Ne v'chin eunne bein drôle d'histouèthe, bouannes gens. J'l'ai ouïe chute semaine, et les Trin'tais pouorront vos dithe tout chein qui s'est passèt.
Viyiz étout:
Une belle "rose" dont le pi est souvent mins en pot dans la Gloster Hotel, iou que ch'est iun des ornements, avait tèt enl'vée par trop de vent dans les velles, je cré, du bord de la Trin'tèt.
Un offici du Counnêtablle, homme paîsible si janmais y'en a ieu, la trouvi dans la route et pensi à li-îme: Si j'allais la porter à la stâtion d'police, v'là qui s'sait un bieau compyîment pour Mess Lucksen et v'là tchil rêcompens'sait pour chein qui fît pour not' pâraisse y'a tchique temps.
Chein qui fut dit fut fait. Nou z'atteli l'kèrre pour portè chutte belle rose en ville.
En attendant la présentation qui d'vait avé ieu d'vant l'juge, la "rose" fut meins dans le conservatory -ou savèz bein, bouannes gens, chés conservatory que nou cauffe avec des pipeset iou qui y-un p'tit wicket pour donner de l'air.
Le lendemain, le p'tit Johnnie, le sien qui n'est pas bein haout, mais qu'est tréjous là et n'a pas d'peux d'bâlyi d'sa bec pas pus que d'allouangni unne cliamuse ès siens qu'ithaient se frotter trop près d'li, eh bein, le p'tit Johnnie en fut quâsiment marri. I' trouvi que chutte "rose", apportèe d'la Trinitèt, sentait un miot trop fort et n'aimit pas trop les pommiaux dorès des siens qui l'avaient apportèe. Et pis, pour vos dithe le vrai, d'pis qu'nou a pas voulu payi pour l'huile du motor, la pâraisse de la Trintèt n'est pas en bouanne odeur dans Seale Street.
La "rose" fut déshallée du conservatory et i' fallait allé la plianté occuo unne fais dans les gardîns de Gloster Hotel devant la présentation.
Tchès qui y-de vrai dans chutte drôle d'histouèthe, ch'est cha que la police de la Trintèt pouorrait vos dithe!
Cahouain
Chronique de Jersey 29/10/1910