Se fait l'Roué George, en r'gardant l'temps:
"D'la ply'ie à torrents touos les jours, -
Et fraidde! que j'en ai les daigts gourds!"
Se fait l'Roué George, en r'gardant l'temps.

Se fait l'Roué George, en s'frottant l'pi:
"J'ai un empliâtre, mais ch'est bein seux
Que l'temps à v'nin, m'en faudra deux!"
Se fait l'Roué George, en s'frottant l'pi.

Se fait l'Roué George en méditant,
Quand'i qu'j'tais hore j'ai t'y mantchi
Les biaux nièrs cats dans l'Vièr Marchi,
Se fait l'Roué George en méditant.

Se fait l'Roué George, en groumâchant:
"Un parapluie me f'thait pus d'bein
Que l'jaune bâton qu'j'ai dans la main;"
Se fait l'Roué George, en groumâchant.

Se fait l'Roué George, ov un soupi,
"Si seul'ment j'tais bein abriyè
Par un chapé d'la mode d'annièt";
Se fait l'Roué George, ov un soupi.

Se fait l'Roué George, en cl'yinn'tant l's'yièrs:
"Qu'ch'est d'tchi failli que l'gaz jerriais,
N'y'a qu'au clié d'lune que j'peux y vais;"
Se fait l'Roué George, en cl'yinn'tant l's'yièrs.

Se fait l'Roué George, en ritonnant:
"J'ouai d's'Avocats pâler tout l'jour, -
Y'a tchic bouann' vielle affaithe en Cour!"
Se fait l'Roué George, en ritonnant.

Se fait l'Roué George, (à san tout seu),
"Tch'est don' qu'y'a y'eu, à l'Hôpita,
Que l'Comité s'sait dans ch't'êtat?"
Se fait l'Roué George, (à san tout seu).

Se fait l'Roué George, bein amusè:
"L'Almanâ d'la Nouvelle, chutte fais.
En a-t-'i' don' du bouan jerriais!"
Se fait l'Roué George, bein amusè.

Se fait l'Roué George, en r'gardant l'Square;
"I' sont finis d'lus Elections:-
Daniel n'est pas dans l's'envithons!"
Se fait l'Roué George, en r'gardant l'Square.

Se fait l'Roué George es Députés:
"J'espéthe, amins, qu'ou-z'allez t'nin
Vos belles promesses... le temps à v'nin;"
Se fait l'Roué George es Députés.

Se fait l'Roué George, à Mess Berteau:
"La rue qu'ou r'griyis ov tant d'soin
Ou n'n'avait, ma fé! grand besoin;"
Se fait l'Roué George, à Mess Berteau.

Se fait l'Roué George au Bouan-houmme Noé:
"Oh! pouorr' vi, té r'vélo; dêjà,
Ov des patchets plien tan bissa'!"
Se fait l'Roué George au Bouan-houmme Noé.

Se fait l'Roué George à Maître Elie:
"N'en v'là bétôt assez, viyons!
Fiche me la paix ov tan crayon;"
Se fait l'Roué George à Maître Elie.

Elie
Nouvelle Chronique de Jersey 24/12/1910