Actes des Apôtres, Chapitre 8
Chapitre 8, vèrsets 26-39
Mais un m'sagi du Seigneu dit à Ph'lip: "Lève-té et va sus l'Sud, avaû lé c'mîn tchi mène dé Jéthusalem à Gaza par lé d'sèrt!"
Et i' s'en fut et v'là tchi 'tait v'nu à Jéthusalem pouor la priethie un Êtchopien, un consilyi d'la Candace, la reine des Êtchopiens, tchi gardait sa trésôr'rie à lyi. I' s'en r'allait, assis dans sa cârrosse et 'tait à liéthe lé livre du prophète Esaie. Et l'Esprit dit à Ph'lip: "Apprèche-té et monte dans sa cârrosse!"
Et Ph'lip en couothant à li ouït qu'i' 'tait à liéthe lé prophète Esaie et lî dit: "Comprann'-ous chein qu'ous êtes à liéthe?"
Et i' lî rêponnit, "Coumme tchi qué j'peux l'comprendre sans aver tchitch'un à m'l'explyitchi?" Et i' fit monter Ph'lip dans sa cârrosse. Assa lé but du livre qu'i' 'tait à liéthe 'tait ch'tî-chîn: "I' 'tait coumme eune brébis prînse pouor la tueûthie, et coumme un angné teu pouor la touôth'thie, et i' n'ouvrit pon sa bouoche. Étant du bèrcas d'falaise, nou n'l'êcoutait pon: tchi qui savait ses gens? Ch'est en tchi i' 'tait copé hors du monde."
Et l'Êtchopien dit à Ph'lip: "Entouor tchi qu'i' dit chennechîn, chu prophète? Entouor li-même ou un aut'?"
Ph'lip don en c'menchant d'auve ch't' êcrituthe-là lî baillit la bouonne nouvelle entouor Jésû. Et coumme il' allaient avaû lus c'mîn, i' vîntent à un dou, et l'Êtchopien dit, "Né v'chîn dé l'ieau. Tch'est qui m'empêche d'èrchéver la lav'thie?" Et i' c'mandit qu'la cârrosse fûsse arrouée d'en par là, et les deux dg'ieux d'valîtent dans l'ieau et Ph'lip lî baillit la lav'thie. Et quand i' sortîtent dé l'ieau, l'Esprit du Seigneu cârrit Ph'lip hors dé là, et l'Êtchopien né l'viyait d'aut' mais s'en r'fut tout rêjoui.
Viyiz étout:
- La Bibl'ye
- L's Actes des Apôtres
- L's Actes: chapitre 1
- L's Actes des Apôtres: 2
- Actes, Chapitre 2, vèrsets 1-14
- Actes, Chapitre 2, vèrsets 36-42
- Actes 3
- L's Actes des Apôtres, Chapître 4
- L's Actes des Apôtres: 5
- L's Actes des Apôtres: 7
- L's Actes des Apôtres: 9
- L's Actes des Apôtres, chapitre neuf, vèrsets vîngt-six à trente
- L's Actes des Apôtres, Chapitre neuf, vèrsets vîngt-six à trente'tch'ieune
- L's Actes des Apôt's, Chapitre 9, vèrsets 36 à 43
- L's Actes des Apôtres: 10
- L's Actes des Apôtres: Chapitre 15
- L's Actes des Apôtres: 16
- L's Actes des Apôtres: 20