I' faut d'tout pouor faithe un monde, pouor dithe lé temps. La faîs'sie d'almonnas (v'là tchi veint d'al-manakh, ma voulant dithe leune ou mais) est tréjous un acte dé fouai pouor les cheins tchi vaient l'Bouôn Dgieu dans la marchéthie du temps.
La Nouvelle Année Islamique arrive ch't' année lé vîngt-deux d'Févri s'lon l'calendriyi leunaithe. Pouor les Musulmans (v'là tchi veurt dithe les cheins tchi s'donnent) l'année 0 ou 1 (lé zéro n'tait pon dans l'compte) quémenche en 622. Muhammad s'fiêsait d'la Mecque à Médinne. Ch't' Hédjire (êmigrâtion) fondit l'Islam (tchi veurt dithe aver confianche en Dgieu).
L'calendriyi Musulman dit les couôrries d'la leune tch'est mastchulinne en Arabe. Quand i' vînt en Jèrri, lé janne Louothains d'Arabie, tout leuneux sus la Grève d'Azette, éthait dit “Bonsouair Mess Leune!”
Tout coumme, lé solé est féminîn. Ch'est-i' à cause dé l'êbliouissement qu'les imams exigent qu'les faches des bouonnefemmes saient muchies?
La tchestchion d'l'êcharpe est d'mandée aujourd'aniet en France où'est qu'l'Églyise est s'pathée d'l'Êtat – mais la louai tchi voudrait qué l'grand fichu sait întèrdit dans l's écoles républitchaines n'est pon eune louai tchi combat contre la r'ligion. Ou veurt seul'ment affirmer l'êgalité d'drait et dé d'vé des hoummes et des femmes.
Y'a-t-i' tchitch'un tchi pense acouo qu'les femmes sont tant înféthieuses qu'i' dév'thaient s'muchi? J'm'en vais m'en aller lî dithe deux'trais mots, mé!
Bouanne année à tous quouaiqu'il en sait, carapoussés ou pas, et qué ch't' année sait juste et paîsibl'ye.
Mariane de Bondy
Viyiz étout: