Le Ménage ès Feuvres,
St. Ouën.
Lé 22 d'juilet, 1972.
Moussieu l'Rédacteu,
J'ai tréjous pensé qu' l'Êglyise dé St. Brélade est ieune des pus belles de Jèrri. Ch'est vrai qu'la cheinne dé St. Sauveux est pus grande et pus împosante à l'exterieur, et certainement pus “symetrique” en d'dans (à m'n idée ou s'sait apte à êt' la Cathédrale si Jèrri dév'nait un Diocese) mais quant à mé, ch'est la cheinne dé St. Brélade tch'i' m'pâsse lé pus près du tchoeu comme églyise parouaîssiale. Auve sén air sombre et ses supèrbes f'nêtres, et ses deux autels où'est qu' La Saine Cène à 'té célébrée duthant pus d'huit chents ans, oulle a un atmosphéthe de mystèthe sanctifié par les prièthes, la jouaie et les lèrmes des fidèles, et l'chant du Gloria in Excelsis avau les siecl'yes.
Ch'tait dans s'n Êcole du Dînmanche qué j'gangnis ma Grand' Bibl'ye et j'fus maître pour tchiques années auprès ch'la. Et j'tais dans l'chant d'l'églyise et “sèrvant” à l'autel à La Sainte Cène. Moussieu Balleine 'tait l'Recteur idéal - un vraie péthe à san troupe, il 'tait aimé d'tout l'monde.
Pus tard, quand j'mé trouvis au Cannada, j'vîns à connaître un minnistre-là, né en Jèrri, tch'avait 'té ordinné Diacre à Almonte. Ontario, et Prêtre dans la Cathédrale du Christ à Ottawa - lé Révérend William George Tabb - et quand j'arrivis en Jèrri en 1946 j'eus l'pliaîsi d'lé r'vaie, chutte fais installé comme Recteur dé m'n églyise favorite. Et un autre anmîn d'man janne temps, l'Sieur Tom Minchinton Duffett, 'tait lecteur. J'tions “sèrvants” et “acolytes”, Tom et mé à l'Églyise dé St. Simon justément d'vant la grand' dgèrre dé 1914-18, et j'feûnmes soudards ensembl'ye pour eune volée dans l'Armée Britannique à la dgèrre. Hélas! I' n'sont pus du rang des vivants, ches bouans vièrs anmîns.
Y'a longtemps qu j'ai ieu envie d'vaie La Pèrque èrmontée à sa vielle pliaiche sus la poutre (“rood beam” en Angliais) à l'entrée du tchoeur dans nouos églyises, et j'ai ouffèrt au Révérend Tabb, dans san vivant, d'en installer ieune à l'Églyise dé St. Brelade à mes frais, mail 'il avait peux d'accepter viyant tch'i' pensait qué tchique grôsse tête dé sa congrégâtion créthait qu' La Pèrque pathaîtrait trop “Catholique” - eune objection qué j'trouve riditchule quand j'pense qué touos les dînmanches j'disons dans l' “Credo” qué j'criyons à la Sainte Églyise Catholique et Apostolique!
Y'a si longtemps qu' La Pèrque à dispathu d'nouos églyises qué y'a probabliément un tas d'gens tchi n'savent pon tch'est qu' ch'est. Eh bein, ch'est un crucifix jutchi sus l'mitan d'la poutre à l'entrée du tchoeur, auve la Sainte Vièrge d'un côté d'la Crouaix, et St. Jean d'l'autre, et ch'est d'là qu' la vielle expression Jèrriaise “Haut comme St. Jean des Pèrques” est provenue. Y'en avait dans nouos églyises dans les vièrs temps, comme dans l's églyises dé La Nouormandie Continentale et des pays Scandinaves. Nou les vait acouo dans les vielles églyises dé Norouague et d'La Suède, et y'en a d'belles dans certaines cathédrales en Angliétèrre, dé tchi la cheinne dé “Bath & Wells” en est ieune. En Nouormandie, La Pèrque a dispathu à m'suthe qué l' “jubé” (la poutre) est dév'nu vèrmoulu, et i' n'ont pon 'té généralement rempliaichies à cause du manque dé finnances.
Y'a eune légende entouorre l'Églyise dé St. Brélade tch'a 'té racontée par l'Académicien Fraînque Le Maistre dans les Bulletîns d'L'Assembliée d'Jèrriais, tchi vaut la peine dé répéter ichin, car y'a probabliément un tas d'St. Bréladais tchi n'l'ont pon liue.
Dans les touos vièrs temps il avait 'té décidé d'bâti l'églyise tout près d'un sanctuaithe païen a l'êst des grèves dé St. Brélade. Bein des viages dé pièrres y fûdrent portés, et les fondations c'menchies. Mais quand l's ouvrièrs èrvîndrent lé lendemain i' trouvîdrent tch'i' n'restait fistuthe dé pièrre, matchiéthe ou ôtis. À lus grand' surprînse i' trouvîdrent toute la pièrral'lie amouochelée, et lus ôtis à côté, d'l'aut' but d'la grève, allant ouest. Dans eune niet, toute la pièrre et tout l'bataclian tch'avait prîns des s'maines à tchithier en pliaiche avaient 'té transportés d'un but d'la grève à l'autre! Ché n'tait bein seux pon des gens ordinnaithes tch'avaient enl'vé et r'mué ch'la si vite! Enfin, l's ouvrièrs èrportîdrent pièrre et toute la pêque au preunmié empliaichement, mais mème turluthe chutte deuxième fais. I' r'trouvîdrent tout èrtchithié en tâssé au mème bord à l'ouêst d'la grève. Ch'est en tchi, pensant qué ch'tait lé d'si du Bouan Dgieu, l'églyise fut bâtie là où'est qu'ou s'trouve à ch't heu!
Mais y'eut hardi d'rêjouissance parmi les p'tits faîtchieaux dans lus d'meuthe dans l'sanctuaithe païen à l'êst d'la grève. Il' 'taient raide contents quouaiqué bein lâssés. Ch'tait ieux tch'avaient r'porté tout à bras et sus lus dos au ouêst d'la grève!
George d'La Forge.
Viyiz étout: