J'avons dit à bétôt à l'Êté mais j'en avons acouo les mémouaithes. Ch'est en tchi à chutte saîson-chîn ch'est la couôteunme dé raconter chein qu'nou-s'a fait duthant les vacanches. Et pouor dé mé j'ai 'té à pédaler.
Connaîss'-ous Saaremaa? S'ous êtes un supporteux du sport ous avez p't-êt' èrmèrtchi chu nom parmi les îles participant ès Gammes des Îles.
Saaremaa est la pus grande île dé l'Estonnie (mais la deuxième pus grande île d'la Mé Baltique car l'île dé Gotland est un brîn pus grande). L'île m'suthe dans les trais mille kilomètres cârrés. Jèrri m'suthe chent douze kilomètres cârrés et don Saaremaa est quâsiment trente fais pus grand qu'Jèrri.
Mais la populâtion d'Saaremaa est à tchiquechose près la même qu'la Pâraisse dé St. Hélyi. I' n'y'a pon hardi d'monde mais y'a un tas d'bouais. L'île est couvèrte dé bouaîs'sies, sustout des bouaîs'sies d'sapîns, et la bouaîs'sie a 'té la pus grande îndustrie d'l'île - mais achteu nou-s'est à rencouothagi l'tourisme.
Duthant les chînquante ans d'l'otchupâtion Soviétique, Saaremaa 'tait freunmé ès vîsiteurs à cause des bases militaithes qu'les otchupants avaient êtablyi là-bas. D'pis la fîn du dgiêx-neuvième siècl'ye les gens dé Saaremaa avaient dêv'loppé lé tourisme dé santé et dé spas - sustout auve lé pité méd'cinna qu'nou-s'y trouve. Mais au c'menchement d'la Deuxième Dgèrre Mondiale quand l'Unnion Soviétique otchupit l'Estonnie les hôtels et les spas d'la capitale Kuressaare fûtent freunmés.
Kuressaare est la seule grande ville d'l'île auve la maîntchi d'la populâtion.
Duthant l'otchupâtion les Soviétiques avaient changi l'nom d'la ville en Kingiseppa tchi 'tait l'nom d'un commeuniste dé Saaremaa. Mais achteu nou-s'a dêchangi l'nom et rouvèrt d's hôtels et bâti des nouvieaux auve lus bains d'pité, lus salles dé massage au pité et pouor autant qu'j'en sache nou-s'y mange du pité dans les restaurants d'ches spas étout!
Pouor dé mé, j'ai veu assez d'pité en pédalant par les bouaîs'sies d'Île sans vîsiter ches êtablyissements-là.
Ch'est mangnifique dé pédaler à Saaremaa pa'ce qué l'île est pliate coumme eune crêpe et viyant qu'la populâtion est si p'tite, i' n'y'a pon hardi d'trafi par les c'mîns excepté sus la grand' route entre la caûchie ès batchieaux et Kuressaare. Mais i' faut r'garder la carte dé l'île pa'ce qué seulement eune minnorité des rues sont tathés. L'restant des c'mîns sont des c'mîns d'gravi ou d'ponsi - pas seulement les p'tits c'mîns mais des grand c'mîns étout. Jé s'pose qu'i' faut d'ches grands c'mîns pouor transporter les ouadgîns tchi transportent les bouais abattus - ou autrément i' fûtent faits pouor les boulants militaithes. Mais v'là tchi donne un êffet coumme nou l'vait dans des films Améthitchains quand un boulant tchi pâsse fait voler un nouage dé blianc ponsi dans sa houaiche.
Mais l'travèrs des bouaîs'sies y'a des p'tites sentes - et i' faut eune bike à montangne pouor pédaler par les trébules et les rotchièrs et les réchinnes des bouais et l' fanmeux pité. Mais i' n'y'a pon d'monts et s'lon l'êtat des c'mîns ch'est aîsi d'pédaler. Bein seu qu'nou n'a pon d'mangnifiques veues pa'ce qué nou n'peut pon monter et y'a des grands bouais à touos les bords.
Mais y'a tout pliein d'choses d'întéthêt à vîsiter sustout les vièrs moulîns en bouais chîn et là par les c'mîns. Saaremaa a des vielles églyises Luthériennes et Orthodoxes, des pouquelayes et des câtchieaux, des fortificâtions en tèrre, et, et des pièrres sacrées qu'les païens soulaient louangi. En êffet y'a des pièrres partout, et ch'est bein bizarre dé trouver un grand pèrron, grande coumme eune maîson, au mitan d'la forêt. Ch'est en tchi les riviéthes dé gliaiche tch'avaient couvèrt l'île pendant l'Âge dé Gliaiche avaient laîssi driéthe des gros blios ronds d'grannit et les bouais ont poussé d'pis. Lé pus grand d'ches pèrrons a eune êtchelle qu'nou peut grîmper amont pouor s'mâter sus l'haut à seule fîn d'èrgarder les bouais à l'entou. I' n'y'a pon d'monts mais y'a d'ches rotchièrs - et pis y'a les fanmeuses falaises.
Tout l'monde à Saaremaa dit qu'i' faut vîsiter les falaises au Nord d'l'île. Coumme j'l'ai dêjà dit, l'île dé Saaremaa est pliate coumme eune plianche et nou peut pédaler amont lé c'mîn tchi mène au haut des falaises dé Saaremaa sans changi d'vitesse. Pouor dé mé, des falaises dé vîngt mètres qu'nou pouôrrait grîmper sus auve l'aîgue d'eune êtchelle né méthitent dgéthe d'êt' app'lées des falaises – en êffet, i' sont bein naïces mais nou n'pouôrrait pon dithe qu'i' sont spectatchulaithes, valet.
L'aut' chose qu'nou-s-est s'posé d'vîsiter à Saaremaa est vraînment pus intérêssante – ch'est un grand cratéthe dé météorite préhistorique. Dé d'houors chenna r'sembl'ye pus ou mains à La Hougue Bie – eune grande hougue bouaîsie. Mais quand nou monte nou peut r'garder bas et vaie l'grand cratéthe. Nou peut d'valler dans l'cratéthe et au fond y'a eune mathe – toute ronde où'est qu'l'êtaile tchiyante avait tchée. Sans doute chu rotchi du ciel éthait êcliatchi un tas d'pité sans êt' trop méd'cinna.
J'peux r'quémander eune vacanche à pédaler à Saaremaa, mais mêfi'ous des météorites!
Geraint Jennings
Viyiz étout: