Les Pages Jèrriaises

L'Avathîthon

En mé d'vièrs l'Su'êt dé Jèrri à dans les deux kilomètres dé La Rocque en la Pâraisse dé Grouville, y'a des rotchièrs tch'ont nom L'Avathîthon (ou L'Avarîson ou L'Avathîson ou L'Avalîson). Nou peut distîndgi deux rotchièrs en partitchulyi tch'ont nom Lé P'tit Avathîthon et L'Grand Avathîthon.

La tradition a lié ches rotchièrs auve Saint Samson dé Dol. Au dgiêx-huitchième siècl'ye eune fortificâtion tch'avait 'té bâtie sus iun d'ches rotchièrs avait nom l'Boulevard Saint Samson, ofûche du nom d'un rotchi. Chutte batt'tie 'tait pus à co du bord du P'tit Avathîthon.

Auprès la Batâle dé Jèrri nou décidit d'renforchi les fortificâtions là-bas et en 1782 eune tou fut bâtie sus l'Grand Avathîthon. Auprès chenna nou n'ouait d'aut' pâler du Boulevard Saint Samson - ch'est probabl'ye à chein qu'nou crait qu'la pièrre en fut r'faite sèrvi pouor bâti la nouvelle tou.

La nouvelle tou 'tait cârrée, à quatre êtages, auve eune batt'tie à canons aupi.

La carte dite du Duc dé Richmond (quémenchie en 1787 et publiée et 1795) mouontre la tou et l'nom "Seymour Tower". Nou n'sait pon dé ioù qu'i' veint l'nom: ch'est-i' à l'hounneu du Gouvèrneux, Messire Henry Seymour Conway (Gouvèrneux 1772-1795, tch'avait proposé un tas d'fortificâtions en Jèrri), ou du Gouvèrneux, Messire Douard Seymour (Gouvèrneux 1537-1550), ou des deux en même temps?

Pouor l'mitan du dgiêx-neuvième siècl'ye la tou n'tait d'aut' utile pouor la d'fense militaithe et en 1860 un rapport militaithe proposit d''èrnonchi à l'usage et au maintchein d'la tou. En 1896 lé Gouvèrnément Britannique considéthit d'vendre la tou, et à la fîn l's Êtats d'Jèrri acatîtent la tou en 1923 pouor £120. L's All'mands l'otchupîtent duthant l'Otchupâtion mais sans y r'graie grande chose. Auprès la dgèrre la tou 'tait louée à des gens, pouor des parties d'pêque et tout chenna, épis d'pis 2006 la tou est mênagie par l'Héthitage dé Jèrri, tch'y propose des niétchies d'louogement pouor des vîsiteurs.

 

Viyiz étout:

 

Les Pages Jèrriaises