
J'avons-t-i' trop d'églyises? Nannîn! I' n'pouôrrait janmais y'aver trop d'maîsons du Bouan Dgieu autchun bord, sans pâler d'Jèrri, mais y'a bein trop p'tit d'pèrsonnes tchi les hantent.
Des dgaîngues dé jannes lus abûsent trop à “vandaliser” ichîn et là. Si ch'n'est pon affaithe dé dêtruithe la propriêté d'autrui ch'est l'sacrilège d'objets d'vénéthâtion dans les lieux d'tchultes ou parmi les tombieaux dans les chînm'tchiéthes. Dans ieune des dreines gâzettes y'avait mème un portrait tchi montrait la démolition graduelle d'eune muthâle, pièrre par pièrre, par ches înfatigabl'yes malfaiteurs. Rein n'est trop sacré pour empêchi lus foltéthies! Et y'a trop p'tit d'monde tch'ont l'couothage dé vouler les peunni comme i' faut. Quant à mé, j'ai tréjous dit qu' ch'est la badgette tchi lus faut, et pis d'faithe lus pathents payi pour lus d'gâts. Mais i' y'a trop p'tit d'pèrsonnes tchi sont dé m'n avis et l'vandalisme continnue comme dé pus bé. Et i' y'a trop p'tit d'membres dé la police pour aver l's ièrs partout, et trop d'couôtement pour èrdoublier lus nombre.
I' y'a trop d'Jèrriais parfénés ichîn et là à l'êtrangi à la pliaiche d'êt' en Jèrri. Y'en a dans bein des pays du monde. À lus pliaiche j'avons des gens d'aut' pays tchi sont en commèrce en ville et dans la campangne à faithe des sou comme des êcales.
Les mousses d'à ch't heu ont trop d'sou d'donnés par lus pathents pour en apprécier la valeu. I' sont gâtés et poulotés à tel dégré tch'i' veinnent à craithe qué v'la tchi lus est deu. Et y'a trop p'tit d'disciplinne tch'est si nécessaithe pour lus apprandre la responsabilité tchi lus faudra pus tard pour combattre les problèmes, les troubl'yes et l's avâries d'la vie tchi s'présentent înnatendûment.
J'avons trop d'grèves dé travailleurs dé touos mêtchièrs tchi n'sont janmais satisfaits, et trop p'tit du bouan sens tch'i' faudrait pour ches travailleurs à rêaliser tch'i' sont m'nés par lé nez par d'autres tchi savent qu' ch'est à lus avantage dé continnuer à trouver ou înventer des raîsons pour arrêter l'travas.
Y'a trop d'gens tch'ont trop p'tit d'avis pour rêaliser tch'i' sont à feunmâtchi lus poumons par la feunmée d'cigarettes tch'est à lus raccourchi la vie. Et y'en a trop parmi ieux tch'ont trop p'tit d'avis, étout, pour saver qué quand i' s'mettent à feunmer à tabl'ye duthant un r'pas dans un restaurant, i' sont à feunmâtchi les gens à côté d'ieux tchi n'feunment pon et p't-êt' à endommagi lus poumons étout viyant tch'il' ont à heunmer lus feunmée.
N'en v'la-t-i', du trop et du trop p'tit! Et j'pouôrrais continnuer, mais i' faut qué j'm'arrête dévant qué tchitch'un trouvé qué j'aie trop p'tit d'avis pour saver quantchi saver qu' j'en ai dit d'trop!
George d'La Forge
Viyiz étout: