Nos v'là dans l'embarras avec Marie Hibou et je sommes bain gênés comment que tout chenna s'en va fini.
De d'pis tchiques mais oulle a 'té à tintamarrer pour aver des r'pathations et des améliorations dans not'e mansarde.
Ou voudrait un neu grès à fou, une armouaithe de batie dans la muthaille du Nord et les muthailles et l'pliafond erpapethés tout à neu.
Et entre nous, ch'n'est pas par ordgi, i' y a longtemps qu'il en est grand besoin.
Mais l'Chef n'a jamais voulu s'y accorder, i' dit, li, qu'il a tréjous veu la mansarde comme oulle est et que si je nos sommes grés jusqu'acheteu, je pouvons continuer souos les mêmes conditions.
Marie, n'étant pas satisfaite par des raisons comme chenna, a r'cliâmé une entrevue avec les Directeurs, mais ieux, tout en la r'chevant avec la pus grande courtouaisie et opprès li aver prêté une outheille sympathique, li annoncithent, "qu'ils avaient grand r'gret; qu'ils 'taient prêts à admettre que sa rétchête était parfaitement légitime et rain ne lus f'thait pus grand pliaisi que de faithe les r'pathations nécessaithes, mais lus prumié considethation était les intethêts des actionnaithes des Chroniques. Entreprendre des améliorations dans la mansarde entrain'nait des frais considethablyes, chein qu'aithait un êffet des pus désatreux sus les dividendes, une calamité qui résultéthait dans des repertchussions des plus ergrettablyes, conséquemment le Conseil d'Administration, tout en offrant ses pus profondes sympathies à Marie Hibou, femme Caouain, se viyait contraint de r'fuser, bain respectueusement, d'accéder à ses propositions."
La pouôre Marie fut pus ou mains êblouie par la pomposité de patheil langage et malgré qu'ou n'comprenait pas la maintchi de ches longs mots-là, ou réalisi quand-même que sa rétchête avait avouorté et ou se r'tithi de lus l'audguste présence dans une futhie êpouvantablye.
Mais oulle 'était dêterminée de gâgni san point, et ou fît l'affreux résolution d'adopter un procédé diabolique qui finitha par une tragédie si nos messieux ne r'vainnent pas sus les décision.
Ou viyiz, Marie est hardi lectuthiethe de sa sorte et oulle est au couothant de touos les êvenements qui s'arrivent dans toutes les parties du monde.
Oulle eut l'malheur l'aut'e jour de liéthe dans les nouvelles des Indes que Gandhi se r'était mins à jeuner parce que les affaithes n'allait pas à s'n idée et que ses adversaithes, pus acco que de le laissi mouothi d'faim avaient capitulé et li avaient donné dgain de cause.
Et v'là-t-i pas qu'ou s'décidi de faithe la même chose!
V'la bétôt une semaine qu'ou n'a mangi fistuthe, sapresti!
J'en avons êprouvé de toutes les sortes pour tâchi d'la faithe prendre d'la nouorrituthe, mais sans y réussi.
Oulle est têtouogne comme une vraie mule.
J'avons prépathé continuellement ses fricots favoris dans l'espéthance de la tenter, mais ch'tait peine perdue. Ou n'veurt touchi à rain.
Je li fis l'aut'e jour du bouollion d'souothie et l'Chef li fricachi une taupe, mais che fut autant d'tchi perdu.
Le Chef a perdu patienche et i' n'veurt pus s'en mêler et comme i' dit assez brutalement, "Puisqu'ou n'veurt pas mangi chein qu'nou li donne, et bain, qu'ou créve!"
Mais je n'peux pas envisagi la chose de même, mé. J'admets bain qu'ou ma contrarié systématiquement duthant les longues années que j'avons vêtchu ensemblye et je sais bain que de ma part je ne li ai pas 'té aussi aimablye comme j'aithais peu être, mais chenna m'afflyge de la vaie dêpéthi de jour en jour et que touos mes êfforts sont inutiles.
Oquo annièt j'ai 'té jusqu'à l'Etacq li ramasser un fricot d'bênis mais ch'est les p'tits Caouains qu'en ont héthité, oulle 'tait trop faîllie seulement pour les r'garder.
Hier je fus d'mander à notre véterinaithe de v'nin l'endgerdgichonner, mais dès qu'i' la vi i' n'vouli pas en prendre les risques.
Nos messieux pouorraient peut-être changi d'idée et li accorder sa d'mande mais je crains bain qu'il est trop tard.
Il est probablye que quand ch't articlye ichin pathaîtra dans la Chronique de Samedi, j'aithai perdu Marie Hibou.
Caouain
11/3/1939
Viyiz étout: