à Portinfé, Saint Ou.
Mardi au sé.
Moussieu l'Editeu,
Hier matîn, en dêjeunant, la Merrienne me dit qu'avec l'aide de yunne d'ses vaisines, ou s'n'allait faithe l'grand nettisage annuel. I' qu'menchîtent par notre chambre, touônîtent le liet avec la tête au sud, au lieu du nord, et transportirent chein tchi s'trouvait d'sous dans la chambre à côté. Si j'avais yeu un mot à dithe j'n'éthais pas permînt chonna, mais pour dithe vrai Moussieu, j'n'tais qu'un encombrement dans la maison. La tchuisine fut escrobbée, et dans touos les apartements rein n'fut laissi ouèsqu'il 'tait. J'trouvis ma blague dans un boutchet et ma pipe dans la câsse à tais. La pouôre catte fut enviée dans la tcherquéthie avec ses p'tits et l'tchan se trouvit amathé à un bouais. Et un mot, ch'tait une vraie mînsèthe, Moussieu, et si je n'perdis pas la tête complietement ch'tait parcequ'oulle est pliantée solidement sûs mes êpaules. Heutheusement qu'un pathel êvenement n's'arrive qu'une fais par an!
Sans doute, Moussieu, ou-s-avez veu chu portrait dans la Post des neuf mousses nés l'même jour en Ville. Aut'fais l's êfans 'taient nés seiz yeux, mais à ch'teu i' faut que les femmes tchi sont près d'lûs temps aillent à ch't hôpita à Saint Hélyi. La Merrienne ne sait pas pourtchi ni mé ni-n'tout.
I' pathaît que y'a tchiques Saint Ouënnais en faveur d'entrer une vêtuthe décorée à la Batalle de Flieurs au nom d'la pâraisse. J'criyons, la Merrienne et mé, que ch'est une bouonne idée, et si y'a besoin de mérgots, y'en a en plein par ichîn, et y'a étout des mâsses d'chais jaunes flieurs avec un drôle de nom. Avec chînq ou six entrées des pâraisses, la Batalle ch't année dev'thait présenter un bieau spectaclye, mais oulle étha à s'pâsser de Ph'lip et Merrienne dans lûs p'tit hèrnais, car ils en ont veu assez.
Né v'là tchique temps, Moussieu, que j'n'ai pas peut vos dithe autchune chose d'nouvé au sujet des deux êlections tchi n'sont pas ocquo décidees, et je n'si pas pûs avanchi agniet. À Saint Sauveux le Tom Mouothant n'a pas ocquo dit mot, d'un bord ou d'l'autre, et à la Trin'té le Charles Cabot et l'Edgar Mouothant sont à cherchi des vouaix jour après jour. Mais autchun des deux n'peut s'faithe seux de battre l'autre. En attendant, j'ai gagi une pièche d'êtchu sûs les deux, car, en faisant chonna, si je n'peux perdre rein. J'voudrais hardi aver votre opinion, Moussieu, mais j'sais bein qu'ou n'voudrez pas m'la donner.
Assez pour agniet, Moussieu.
Ph'lip
1964
Viyiz étout: