'J'sai bein,' s'fit le Ph'lip Desclios qui vînt m'vaie l'aut' se et m' apportit tchiques lèdgeummes, 'que tu vaies à l'égise ou la chapelle de temps en temps, mais y'allais tu quand tu tais hors pays?'.
'V'la tchi dépendait, 'j'lis dis, 'de oues' que j'tais. Au Japoun j'avaimes eune égise anglicanne, à Singapour eune catedrale angliaise, a Bangkok eune égise améritchaine, et j'allais quand j'pouvais, mais en Afghanistan, qu'est pays mahométan, les égises chrétiennes ne sount pas permîntes. Mais le gouvernement Afghan bein seux ne pouvait pas empêchi l's ambassades étrangières de suivre lus chulte. Dans l'ambassade britannique j'avaimes tchiques fais eun service dans la grande salle de bal, mais j'n'avaîmes pas d'ministre et - né rit pas - ch'tait me tchi les coundisait.
'J'avaimes tréjous not service de Noué. D'vant mon temps ch'en tait seulement pour les Britanniques, mais j'en trouvais ch'la pas trop chrétien, et j'invitais touas l's ambassadeurs de pays chrétiains et lus commeunautés d'y v'ner et d'prendre part, et l's ambassaduers de liéthe ieune des neu' lessouns, chaque dans lus propre langue, l'allemand et l'autrichian en allemand, le francais en francais, l'italien en italien, l'améritchain en angliais, faschioun améritchaine, etcetera, etcera.
'Pas touas les anglais en t'taient de m'n avis, mais j'lus dis que touas t'aient aussi buoans chrétiens qu' nous, p'têt miyeurs, et que l'Buoan Djeu ne coumptait autcheun pays miyeu qué l'autres. Ch'tait eun grand' succès et, l'service finit j'invities toute la coungrégatioun à prendre tchiques rafraichishments I'm'dîtent tous tchiqu' grand plaisi qu'j'lus avais fait.'
Eun'aut' service mémorablye ch'tait le ounze novembre en coummératioun des morts dans les deux grandes dgèrres. Devant me, chu service étout avait 'tait limite' ès bretanniques, mais j'învitis les Allemands, les Italiens et les Japounnais, et dans nos priéthes j'd'mandîmes au Buoan Djeu d'érposer l's âmes pas seulement des siens qu'avaient battu pour nous mais étout des siens qu'avaient battue countre nous. Ch'tait eun service hardi impressif. Quand j'avais terminé mon discours les grandes portes d'la salle fûtent ouvertes sus les gardîns et la veue au liain sus les mountaignes couvertes de né, et mes Gurkhas sus lus troumpettes sounnîtent la Retraite et la Réveille et, tous à l'attentioun, j'chantîmes not' cantique natiounal, dans tchi'qu'tout l'mounde, surtout nos anciens ennemîns, prîntent part.
'Mais la pus grand service que j'eus à coundithe ch'tait pour Winston Churchill, qui v'nait d'mouôthi. J'n'invitis pas seulement la commeunanté britannique, mais les Ambassadeurs avec lus principaux officiers de l'Amerique, d'la France, de l'Italie, de l'Allemagne, du Japoun et des autres pays qu'avaient 'té nos alliés ou nos ennémîns, et l'prince Shah Wali, ounclye au Rouai d'Afghanistan, et qu'avait 'té en chèrge de l'armée qui s'avait battu countre nous dans la traisieme dgèrre entre nous et les Afghans en mil neu chent dgiezeneuf. J'fis eun raid'buoan discours, p'têt le miyeu qu'j'ais jamais fait, et après, pusieurs me dîtent que si ma carriéthe n'avait pas 'té dans la diplomatie j'éthais fait hardi bein coumme ministre de réligioun".
"M'éthais tu veu, mon Ph'lip, coumme ministre? Au mains j'éthais peu dithe à ma coungrégatioun, couume le faisait la vier Bill du Heaume, qu'ya chent ans 'tait Recteur ichein à la Trin'té et qu'i'n'tait presque jamais sobre quand i' mountait en chaise, "Mes êfants, faites coumme j'vos dis, mais pas coumme qué j'fais".
La Ph'lip Desclios s'êbouffit d'rithe. "Bonsens", i's'fit, "dé t'aver écouté douner eun sérmoun dait aver bein amusé l'Dgiable, mais jé n'sais pas tchiqu'él Buoan Djeu en éthait pensé".
Le vièr Trin'tais
Viyiz étout: