 |
 |
Pour coummenchi, le hâvre fut bâti coumme il est à ch't heu pour la pêqu'rie d'hîtres. La preunmière veue au but fut allumée pour la première fais le 24 de mar, 1849. La sienne tch'est là à ch't heu fut meunse là, dans l'année 1896.
Dans 1606 la pêqu'rie d'hîtres 'tait connue en Jèrri, mais ch'tait paus devant 1755 que y'eut aoutcheune règle faite pour conduithe la pêqu'rie. I' soulait y'aver tout pliein de sabat entre les Jèrriais et Français et eune fais y'eut eune révolte. Les soudards vuntent de la ville ; y'en avait trais chents de iaieux et i' muntent chent pêtcheurs souos arrêt.
Dans 1824 y'avait 300 batchiaoux et 1,500 pêtcheurs et 1,000 filles et garçons en travaux sus les pars (parcs). Dans 1835 n'y'avait que 108 batchiaoux et 505 pêtcheurs et la pêqu'rie se mollit p'tit à la fais.
À ch't heu, dans les 1850, i' coummenchîtent à bâti des navires pour aller à Terreneuve. Y'avait les chantchièrs de Jean Fauve, Marc Cantell, Bellot et Noué, Chs. Aubin et Jean Picot, de tchi qu' chu Mess Picot bâtit l' “Union” pour Moussieu Robin. Et d'sus l'même chantchi, à Mess Picot, le “Cecilia” d'valit en 1886, le derni navire bâti en Jerri pour aller à Terreneuve. Un autre navire bein connu 'tait le “Red Gauntlet” nommé après le yacht a Lily Langtry. À ch't heu n'y'a rein qui reste des chantchièrs ; eune nouvelle route est là à la piaiche. La route fut coummenchie en 1882 et finnie en 1892.
En 1888 les Êtats acatîtent un morcé de muraille de Moussieu Douglas Le Bro et i' muntent eune rouoge veue pour faire un alignement pour entrer à la niet dans la caouchie.
Dans 1860 un navire fut bâti sus l'haut d'la Dgérande (La Garenne), en brigue et ridgi coumme eune bèrque à trais mâts. Ch'tait pour êlever des garçons pour aller en mé, et il 'tait là dans un clios.
En 1833 l'égyise de Gouôrray fut ouverte, pour dounner des services ès pêtcheurs et les matelots des navires de dgerre qu'étaient dans l'havre.
J'ai veu dans l'hâvre, a différents temps, le “Mistletoe”, “ Raven”, “Albercore” - navires de dgerre - le “Cotentin", tch'allait à Pourbas (Portbail), le “Cygne” à Carteret, le “Flying Foam”, “Graphic", “Conqueror“ et dautres tch'allaient à Terreneuve; d'autres acouo qu'apportaient du fain et d'la volaille de France. Quand les batchiaoux apportaient du tcherbon il 'tait vendu a 15 chelins le long du bord, le tounné.
Le hâvre fut fronmé pour tout trafic en 1933. En 1940 les Allemands pruntent cherge et touos les batchiaoux avaient à être muns à sec, excepté les batchiaoux d'pêque; mais iaieux avaient à être muns au haut du hâvre pour la niet. La préchaine chose i' muntent un chemin d'fé et i' v'naient de la carrière auvec d'la pierre pour chergi lus navires, et il' emportaient du sable étout. Pus tard quand i' perdîtent la Normandie i' vunt trais grands batchiaoux et i' restîtent la jusqu'a la Libération. Auprès ch'la i' vunt des navires angliais pour transporter des canons, d'l'amunition et bein d'aut' choses pour env'yer à la mé.
Bein du grand monde sont v'nus par ichin ; la Duchêsse de Kent et sa fonmile ont demeuré a Gouôrray et le Duc de Gloucester et la Duchêsse ont embertchi à bord d'un navire de dgerre pour aller visiter Les Êcréhos.
Par Léopold George Godfray, Maître d'Port à Gouôrray, un ancien Grouvillais
Note dé rédaction.-Lé Sieur Godfray nouos ayant env'yé chutte petite articl'ye, j'avons pensé qu'ou n'manqu'sait pon d'întéthêt pouor les lecteurs du Bulletîn. Ch'est en tchi, auprès un mio d'rédaction, j'la donnons pouor mouontrer les grands changements tch'ont ieu lieu à Gouôrray, comme par ailleurs. Les lecteurs pouôrront noter certains mots tchi sont êcrits comme nou les prononce à Grouville, par exempl'ye : “ Les soudards vuntent...", “ . . . et i' muntent chent pêtcheurs . . . etc.
Lé Bulletîn d'Quart d'An dé L'Assembliée d'Jèrriais
Viyiz étout: