Y'a trente jours en Septembre, et l'pouôrre Févri n'en a qu'vîngt-huit, mais ch't' année l'pouôrre Févri est heuné d'dates d'împortance. En deux mille chînq lé Mardi Gras d'l'églyise du Vouêt, la Nouvelle Année Chinnouaise et la Nouvelle Année Islamique nos tchaient sus l'co dans la même s'maine (mais les Grecs et les Russes et l's aut's Chrêtchiens d'l'Êst, ieux, lus en vont attendre jusqu'au sept dé Mar pouor lé c'menchement du Tchithême).
Ch'est en tchi les calendrièrs Chrêtchien, Chinnouais et Islamique sont touos les trais caltchulés s'lon l'almonnas leunaithe. Dans l'calendri Chinnouais et l'chein ès Musulmans les mais sièvent lé craîssant et l'tchiyant d'la leune, et douze mais leunaithes n'ont raiqu' trais chents chînquante-quat' jours (et dans l'tchièrs d'eune journée).
Dans l'calendri Islamique, l'année ieune est l'année siêx chents vîngt-deux AD et don ch't' année j'allons atchilyi l'année mil quat' chents vîngt-six. Êventuellement l'système d'Anno Domini et l'système Islamique lus en vont crouaîsi et en l'an vîngt mille huit chents septante-quat' j'allons mèrtchi la même année – mais ch'né s'sa pon nous tch'allons la mèrtchi nos-mêmes!
Mardi Gras arrive pouor les Chrêtchiens quarante-sept jours d'vant Pâques, et s'lon la Litourgie, Pâques tchait l'preunmié Dînmanche tchi sied la plieine leune auprès l'vîngt-tch'iun d'Mar, mais si la plieine leune èrlit l'Dînmanche, ch'est l'Dînmanche d'auprès tch'est Pâques. L'églyise a sîmplifié l'système un mio car la leune dans l'almonnas est eune leune théorique – mais les Chrêtchiens du Vouêt et les Chrêtchiens d'l'Êst né caltchulent pon la date dé Pâques d'la même manniéthe.
Et siez les Musulmans la nouvelle année dépend d'eune obsèrvâtion actuelle d'la leune au ciel pouor confirmer la date. I' faut don espéther un clièrgeon à seule fîn d'pouver vaie la leune! Jé souhaitons bouôn temps et eune raide bouonne année à touos nos anmîns Musulmans.
Geraint Jennings
Viyiz étout: