St. Servan-sur-Mer,
France.
Lé 22 d'juilet, 1967.
Moussieu l'Rédacteu,
Quand j'tais en Angliétèrre dreinement à faithe lé tou d's abbayes et des cathédrales jé c'menchis par les cheinnes du côté ouêst du pays jusqu'à Edîmbourg, et j'visitis les cheinnes du côté êst en m'en r'vénant. J'avais hâte dé vaie la cathédrale dé Peterborough, dêdiée ès Apôtres St. Pièrre, St. Paul et St. André, viyant qué j'savais bein qu'un Jèrriais avait 'té êvêque dé chu diocèse-là.
Il 'tait tard l'arlévée quand j'arrivis-là, et la cathédrale 'tait freunmée, mais i' faisait acouo jour assez pour liéthe les noms sus les tombieaux dans l'chinm'tchièthe des mouaines aut'fais. Là j'y trouvis l'tombé en marbre tchi couvre la tombé dé l'Êvêque Jeune. Ch'est un simpl'ye tombé en forme d'rectangl'ye, neuf ou dgiex pouces d'êpaisseu, à pliat sus la tombé. Y'a eune simpl'ye crouaix sus la surface, et l'înmage d'un mitre sculpté au bas d'la crouaix. Lé tou des côtés du tombé est l'înscription, en Anglais: Francis Jeune, D.C.L. Né lé 22 mai, 1806. Consacré 25ième êvêque dé Peterborough lé 29 juin, 1864. Décédé lé 21 août, 1868. J'y r'allis d'bouanne heuthe lé lendemain au matin pour en prendre un portrait atout ma machinne à dessiner. Malheutheusement, l'solé 'tait à jouer à s'muchi driéthe les nuages la grand' partie du temps, mais j'espéthe d'en aver un bouan portrait quand-mème.
Dans la cathédrale mème, j'trouvis la pliaque sus l'côté du sanctuaithe à la mémouaithe dé l'êvêque, et j'fus êrmèrvilyi par chein qué j'vis d'ssus. Tch'il êcolyi, man bouanhomme! Né v'chin l'înscription: Francis Jeune, 25ième êvêque dé Peterborough 1864. Douoyen d'Jèrri 1838. Maître du Collège dé Pembroke, Oxford, et Chanoine dé la Cathédrale dé Gloucester 1843. Douoyen d'la Cathédrale dé Lincoln 1863. Né 1806. Consacré 1864. Décédé 1868. V'la tch'i' vouos fait ordgilleux d'êt' Jèrriais quand nou vait tchiquechose dé mème!
Ch'est eune mangnifique cathédrale. Comme bein d'autres oulle 'tait un monastéthe à c'menchi et fut bâtie sus l'empliaichement d'un vièr lieu d'tchulte en l'année 655 par lé rouai d'Mercia. Pus tard, ch'tait un monastéthe Bénédictîn, et un nommé Turold fut appointé abbé par Dgillaume lé Contchérant en 1069. Ch'tait lé Rouai Henry VIII tch'en fit eune cathédrale en 1541 quand il ordinnit la dissolution des monastéthes.
Y'a eune des pèrsonnages illustres entèrrés d'dans avau l's années, entr'autres Catherine d'Aragon (1483-1536), la preunmié femme dé Henry VIII, tchi la divorcit en 1526. Ou' mouothit à Kimbolton, dans l'Comté d'Huntingdon, en 1536, et san corps fut mîns dans un côffre en pliomb et porté à la cathédrale sus un ouadgîn, seize prêtres à j'va en tête et eune procêssion d'mêssieux et danmes, touos à j'va.
Eune aut' femme tchi n'eut pon d'chance dans la vie fut entèrrée dans la cathédrale. Ch'tait Marie, Reine des Êcossais (1542-1587), tch'eut la tête copée par ordre d'la Reine Élizabeth d'Angliétèrre lé 8 dé févri, 1587, dans l'Châté d'Fotheringay, dans l'Comté d'Northampton, à dgiex milles dé Peterborough. San corps fut apporté en procêssion et entèrré auve eune grande cérémonie dans la cathédrale lé preunmié jour d'août, 1587. L's êvêques dé Lincoln et d'Peterborough 'taient présents, et l'êvêque dé Lincoln préchit l'sèrmon.
En 1612 lé fis d'Marie, Jacques Six d'Êcosse, tch'était dév'nu l'Rouai Jacques Preunmyi d'Angliétèrre à la mort d'Élizabeth en 1603, ordonnit qué l'corps dé sa m'mèe fûsse transféthé d'Peterborough à l'Abbaye d'Westminster à Londres. La deuxième procêssion funèbre eut don lieu dans l'mais d'octobre, 1612. Jé n'sai pon trop bein tchi jour qu'ou' sortit d'la cathédrale. Ch'tait probabliément lé 5 octobre car le côffre fut mîns dans l'églyise d' All Saints dans la ville dé Huntington, tch'est à eune vîngtaine dé milles dé Peterborough, vendrédi, l'six d'octobre, quandis qué l'cortège s'èrposîsse pour la continuation du c'mîn pour Westminster.
Oulle est fanmeuse étout, l'églyise d' All Saints à Huntington. J'y pâssis un coupl'ye d'heuthes en passant par-là. Ch'tait d'dans qué l'fanmeux Oliver Cromwell (1599-1658) fut bâptîsit lé 29 d'avri, 1599. Lé r'cord dans lé r'gistre d'bâptèmes est en latîn, mais tchitchun êcrivit en d'ssus, en Angliais, probabliément dans l'temps d'la dgèrre civile, les mots La peste d'Angliétèrre pour chînq ans! (England's plague for five years!), et pis eune lîngne en encre fut mînse lé travèrs dé ches mots-là pus tard - mais i' montrent dans lé r'gistre quand-mème!
Y'a deux aut' èrmèrques dans les r'gistres d'l'églyise au sujet d'Cromwell. En 1621 i' fut r'prînmandé pour sa mauvaise condite, et en 1628 il eut à faithe amende dévant la congrégation dans l'églyise pour la mème chose! I' faut don penser tch'i' n'tait pon un ange dans san janne temps! Ses pathents sont entèrrés dans l'églyise, et y'a un bieau monument d'li dans la ville.
L'histouaithe d'Angliétèrre, et les jouaies, peines et mînséthes d'un tas d'ses pèrsonnages illustres sont hardi r'cordées dans les r'gistres d'ses églyises et sus les muthâles dé ses vénéthabl'yes cathédrales!
George d'La Forge
Viyiz étout: