Et Pièrre et Jean montaient chu jour-là au Templ'ye, viyant qu'i' 'tait neuf heuthes, l'heuthe d'la priéthe, et y'avait un houmme, êstropié d'pis sa naîssance, qu'nou-s'apportait là châque jour et pliaichit à la porte, la cheinne qu'nou mênommait la Belle, du Templ'ye, et ilo i' tcheûtait des sou ès pâssants. I' dgettit Pièrre et Jean tchi 'taient pouor entrer dans l'Templ'ye et tcheûtit auprès dg'ieux. Pièrre l'êpyit, et Jean étout, et dit, "Èrgarde-nous." Et i' les r'gardit en espéthant r'chéver dé tchi dg'ieux. Et Pièrre dit, "J'n'ai ni d'l'argent ni d'l'or, mais chein qu'j'ai, v'là chein qué j'té donne. Au nom d'Jésû-Christ d'Nazareth, lève-té et marche!" Épis Pièrre prînt sa main et lé d'butit et d'un co ses pids et ses g'vil'yes fûtent renforchis, et d'un ambron i' s'mâtit et marchit et entrit dans l'Templ'ye acanté ieux, à marchi et à saûticoter et à louangi l'Bouôn Dgieu. Et tout l'monde lé vit à marchi et à louangi l'Bouôn Dgieu et i' r'mèrtchîtent qué ch'tait l'houmme tchi tcheûtait à la Belle porte du Templ'ye et i' fûtent êmèrvilyis et ravis viyant chein tchi s'tait adonné auve li. I' s'atchiannetait acouo à Pièrre et Jean, et l'monde affliotchîtent, touos êpaûmis, à ieux dans l'portico dit d'Salomon. Pièrre, en viyant chenna, dit au monde, "Bouonnes gens d'Israël! Pouortchi qu'ous êtes êmèrvilyis d'même? Pouortchi qu'ou nos r'gardez coumme si j'avêmes par not' piêssance à nous ou not' pieuseté à nous fait mîns ch't houmme à marchi."
Viyiz étout: