Le Ménage ès Feuvres,
St. Ouën.
Lé 9 d'octobre, 1976.
Moussieu l'Rédacteu,
Ieune des gâzettes dé chutte semaine nouos dit qué L's Êtats ont dans les chîn mille empliyés et qué v'la tchi nouos couôte dgiex-sept millions d'louis par an, eune somme tchi r'présente quarante-chînq du chent du r'vénu d'l'Île. Absolûment, i' dait y'aver tchiquechose dé mal là-dedans. Dgiex-sept millions d'louis? Quâsi la maintchi du r'vénu! Ch'est presque încriyabl'ye! Il est grand temps d'tchestchionner la nécessité d'ches "pay awards" dé tchi nou ouait pâler dans la gâzette et tch'aîguent à enflier telles dêpenses. Jé n'sai pon où'est tch'est lé r'miéde. En Améthique, lé r'miéde dans pathel cas es'sait dé réduithe la bureaucratie du gouvèrnément par dgix ou vîngt-chînq du chent.
Lé contribuabl'ye né vait qu'renchiéthe partout. Ch'est don eune bouanne nouvelle qué la gâzette du chînq d'octobre annonce en dîsant qu' les "British Midland Airways" s'en vont réduithe lé couôtement d'viagi dans lus avions par vîngt du chent. D'habitude ch'est l'contraithe!
Ch'tait mangnifique dé vaie qué l'exhibition d'bestchias ("show") des Trais Pâraîsses dé l'Ouest du mais d'octobre, à St. Pièrre, eut tant d'succès. Y'avait au mains chent huiptante bêtes à cornes à jugi, et v'la tchi m'faîsait pliaîsi d'vaie qué quâsi touos les propriêtaithes dé ches belles vaques ont des bouans vièrs noms Jèrriais. Ches jours qué nou vait tant d'vendues d'bestchias dans la gâzette, ch'est mangnifique dé vaie tch'i' y'a plusieurs fèrmièrs Jèrriais tch'ont acouo l'bouan sens et l'ambition d'garder des vaques et l'ordgi d'les montrer ès exhibitions. Lé portrait des Juges Clifford Pallot et Raymond de Gruchy dans la gâzette est supèrbe. Lus expressions d'concentrâtion sus l'problème d'aver à décider à tchi accorder l'prix quand ch'est dû d'en décider entre deux ou trais vaques tchi sont quâsi êgales sont si bein r'produites qué l'photographyi tchi les dessinnit vaut la peine d'être félicité. Et i' faut féliciter Sue Le Ruez étout pour san bouan rapport.
Les Juges dé la P'tite Cour continnuent à aver un tas d'travas. Les cas des motoristes tchi baivent et cachent en mème temps veinnent acouo sus l'tapis nonobstant les fortes amendes, et tchiquefais la prison, tchi sont l'ordre du jour à ch't heu dans la Cour. Et j'sis acouo d'avis qu'la vitesse est la cause d'un tas d'accidents d'motos dans les routes dé l'Île. J'l'ai mentionné tant d'fais qué j'né s'sais pon ravi d'ouï tchitch'un dithe "I' n'en chang'gea pon, chu vièr chagorne-là d'George d'La Forge!", mais j'm'en vais continnuer à l'dithe viyant qu'j'en sis bein pèrsuadé. L's accidents continnuent et y'a ieu des fatalités en conséquenche. Est ch'ti' pon sept dé tués d'en par ichîn ch't' année? I' m'sembl'ye aver veu chu chiffre-là dans la gâzette à ches drein. Et neuf ont 'té tués dans les routes en Dgèrnésy.
Et l'mêché des jannes malfaiteurs continnue. Y'en avait huit entre les âges dé quatorze et seize ans d'vant la P'tite Cour l'aut' jour, et iun d'giex-sept ans est pour aller d'vant la Cour Rouoyale. Il est temps dé c'menchi à présenter les pathents et mousses dévant la Cour en mème temps pour apprendre ès pathents la responsabilité dé l's êl'ver comme i' faut.
Les tempêtes qué j'avons ieu chutte semaine mé font penser ès vièrs temps quand ch'tait des navithes à vailes tch'avaient à les combattre en mé. Man Papa, tch'avait 'té naviguant et naûfragi, soulait m'en pâler au sé quand j'tions assis au pid du feu auprès l'thée. I' fallait êt' dueurs et aver du couothage pour pouver vivre souos les conditions qu'les naviguants avaient à enduther et combattre en plieine mé dans les tempêtes quand fallait fèrler les vailes, souvent dans la niet qu'nou n'y vivait lèrme. Ou à l'arrivée d'eune scouâle et qué l'navithe tchiyait quâsi à pliat, sustout s'i' v'nait d'êt' dans eune accalmie et tch'i' portait hardi d'vaile.
Mais ouaithe qué la vie du naviguant fûsse duthe et pénibl'ye, si un homme avait la vie d'la mé dans la couenne i' n'tait pon heutheux à tèrre pour longtemps. Mén oncl'ye Ph'lippe, lé fréthe à Manman L'Feuvre, tch'était contrémaître dans les grands navithes ès longs cours, êprouvit à travailli dans les storres en ville pour êt' auve sa fanmil'ye. mais i' n'put janmais y rester. Il eut à s'en r'aller en mé et ou fut sa gângne dé Dgi l'restant d'ses jours. Pour lî, sa rêcompense 'tait l'bonheu des jours tch'i' pâssait en fanmil'ye à tèrre auve sa femme et ses êfants, entre ses viages au large.
George d'La Forge
Viyiz étout: