Trenton
Michigan, USA.
Lé 6 d'juin, 1981.
Moussieu l'Rédacteu,
Nou peut-i' ouffri des condoléances pour la pèrte d'annimaux? Ou-s-allez probabliément m'dithe qué l'mot condoléance n'est pon conv'nabl'ye pour telle occâsion, ch'est en tchi j'm'en vais présenter mes grands r'grets au Sieur John Le Feuvre, des Augerez à St. Pièrre, pour la pèrte d'ses vaques et touauthé à cause du foot and mouth disease. J'mé d'mande tch'est l'nom Jèrrais pour chutte maladie-là. Jé n'm'èrsouveins pon d'en aver ouï pâler à la forge quand j'tais mousse siez Papa y'a quási nénante ans, mais j'sis v'nu à penser qué ch'est p't-êt' La fièvre aphteuse, qué l'dictionnaithe Larousse nouos dit être eune maladie épidémique des bestiaux.
J'veins d'èrchéver la gâzette dé Jèrri du vîngt-six d'mar. J'avais quâsi pèrdu espéthance dé la r'chéver, chette-là, car j'avais dêjà r'chu les cheinnes du deux, neuf et seize d'avri. Ch'est d'même qué les transports des Bureaux d'Poste sont à ch't heu. La cheinne du vingt-six d'mar a prins deux mais et eune sémaine á v'nin d'Jèrri ichîn! Ch'tait en l'ouvrant qu'j'ai veu l'bieau portrait, sus la preunmié page, dé la supèrbe vaque Margarethe II tch' a 'té abattue auve sa fille, un touauthé et quatre aut' vaques.
Pour l'êleveux d'bêtes, eune affaithe dé même est tragique. Et ch'est pitchabl'ye dé penser qu' des belles championnes comme Margarethe II ont à aver la vie copée d'court et finni dans la fosse. Tchi pèrte! Un autre dé m's anmîns, lé Sieur Harold Vibert, dé Woodlands à St Ouën, eut à subithe la même avârie. Enfîn, comme i' y'a dêjà deux mais dépis qu'la maladie s'dêcliathit, i' faut espéther qué l'dangi d'épidémie est pâssé.
Dans la même gâzette, l'articl'ye sous l'holouoge dé Meridian, tréjous întérêssante, nouos montre un bieau portrait d'Sa Majesté la Reine Mary en train d'accepter un touffet d'flieurs en d'vant d'La Cour Rouoyale dans L'Vièr Marchi à l'occâsion d'la visite du Rouai George V et d'la Reine en 1921. Dans la grand' porte d'la Cour, j'èrconnais l'Dénonciateu Balleine auve la Masse à s'n êpaule, et l'Avocat Edmund Toulmin Nicolle, Vicomte dé Jèrri dans chu temps-là, à côté d'li. V'là tchi m'ramémouaithe les bouannes années d'ma jannèche dans Hill Street comme clèrcot dans l'office à Moussieu Charles Willian Binet, et pus tard Commis-Vicomte dévant m'en aller à la dgèrre dé 1914-18.
J'criyais qué d'meuthais dans les vièrs temps ès Landes à St. Ouën y'a quâsi nènante ans, mais en liêsant l'întérêssante articl'ye dé Mike Sunier (dans la même gázette) tchi nouos dit tch'i' y'avait des Jèrriais à faithe la pêque à Tèrre-Neuve dévant qué Christophe Colombe mînsse lé pid à térre en Améthique en mil quat' chent nénante-deux, j'vai qué ch'est à peine si nou peut considéther nénante ans comme étant l' temps jadis!
Y'a quand-même des caractéristiques qué j'avons héthité des anciens du Mouoyen Âge. Par exempl'ye, nouot' goût pour l'andgulle. J'n'ai pon 'couo veu un Jèrriais tchi n'l'aime pon. Quand j'tais janne, lé couôsîn Douard Le Feuvre d'Gros Nez 'tait fanmeux pour la péque d'andgulle. I' connaîssait les houles, et dans les grand' mathées i' r'vénait souvent du rotchi auve quarante ou chînquante livres d'andgulle dans sa pouque.
Ch'est seux qué la duéurcheu du Jèrrais du Mouoyen Âge, mentionnée comme étant ieune des raisons d'sa survivance, 'tait acouo en êvidence quand j'tais mousse. Lé fèrmyi d'chu temps-là pâssait ses jours au clios et ses nyits au vrai, et mênageait à êl'ver des grand' fanmil'yes et acouo mett' deux sou d'côté pour en prendre soin en cas d'avârie ou d'maladie.
Ch'est mangnifique dé vaie, dans l'portrait tch'est sus la même page qué l'articl'ye du Sieur Sunier qué l'Châté d'Gros Nez 'tait un bieau monument à veue d'yi dévant tch'i' c'menchîsse à détériorer et pèrdre sa vraie raison d'être. J'avons la chance tch'il est acouo d'but, dépis qué l'Sieur Sunier nouos dit tch'il 'tait dêjà en ruinne dans l'seizième siècl'ye.
Eune grand' difféthence entre lé Mouoyen Âge et d'nouos jours est qué, d'après l'articl'ye dans la gâzette, l'Église dé ch't êpoque-là avait eune grande înfluence sus l's habitants d'Jèrri et qu' tout l'monde allait ès sèrvices, ouaithe tch'i' n'y'avait qu'les riches tch'avaient d'l'êducation et tchi pouvaient comprendre lé Latîn. Au jour d'anniet? Y'a pus d'monde tchi savent lé Latîn, mais pus d'monde tchi vont à l'aubèrge qu'è l'églyise!
George d'La Forge
Viyiz étout: