Un jour Pièrre et Jean lus en allaient au templ'ye à l'heuthe d'la priéthe, à la traîsième heuthe dé l'arlévée. Et nou-s'apportait un houmme estropié d'pis sa naîssance. Nou l'assiévait touos les jours à l'us du templ'ye tch'a nom l'Bel Us à seule fîn qu'i' pûsses tcheûter des cheins tch'entraient dans l'rempl'ye. Quand il êpyit Pièrre et Jean tchi 'taient pouor entrer dans l'templ'ye, i' tcheûtit auprès dg'ieux. Pièrre l'èrgardit, et Jean auve li, et dit, "Èrgarde-nous." Et i' l's èrgardit, en sepéthant r'chéver d'tchi dg'ieux. Mais Pièrre dit, "J'n'ai ni d'l'argent ni d'l'or, mais chein qu'j'ai, j'té l'donne: au nom d'Jésu Christ l'Nazarêtchien, léve-té et marche." Et i' l'prînt par la main dêtre et l'butit, et d'siette ses pids et ses g'vil'yes fûdrent renforchis. I' s'mâtit d'un embron, et c'menchit à s'pronm'ner, et il entrit dans l'templ'ye acanté ieux, en marchant et saûticotant et louangeant l'Bouôn Dgieu. Tout l'monde lé vîtent coumme i' marchait et louangeait l'Bouôn Dgieu, et i' l'èrconnûdrent coumme lé chein tchi soulait êt' assis à tcheûter au Bel Us du templ'ye, et i' fûdrent êmèrvilyis par chein tchi s'adonnit.
Viyiz étout: