CHANT PREMIER.

Au pi des murailles d'chu noble et vier châté,
Que d'pis tant d'années la mé vingt bagné,
Et d'iou qu'nou peut vaie, sus les côtes de France,
Des maisons, des moulins, et l'cliochi de Coutance;
Des sablions, des roquiers, de p'tits et d'grands batiaux,
Qui vont et qui vennent, qui remuent chu ches iaux;
Est un hâvre qui naguères, pouore, calme et tranquille,
Contenait trais batiaux touonés sus lus quilles,
Des mouochiaux d'gallots et d'écalles de baînin,
Pus d'unne sale mare oué nageait du fretin,
Du vraic, unne vieille ancre, deux dranets et une sène,
Unne corde à siqui des c'minsoles sans guènnes,
Siex cliavets à houmards, quiques avirons,
Deux s'trais bijueuques qu'nou zappelait maisons,
Et d'éfans cracheurs qui, manque de braies,
Se vautraient dans la vase, comme des bêtes à saie.
Mais d'pis qu'acheteurre nos Messieus d'Zétats,
Baillent tant de lus goule, et font tant d'embarras,
Et qu'nos savans Ministres, ov tout lus zesprit,
Ne disent quasi ren sur les lois de Gêri,
Et qui laissent tout couore, comme ava le russé,
Comme si zavaient peue seulement d' ouvri le bé.
Faut y sétonner qu'les affaires vont de travers,
Et qu'nou s'en sé print ès pouores hitriers,
Qui ne pensaient guères au mitan d'lus travas,
D'avé ren à démêler ov Messieus des Etats......
Autefais du mains, sus les vielles hîtrières,
J'pêquions tranquillement, comme faisaient nos grand'pères,
Mais v'la tout d'un coup, que par un biau matin,
Y s'avisent 'nou ne sait trop, par qui l'évrédin,
De nos faire eune Cauchie, et de trébuqui des sou,
Pour rappréchi Gouoray des roquiers d'Echréhou.
Belle avène, cryious poun? Et en vraies têtes craquies,
Cryiant qu'l'zitrières étaient toutes énaquies,
Les v'la un biau jour, tout et ben ébahis,
Qui fouôttent dans la mé, quatre et chent mille louis!
Cryiant s'mé d'zitres comme nou séme du persi,
Dans l'fins fond d'la mé, ou ben sus le gravi.
Et ch'qui lia d'mus ocouore, ov tout chunna,
Chest qui nos d'fendirent d'allé pêqui par là,
Ni sus les viers bancs oué j'allion naguères,
D'vant qu'd'être braisis, avec nos bouons grand-pères.
I criyaient nos faire craire, à nous viers gaillards,
Qu'nou prend les pêqueurs comme nou happe des hommards;
Mais j'lus fimes bétôt vaie que, maugré lus caquet
Nou peut, aussi ben qu'ieux, d'visé au cabaret.
Et v'la qu'un biau matin, siez le vier Méce Coutanche,
Tandis qui baragouinaient â ieune de lus Séances,
J'nos rassemblièmes tous, et jurêmes, par ma fé,
D'lus sauté sus l'co, et d'lus châqui la pé,
Si r'fusaient d'entendre toutes les belles raisons
Que j'avion fait mettre dans nos pétitions......
.....I' refusent!...... J'l'apprenon!..... et les v'la qui dé hallent
P'tit à p'tit d'chute Cohue, là oui zont lus Salle:
J'lus sauton sus la frippe, et dans deux strais coups,
Je les êtravelimmes bétôt chen d'sus d'sous.
Nou zen happi iun par ses deux pannées,
Deux autres rouôlirent bas, touos êtravelés;
Les uns halent par ichin, les autres par ilo,
Ch'tinchin culbute ch'tinna, et se rompt quasi l'co.
Et si ch'navait poun tet pour lus diantre de valetaille,
Lus police, lus bâtons, ch'tait à nous la bataille;
Car j'en happi iun pa l'frouquet de ses braies,
Et chaquis la bédaine à pus d'un villais,
Qui s'rappelront de mé d'ichin à quique temps;
Ch'qui lus apprendra à se moqui des gens.
Enfin, renforchis par un pus grand nombre,
Et nous effrités par un spectre ou unne ombre,
Qui vint se plianter sus les d' grés d'la Cohue,
Nos égaluer tous, et nos bailli la brélue,
(Ch't'ombre était chenne du vier Monsieu Molé,
Un vrai revenant, qui vint à tous nos pâlé,
Et qui quitti sa tombe, où il 'tait d'pis chent ans,
Exprès pour nos vengi et faire peue ès enfans,)
Si tant et si ben, comme j'vos le disais acheteurre,
Que nos gens effritais se minrent touos à coeure;
Et couorirent si ben qui se trouvirent en prison,
Touos enfantomés par chute sac..... vision.
Tout che que vos dis là est vrai, sus parole,
Demandez-le plutôt à mon vaisin Nicolle:
Ou si ou ne voulez poun craire un pouor vier pêqueux,
Vyis l'zautres paraisses: passez par Saint Sauveux;
Ou si ou zaimez-mus, couorez jusqu'en ville,
Et pis venez me dementi, mé qui demeure à Grouville;
Ben qu'à dire vrai nou m'a dit que je fus né
Dans la Ville-à-l'Evêque, paraisse d'la Trineté;
Et que Jeanneton ma femme sait sortie de St. Martin,
Tout che que je conte là, n'est poun du gnolin......
En prison encliavés, i nos firent un procès,
Je m'en déhallis mé, atou de nettes braies;
Les autres viers garçons s'en revinrent à Gouray,
Putot que d'renne faire, ramasser du vraiq:
Mais d'senfautomés ches hîtres nos tentaient,
Et pis ches Anglais y nos les happaient,
J'nos mimmes donc d'ov ieux; et fummes en flottille,
Dragui comme devant, sus les bancs de Grouville.

CHANT DEUXIEME.

Aimable Déesse, qui par monts et par vaux,
Chevauche et vais partout, sans hernais ni j'vaux;
Qui voles comme le vent, et qui dans un clin d'gui,
Va de Rome à Paris, ou de Londres à Gêri;
Qui quiquefais vins épié chè qui se fait en ville,
Et dans un p'tit saut, va le conté à Grouville,
Aimable RENOMMÉE! qui étais à Gouray
En mil-huit-chent trente-huit, le douzième jour de Mai,
Vétan donc nos conté qui furent les malheurs
Qui m'nichirent chu jour-là, les endiantrais pêqueurs.
Cryiais ti donc, ches gens, qu'nou les laisse'rait pêqui
Sus les bancs de Grouville pour les ênaqui,
Et qu'nou les lairait, les laidures qui sont,
Se moqui des lois, et des gens qui les font.
Nânin, nânin, pardingne: et pourtant ou verrez
Qui s'fichaient des gens jusques souos lus nez.
I'n'se contentaient poun d'aller dragui la niet,
I'ziallais de méjeu, i'ziallais à minniet:
Tant et si ben qu'un jour, et ch'était le neu d' Avri,
Sus la Frouguie des Grèves, i s' en furent tous pêqui.
La Police eut vent de tout chés menées
Que faisaient chés gaillards à toutes les marées,
Et l'zavaient avertis déjà deux strais fais
Que s'i persistaient à violé ainchin les lois,
Nou ferait san devé, et que, bouan gré mau gré,
Nou les saisirait tous à quique bouan saquet.
I' n'en tinrent aucun compte. Eune fais hors du Hâvre,
Qu'est qu'îrait l'zempêchi de dragui sus chu sable?
Qui couorerait souotre ieux, eune fais dans lus batiaux:
Serait-che la police, juquie sus d'zanimaux?
Qui vins-je don nouos saisi, qui vennent donc y-éprouvé,
Je les jetteron à liau, je les flianqueron dans la mé.
Vla partout les d'vis de la rebellion,
Nou pâle comme des gens qu'iont perdu la raison.
Nia poun de gnolin, nia sorte de sottises,
Que n'disaient entr'ieux, au mitan de la brise,
Qui poussaient les batiaux en touos sens dans la baie,
I pêquaient, y chantaient, i zetaient dans la joie;
Mais tout d'un coup, ne v'la que bétôt i zepie
Un cutter ben monté, qui sort de la cauchie;
I regardent...... ch'est l'INCA, le baté des Etats,
Qui s'en venait vers ieux; i n'sy attendaient pas.
Ossin! i demeurirent sots comme des lanchons
Qu'nou vendait autefais dans de petits guichons;
Tout de même, nou ne put pas ocuore les saisi,
Mais nou mint touos lus noms sus unne fielle de papi;
Et le jour en siévant l'affaire de chu jour,
Nou zeut soin de la mettre souos les yeux de la Cour;
Ch'est là qu'i l'ien eut d'dit, et ben long et ben large,
Contre les pêqueurs qu'avaient commis cht'ouotrage,
Et qu'avaient touos juré sus lus ptits et grands diables,
Qui s'vengeraient chu coup-là sus lus Connétables,
Et qui les paieraient à Gouray ou à Grouïlle,
Des coups qui z'savaient rechu dans le marchi en ville:
La fais que l'Zétats à tort ou à rason,
Lu défendirent de dragui sans lus permission.
Quand la Cour ouit chunna, Dame! i l'iu douc biau gi
Parmi les gens de justice qui faillirent lus mâri.
Sait peue ou prudence, nou ne sait pour trop bain
La Cour renv'ya l'affaire ès Etats le lendemain.
Dame! ch'est que d'chu coup g'navait poun de qui rire,
Car, l'Généra y était, et c'hest assez vos dire,
Qu'les Messieus de la Cour, appyés comme i zétaient,
Soûtiennent qui fallait taire respecter les lois:
...... Nou ne perdit poun de temps, comme ou l'vyis bain,
Car, nou bailli d'zordres pour que le lendemain,
L'Artillerie, la milice du Régiment de la Ville,
Iraient ov les Rifles jusqu'au delà de Grouïlle,
Pour aigui la Police à saisi les pêqueurs,
Qu'nou pouvait ben appeler de misérables pécheurs.
Sitot dit, sitot fait; nou va trouver BRAMHALL,
Qui se trouvait par chance dans Medical Hall,
Marchandant eune purge pour réduire la bedaine,
Qu'i porte au Dimanche comme ès jours sus semaine,
Pour li dire d'allé, atou sa grosse clioche,
Dans les rues de la ville, et ouvri sa p'tite bouoche.
Et crier, "Es armes, citoyens! la PATRIE en dangi
"Requiert vos services, chest mé qui vos l' dit;
"Montrous intrépides comme de vaillans garçons,
"Pour demain, à neuv heures, naitissis vos cannons,
"Et que dans le Marchi là oué nou vend les bêtes,
"Qu'nou vos vaie tous au nombre de siez chents têtes."
A ch'tappel nationnal, chacun se mint en d'vé
De prendre ses armes et de les ben écuré,
Pour qui parussent mus ès rayons du solet,
Qui devait lière le lendemain au Hâvre de Gouoray.
Je n'vos dis pas ichin par comben de raisons
Les femmes, filles et mères forchirent de lurons
A rester malgré ieux à soigni lus travas
Pûtôt que d's'exposé au dangi des combats......
......Tout chu train et chu brit, et chés cris d'allarmes,
A pus d'eune hardelle fit coulé des larmes;
Car si chés pêqueurs allaient donc lus mâri,
Tiré sus nos gens, et nos les trébuqui.
Mon doux père bénin!...... Non, i nieront pas,
Ou ben chessa d'forche qu'nou l'zarrachera d'nos bras.
Malgré chés belles raisons, chés cris, chute cliameur,
Les villais se condirent avec gloire et honneur,
Et dès le lendemain, Artilleurs et Soudards,
Se trouvirent rangis souos lus Etendards;
Et ben certainement que les Cannoniers,
A se rendre à Gouoray, ne furent pon les dreniers;
Les Piffres et les Tambours, et jusqu'à la musique,
Tapaient et sufflaient sans avé la colique;
Les Grenadierts étou, et la Light compainé,
En bouan nombre yétaient; car j'les vi passé,
Ayant à lus tête, juqui dans d'zêtriers,
Lus vaillant Coronel, et touos lus zofficiers.
......Arrivaits à Gouoray, au pi des murailles,
Tout prêt du vier châté, i s'rangirent en bataille,
Tandis que la Police fut saisi mes mignons,
Qui n'ôsérent dire mot en vyiant ches canons,
Qui l' zéraient culbutais au fin fond de la mé,
Si z'avaient ouert la goule ou seulement cligneté.
......M'n'histoire est quasi dite; car touos les hîtriers
Furent saisis p'tit à p'tit, et fait prisonniers.
I zurent peue chute fais là, et baillîrent caution,
Aimant mus payï que d'aller en prison.
Et quand chute affaire fut toute arrangie,
Nou bailli ès soudards à mangi unne bouchie.
...... Mais j'oubliais d'dire que chu pouor Généra,
Qui c'mandait l'zhommes empiéri san ma;
Car il 'tait malade, et malgré les docteurs,
I voulut s'rendre là ouè l'appélait l'honneur;
Ben ma lien print: car i vint de pière en pière:
En mourut, et enfin fut porté au chimetière,
A travers les rangs de toute la milice,
Qui en le regrettant, l'y rendaient justice......
......Mais, je vais trop loin: allons pus douochettement,
Devant qu'de pâler de sa belle enterrement,
I faut que ma Muse un p'tit brin s'repose,
Pour vos dire bétot quiqu'autre triste chose.

CHANT TROISIEME.

Pâlé d'enterrement à abon de bouones gens,
Chest rêvelli en ieux de divers sentimens:
Rappellé ès un qu'à tet jour de l'année
I furent à tet bord prendre eune bouone ventrée.
Souos prétexte d'honorer la mémoir d'un vaisin,
I se stoffent la bedaine de gâche et d'bouan vin......
Chest rappeler à d'autres le chagrin qui zurent
Quand lus père ou lus mère, ou lus p'tits mouorurent,
......Je me rappelle ocouore de chu temps naguère,
Nia déjà ben ben d'zannées, quand mouorut grand-père.
Niavait pon tant d'orgui quand j'tais p'tit garçon;
Car j'fu au chimetière en rouoge cotillon,
Condit par la main d'man père, qui portait
Les braies de corderai que grand-père laissait;
Et qui fut consilli, pour paraître pus triste,
D'allé emprunté la casaque du Ministre;
Car, dans chu temps ilo, quand j'étais qu'un avé,
Niavait qu'les Ministres qui s'habillaient en né.
Et man chier père qui déjà n'est pus,
N' avait qu' eu ne casaque pas dà mainqui blue.
Ma pouore mère qui plieurait, ov sa robe de serge.
Qui ne liavait couôtet que douze sous la verge,
Avait pus d'chagrin que ses belles vaisinnes
Qui baillent eune écu pour lus bombézinnes,
Ou qui s'affublent anniet dans des bonnettes de souaie,
Faisant minne de plieuré pour mus cachi lus jouaie,
Et montré ès curieurs lus finnes tailles pinchies,
Par-dessous lus belles robes, quand i sont ben lachies.
Hélas, mon Grand Gui! Ou est don chu vier temps,
Quand tout le monde plieurait en siévant ses parens
A l'Eglise, au chimetière, sans jamais avé creu
Que le chagrin se nichait autre que dans le cueur.
A ch'teure chest des Neuches, nou s'habille à grands frais,
Nou dirait que les morts s'en vont tout exprès
Pour donner occasion de rempli la maison
De gens qui n'y vennent que pour faire carillon.
Faut des cyrpes et des gants, des porteurs, des prieurs,
Des gens à gages, des mangeurs, des plieureurs,
Unne herse et des g'yaux, ov la tête emplumée,
Qui coûtent pus de frais q'nou n'gagne dans l'année.
Ah! si dans le chimetière mnon graud-père se dréchait,
Du temps et des coutummes, hélas! quest qui dirait,
'Rconnaitrait i, parmi ches biaux habits,
Ses enfans et les leurs; ses grands et p'tits fils.
'Rprenons notre sujet, et ne batignolions pus
S us ch'qui se fait siez les gens où ch'qui se passe dans la rue;
Que le monde sait plein d'orgui, qu'est qu'ou voulez qu'jy faîche,
De les en piccagni, est che que ch'est la ma plièche:
J'ai ben d'aute chose à faire: et vous qui en grignis,
Valous d'abon mus qu'ieux: étous ben mus rassis?
Quand ès enterremens ou zallais vos landrer
Est-che pour baire ou mangi, ou est-che pour y pleurer?
Qu'il en sait ch'qui voudra, je veux ben vos en craire,
Ainchin si ou voulez, j'm'en vais fini m'histoire....,.
......De même qu'le brave PIERSON, au péri de sa vie,
Mouourit en combattant pour sauver la patrie,
Et quit bas raide mort, en entrant dans l'marchi,
Aderchi par unne balle qui vint le trébuqui.
De même le brave CAMPBELL, en allant à Gouoray,
Print fraid, et mourut le douzième jour de Mai,
Au grand regret de tous, et de l'ile toute entière,
Qui regrettait en li un bouon homme, un bouon père.
Ossin fallut vée, comme chacun s'fit un d'vé,
D'aller à s'n'enterrement pour montrer san respé.
La Cour et les Etats, ainchin qui le devaient,
Ordonnirent un grand deu parmi touos les Jêriais,
Et partout la Milice, souos les armes appelée,
Vint ocoure embelli chute ben triste journée.
Soudards et Officiers, tant à pi qu'à cheva,
Infanterie, cavalerie, chest à qui y vindra.
Chacun dans ses quartiers, s'assemblit de bouone heure,
Pour sière lus Généra dans sa triste demeure.
Des diverses pâraisses, nou les vit touos en ville
Dès neuv'heures du matin, pour se rangi en file
Dépis la Grand-Maison là oué le corps gîsait,
Tout le long des rues par là oui devait passé.
Et formant ainchin deux longues rangies
Formés par les soudards des basses compangnies,
Qui stréchaient lus rangs depis Saint-Sauveur
Jusqu'à St. Héli dans toute sa longueur.
Entre'chès deux lingnes le corps devait passer,
Pour se rendre à l'église, où n'ou devait l'enterrer.
Mais qu'est qui pouora dire d'une manière intègre,
L'ecliat, l'ordre, la pompe, de chu convoi funèbre,
Solemnel et grave, triste et mélancholique,
Et les échos plaintifs de chute noble musique,
Et le bruit des canons, mêlé à la douleur
Es sangliots, ès soupirs d'une famille en pleurs?.......
Eprouvons pourtant: car comme dit le proverbe,
Qui n'risque rèn n'a rèn; et quouéque Poète en herbe,
J'verrai si je pouorai vos bailli quique idée
Du spectacle inoui de chute belle journée.
Tandis qu'n'ou z'allignait de touos côtés la troupe,
Tout le monde remplissait partout la grand'route
Qui condit à l'Hôtel du Lieut'nant Gouverneur,
Ouè nou zavait pliéchi unne belle garde d'honneur.
A douze heures justement, que d'vait être le signal,
De mettre en marche chu cortège funéral,
Le bruit du canon, tiré du châté,
Vint dire à tous qui l'était temps de remuer.
Ah Dam! fallait vée comme nou se rengorgeait,
Souos s'n'uniforme pour paraître pus bé;
Et comme les cavaliers sus lus g'vaux sé dréchaient,
Pour montrer lus plumasses et strétchi lus bianche braies.
Si tôt que d'marchi, les ordres furent données,
Nou levi les guérets et ermui ses pannées.
Le premi qui en tête (pas des g'vaux, je vos prie,)
Qui ouvrit la marche, était de l'Artillerie,
Siévi de Troopers touos ben éperonnés,
L'épée nue au poing, et touos ben montés.
Pis les Laïte Compagnies de touos les régimens,
Formant un bataillon, serrant touos ben lus rangs;
Les armes renversées, et marchant douochement,
Par sub-divisions, d'un pas ferme et dolent;
Après ieux venaient lus bruyantes trompettes,
Qui chu jour-là avaient perdu lus luettes;
Pis venaient les Grenadiers, formant un bataillon,
Egalement distribués par sub-division;
Pis nou z'entendait un chant mélancolique,
Que jouait tristement unne belle et bouone musique.
Sievait après ch'la, en rangs ben serrés,
Deux s'trais compagnies de Carabiniers;
Soudards aguerris à de rudes exercices,
Et qui r'hauchaient acouore l'écliat de la milice,
Marchant d'un pas ferme, le corps renversé,
Draits comme unne perque, sans nul bord r'gardé.
Driëre ieux lus musique, de Bugles composée,
Modulait des accords mollement cadencées:
Pis de trieze bouches à feu, composant l'Artillerie,
Avec touos lus hommes i'zétaient siévis;
Chaque pièche renversée, en signe de deuil,
Précédait de loin le cortège et l'cercueil,
Accompagnés de lus ben bouonne musique,
Et du feu Gouverneur les fideles domestiques.
Pis v'nait les clercs, appelez-les les commins,
Ov d'zhabits d'nier drap touos neus et touos fins;
Et pis les Ministres de l'Eglise Anglicane,
Et les douze Recteurs des pâraîsses de campangne,
Et le Vice Doyen, dans lus robes traînantes,
Ov des cypres, et des gants, et d'zécharpes fliottantes,
Tous, deux à deux, i marchaient gravement,
Comme nou dé marchi à eune enterrement.
......Portet par siex soudards, dont trais de chaque bord,
Objet de touos les r'gards, v'nait enfin le CORPS:
A chaque coin du drap, était un Coronel,
Un Majeur, ou Cap'taine, en grand deu solennel.
Pis drière le Corps, venait un ben biau cheva,
Qu'iavait appartenu à chu pouore Généra.
Chest drôle, mais chest vrai que chu g'va allait d'avant
La Cour et les Etats, les amins, les parens.
A côtet des parens, ov de naires êcharpes,
Marchaient d'zaîdes de camp en lus rouoges casaques.
Pis v'nait tout seu, tranquille comme Baptiste,
Le Député-Gouverneux, qu'iavait donnet la liste
De touos cheux qui devaient patacoue marchi
D'pis Saint Sauveux jusqu'au Vier Marchi.
Le Bailli apèrs li, en toute grande tenue,
Marchait tristement ov toute la cohue.
Deux à deux nou viyait les Membres de la Cour,
Divisaits qui sont, réunis en chu jour,
Tous ov lus Robes, les eunes naires, les autes rouoges,
Nou zérait creu vée des pies et des rouoges-gorges.
I ne faut pon zoublié que parmi chés personnes,
Se vyiaient étou l'zofficiers de la couronne,
Dénonciaters, Avocats et même l'Huissier,
I l'iétaient tous; car je les vi passer.
Jusqu'à la Masse, présent du bouan Rouai Charle,
Qu'nou vé à la Cour, à l'Audience, dans la Salle,
Et le grand Sciau, don du Rouai Edouard,
Fut chu jour-là montret à touos les regards.
Après la Cour, et tous chés biaux Messieurs,
Venait de la Reine les deux R'cheveurs,
Suivis des Soudards dabord les Frégades,
Et pis des matelots, qui formaient eune escouade
Qui maugré lus voulé, en marchant tortillaient
Et r'hauchaient d'temps en temps, les cheintures de lus braies;
Pis venaient l'zofficiers de la marine royale,
Gen s accouotumés ès vens et ès rafales;
Enfin après ieux, un flioquet de bouones gens,
Qu'à les nommé tous je perdrais bén man temps.
Tandi qu'tou chu monde avanchait de la sorte,
L'avant-garde était venue tout oprès de la porte
De l'Eglise, dont la clioche sonnait tristement
A chaque minute, attendant l'enterrement;
Et bétôt les cannons, par la rue des vingnes
Quittirent le cortège, d'après la consingne,
Et furent se rangi (j'entends l'Artillerie)
Tout le long des quais oprès la cauchie.
Les soudards qui faisaient la garde d'honneur
Etaient c'mandés par Coronel Couteur,
Aide-de-camp du Roi, acheteure de la Reine,
Et qui print bèn du soin, et s'donnit bèn d'la peine
Pour moustré ses hommes, villais et campagnards,
Qui en chu jour-là, étaient touos des soudards.
......Arrivés au chimetière i les fit arrêter,
Et touôné lus armes, et pis se retouôné
Sus deux leignes bèn rangis appiets sus lus fusils,
Endrait l'zuns d'zautres, et tous vis-à-vis.
Et pis le cortège, venant p'tit à p'tit,
S'en fut à l'Eglise, en croisant le Marchi,
Au mitan de la troupe, et d'un mouoché d'gens
Venus touos exprès pour vaie chés rassemblemens.
Un soudard pliéchi sus la tour du cliochi,
Devait faire un signa, le service fini,
Pour que les canons tirissent lus rondes,
Quand nou descendré le corps dans la tombe.
Et quand tout fut paret, touos les grénadiers
S'en furent chacun, dans chacun lus quartiers,
Et les Light Bobs étou furent se r'plièchi
A la tête des Régimens doué i zavaient sorti.
Bétôt les musiques c'menchirent à sonné,
Ch'tait le signa à tous d's'en retouoné,
Ch'tait un tintamare à fendre l'zouoreilles,
Jamais nou n'avait ouî eune discorde itelle:
Nou zérait juré qui l'faisaient exprès,
Tous chés tambours, i vos les capuchaient.
Enfin, chacun s'en fut, également édifié
D'avé veu tout comme v'la qui s'était passé.
Mais les Etats, devant que d'se s'parer,
Montirent dans lus Salle pour y délibérer,
De lus r'grets pour témoigné la preuve,
Eune lettre toute triste fut écrite à la veuve.
D'la sorte qu'nou zappelle lettre de doléance,
Pliène de regrets, de biaux mots, d'élégance.
......Tout ch'la est ben triste: mais qu'est qu'ou voulez,
N'est i pon écrit: "Ptits et grands ou mouorez."
Et bèn qu'nou sait piêssant, ainchin Dieu le veur,
I n'fait grâce à personne, mêmes ès Gouverneurs.

1838